އީރާނުން އިސްރާއީލަށް އަމާޒުކޮށް ފޮނުވާލި ވަރުގަދަ މިސައިލް ހަމަލާތަކެއްގައި، ތެލް އަވީވްގެ ތިން އިމާރާތެއް މުޅިން ހަލާކުވެ ސުންނާފަތިވެފައިވާ ކަމަށް އިސްރާއީލުގެ މީޑިއާތަކުން ރިޕޯޓްކޮށްފިއެވެ.
އިސްރާއީލުގެ ދިފާއީ ބާރުތަކާ ހަވާލާދީ މީޑިއާތަކުން ބުނާ ގޮތުގައި، އީރާނުން ފޮނުވާލި ގިނަ އަދަދެއްގެ މިސައިލްތައް އިސްރާއީލުގެ ވައިގެ ދަތުރުފަތުރާއި ސަލާމަތީ ނިޒާމު ފޫއަޅުވާލުމަށްފަހު ވަނީ ތެލް އަވީވްގެ މީހުން ދިރިއުޅޭ ސަރަޙައްދުތަކަށް އަރާފައެވެ. މީގެ ސަބަބުން ބޮޑެތި އިމާރާތްތަކެއް ބިންމާހަމަވެ، އެ ސަރަޙައްދުގެ އެހެން ބައެއް ބިނާތަކަށް ވެސް ބޮޑެތި ގެއްލުންތަކެއް ވަނީ ލިބިފައެވެ.
މި ހަމަލާތަކާ ގުޅިގެން މުޅި ތެލް އަވީވްގައި ވަނީ ނުރައްކަލުގެ ރަނގަބީލު އަޅާފައެވެ. އަދި ހަމަލާ އަމާޒުވި ސަރަޙައްދުތަކުގައި ރެސްކިއު ޓީމުތަކުން ދަނީ ހަރަކާތްތެރިވަމުންނެވެ. އިމާރާތްތައް ވެއްޓުމުގެ ސަބަބުން އޭގެ ދަށުގައި މީހުން ތާށިވެފައި ތިބެދާނެ ކަމަށް ބެލެވޭތީ، މީހުން ސަލާމަތްކުރުމުގެ މަސައްކަތް ދަނީ ކުރިއަށެވެ.
މެދުއިރުމަތީގެ ހަނގުރާމަވަނީ އިތުރަށް ގޯސްވެ، ދުނިޔޭގެ ތެލުގެ އަގުތައް އިންތިހާއަށް އުފުލި ދަތުރުފަތުރަށް ވަރަށް ބޮޑަށް ބުރުއަރާފައެވެ.
އީރާނަށް 28 ފެބްރުއަރީއިން ފަށައިގެން އެމެރިކާއާއި އިސްރާއީލުން ދެމުންދާ ހަމަލާތަކާއި ގުޅިގެން އީރާނުން ދަނީ ބަދަލު ހިފުމުގެ ހަމާލާތައް އިސްރާއީލަށާއި އެމެރިކާއަށް ދެމުންނެވެ.
އީރާނުން ބުނެފައިވަނީ މިއީ އިސްރާއީލުން ހިންގަމުންދާ ލާއިންސާނީ އަމަލުތަކަށް ދިން ރައްދެއް ކަމަށެވެ. ނަމަވެސް އިސްރާއީލުން ވަނީ މި ހަމަލާގެ ބަދަލު ވަރުގަދައަށް ހިފާނެ ކަމުގެ އިންޒާރު ދީފައެވެ. މިކަމުގެ ސަބަބުން މެދުއިރުމަތީގައި ފެށިފައިވާ މި ހަމަނުޖެހުން ބޮޑު ހަނގުރާމައަކަށް ބަދަލުވެދާނެ ކަމުގެ ބިރު ބައިނަލްއަގުވާމީ މުޖުތަމައުން ދަނީ ފާޅުކުރަމުންނެވެ.
Advertisement
This content is created and paid for by advertisers and does not involve Voice Journalists
