ނަން މަޝްހޫރު ޓީވައިލިން އާއި ހަވާލުކޮށްގެން އައްޑޫ-ހިތަޑޫ ހުޅުމީދޫ ގުޅުވައިލުމަށް ކުރި ދިރާސާތަކަށްފަހު، އައްޑޫ-ހިތަދޫ ހުޅުމީދޫ ބްރިޖަކުން ގުޅުވައިލުމަށް ނިންމައިފިއެވެ.

މިނިސްޓްރީ އޮފް ކޮންސްޓްރަކްޝަން އެންޑް އިންފްރަސްޓްރަކްޗަރ އިން އެކްސްގައި ކުރި ޕޯސްޓެއްގައި ބުނީ، އައްޑޫ-ހިތަދޫ ހުޅުމީދޫ ގުޅުވައިލުމަށްޓަކައި މައިގަނޑު 2 ގޮތެއް ދިރާސާ ކޮށްފައިވާ ކަމަށެވެ.

ޓީވައިލިން އިން ކުރި ދިރާސާތަކުން ހުރިހާ ގޮތަކުން އެންމެ ރަނގަޅީ ބްރިޖު ކަނެކްޝަނަކުން ގުޅުވައިލުން ކަން މިނިސްޓްރީއިން ވަނީ ފާހަގަކޮށްފައެވެ.

މީގެ އިތުރުން، ބްރިޖު އެޅުމަށް މައިގަނޑު 3 ރޫޓެއް ދިރާސާކޮށްފައިވެއެވެ. ހުރިހާ ރޫޓެއް ދިރާސާކޮށް އެންމެ ރަނގަޅު ރޫޓަކީ 4 ބްރިޖު ކްރޮސިން ހުންނަ ރޫޓު ކަމަށް މިނިސްޓްރީއިން ބުނެއެވެ.

އަދި އެކިއެކި ބްރިޖު ޑިޒައިންތައް ޓީވައިނިލް ދިރާސާކުރަމުންދާ ކަމަށްވެސް މިނިސްޓްރީއިން ވަނީ ބުނެފައެވެ. އެއީ، ފްލޯޓިން ބްރިޖު، ކޮންޓިނުއަސް ރިޖެޓް ފްރޭމް ގާޑަރ ބްރިޖު، އަދި ކޭބަލް ސްޓޭޑް ބްރިޖެވެ. މި ބްރިޖުތަކުގެ ތެރެއިން ސުޕަ ސްޓްރަކްޗަރ އަދި ސަބް ސްޓްރަކްޗަރ އެންމެ ރަނގަޅު ބްރިޖު ޓީވައިލިން އިން ދަނީ ދިރާސާކޮށް ހޯދަމުންނެވެ.

އައްޑޫ-ހިތަދޫ ހުލުމީދޫ ކޮންސެޕްޓް ބްރިޖު މިހާރުވަނީ ތައްޔާރުކޮށްފައި ކަމަށް މިނިސްޓްރީއިން ވަނީ ބުނެފައެވެ. އަދި މި އަންނަ މަހަށް ޖިއޯ-ޓެކްނިކަލް މަސައްކަތްތައް ނިމޭނެކަމަށްވެސް ވަނީ ފާހަގަކޮށްފައެވެ.