ޓީބީ ނައްތާލުމަށް ކުރެވޭ މަސައްކަތުގައި ސިއްހީ ޚިދުމަތްތެރިންނާއި އާންމު ރައްޔިތުން ގުޅިގެން މަސައްކަތް ކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެދިވަޑައިގެންފިއެވެ. 

ދުނިޔޭގެ ޓީބީ ބަލީގެ ދުވަހުގެ މުނާސަބަތުގައި، މިއަދު އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ، ޓީބީއަކީ ރައްކާތެރިވެވޭ އަދި ފަރުވާ ހޯދޭ ބައްޔެއް ނަމަވެސް، ދުނިޔޭގެ އެކި ކަންކޮޅުތަކުގައި މިލިއަނުން މީހުން އަދިވެސް މި ބަލީގެ ޝިކާރައަކަށް ވަމުންދާކަމީ ހިތާމަހުރި ކަމެއް ކަމަށެވެ.

އަދި މި ބަލި ނައްތާލުމަށްޓަކައި ކުރެވޭ މަސައްކަތުގައި ބަލި އަވަހަށް ދެނެގަތުމާއި، ވަރުގަދަ ސިއްހީ ނިޒާމެއް އޮތުމާއި، އަދި މުޅި މުޖުތަމައުގެ ފުރިހަމަ ބައިވެރިވުން ކޮންމެހެން ބޭނުންތެރިކަން ރައީސް ފާހަގަކުރެއްވިއެވެ. 

ރާއްޖޭގެ ހާލަތަށް އަލިއަޅުއްވާލައްވަމުން ރައީސް ވިދާޅުވީ، ދިވެހިރާއްޖެއަކީ ޓީބީ ޖެހޭ މިންވަރު މަދު ގައުމެއްގެ ގޮތުގައި އޮތުމަކީ ފަހުރުވެރިވާ ކަމެއް ކަމަށެވެ. އަދި ބަލި އަވަހަށް ދެނެގަތުމަށްޓަކައި ޒަމާނީ ވަސީލަތްތައް ގާއިމުކުރުމާއި، ފަރުވާގެ ނިޒާމު ހަރުދަނާކުރުމާއި، ހާއްސަކޮށް ބަލީގެ ނުރައްކާ އޮތް ފަރާތްތަކަށް ބޭނުންވާ ފަރުވާ ކަށަވަރުކުރުމަށް ސަރުކާރުން މެދުކެނޑުމެއްނެތި މަސައްކަތް ކުރަމުންދާނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން، ރާއްޖެއިން ޓީބީ ނައްތާލުމަށް ކުރެވޭ މަސައްކަތުގައި ސިއްހީ ޚިދުމަތްތެރިންނާއި އާންމު ރައްޔިތުން ގުޅިގެން މަސައްކަތް ކުރުމަށް ރައީސް އިލްތިމާސްކުރެއްވިއެވެ. އަދި ޓީބީއެއް ނެތް މުސްތަގުބަލަކަށް ވާސިލުވުމަށްޓަކައި އާންމު ސިއްހަތު ރައްކާތެރިކުރުމުގެ އަޒުމް އާކުރެއްވިއެވެ.

ދުނިޔޭގެ ޓީބީ ދުވަސް ފާހަގަކުރަމުންދާއިރު، ރާއްޖޭގެ ސިއްހީ ދާއިރާގެ އަމާޒަކީ ކުރިއަށް އޮތް އަހަރުތަކުގެ ތެރޭގައި ރާއްޖެއިން މި ބަލި އެއްކޮށް ނައްތާލުމެވެ.