ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބާއްވަައި، މަޖިލީހުގެ އުމުރު ގުނާ އުސޫލަށް ބަދަލުގެނައުމަށް ގާނޫނުއަސާސީއަށް ގެނައި ބަދަލު ބާތިލުކުރުމަށް ސުޕްރީމް ކޯޓަށް ހުށައެޅި މައްސަލަ ބާތިލުކުރުމާއި ގުޅިގެން ސުޕްރީމް ކޯޓްގެ ކުރީގެ ފަނޑިޔާރު ހުސްނުއްސުއޫދު ދެއްކެވި ވާހަކަތަކަށް ކުރީގެ ޕްރޮސެކިއުޓަރު ޖެނެރަލް މުހްތާޒް މުހުސިން ރައްދު ދެއްވައިފި އެވެ.
ކެންދޫ ދާއިރާގެ ކުރީގެ މެންބަރު އަލީ ހުސައިން ހުށައެޅުއްވި މައްސަލަ ބާތިލުކޮށްފައިވާކަން ސުޕްރީމް ކޯޓްގެ ރަޖިސްޓްރާ މިއަދު ވަނީ އަންގާފަ އެވެ. އެ ނިންމުމާއި ގުޅިގެން ސުއޫދު ވަނީ އަލީ ހުސައިންގެ ދައުވާ އަކީ ރިފަރެންޑަމްއަކަށް އަހަންޖެހޭ ކަމެއްގަ ފަނަރަ ދުވަސް ތެރޭގަ ބިލާމެދު ގޮތެއް ނުނިންމީމަ ބިލު ބާތިލުވާނެ ކަމަށް ކަނޑައަޅައިދިނުން ކަމަށާ ނަމަވެސް ސުޕްރީމް ކޯޓުން އަޑުއެހުމެއް ވެސް ނުބާއްވައި ނިޔާ ކަނޑައަޅާފައިވާ ކަމަށެވެ.
ސުއޫދު ވަނީ ދައުވާ ކުރާ މީހާގެ ވާހަކަ އަޑުއެހުމެއްނެތި ނިޔާ ކަނޑައެޅުމަކީ ގޯހެއް ނޫންތޯ ސުވާލު ކުރައްވާފަ އެވެ.
ސުއޫދުގެ އެ ވާހަކަތަކަށް ރައްދު ދެއްވާ މުހުތާޒް ވިދާޅުވީ އެގޮތަށް ރަޖިސްޓްރާ މެދުވެރިކޮށް އެންމެ ގިނައިން ގޮތް ނިންމާފައިވަނީ ސުއޫދު ސްޕްރީމް ކޯޓުގެ ފަނޑިޔާރުކަމުގައި ހުންނެވިއިރު ކަމުގައި ވިދާޅުވެފަ އެވެ. އަދި ރަޖިސްޓްރާއަށް އެބާރު ދިނީ ވެސް އޭރުގެ ސްޕްރީމްކޯޓުން ކަމުގައި ވިދާޅުވި އެވެ.
"ރަޖިސްޓްރާގެ އެފަދަ ނިންމުންތައް ރަނގަޅު ކަމަށް ކަނޑައަޅާފައިވާ ފަނޑިޔާރުންގެ ތެރޭގައި އުސްތާޛު ސުއޫދު ހިމެނޭ," މުހުތާޒް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
