ކައްކާ ގޭސް ރައްކާކުރެވޭ މިންވަރު އިތުރުކުރުމުގެ މަސައްކަތް ފަށާފައިވާކަމަށް ފިނޭންސް މިނިސްޓަރު ވަޒީރު މޫސާ ޒަމީރު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ޒަމީރު ވިދާޅުވީ، މާލެ ސަރަހައްދުގައި ގޭސް ރައްކާކުރެވޭ މިންވަރު އިތުރުކުރުމުގެ މަސައްކަތް އެސްޓީއޯއިން ފަށާފައިވާކަމަށެވެ. އެގޮތުން 1،500 ޓަނުގެ އާ ސްޓޯރޭޖެއް ގާއިމްކުރުމުެ މަސައްކަތް ކުރަން ފަށާފައިވައިރު، މިއީ ގޭހުގެ ދަތިކަން ކުރިމަތިވިޔަ ނުދިނުމަށް ކުރެވޭ މުހިންމު މަސައްކަތެއްކަން މިނިސްޓަރު ފާހަގަކުރެއްވިއެވެ.

މި މަސައްކަތް މިހާރު ޕްރޮކިޔުމަންޓްގައި އޮތްއިރު، މި މަސައްަތް ނިމުނުން ދެ މަސްދުވަހުގެ މުއްދަތަކަށް ރާއްޖެއަށް ބޭނުންވާ ގޭސް ރައްކާކުރުމުގެ ގާބިލްކަން ލިބިގެންދާނޭކަމަށް މިނިސްޓަރު ވިދާޅުވިއެވެ. އެސްޓީއޯއިން މިހާރު މާލެ ސަރަހައްދުގައި ގޭސް ރައްކާކުރުމުގެ ކެޕޭސިޓީއަކީ 1،000 ޓަނެވެ. 

މެދުއިރުމަތީގެ ހަނގުރާމައާ ގުޅިގެން ދުނިޔޭގެ ބާޒާރުގައި ތެލާއި ގޭހުގެ އަގު ބޮޑުވެފައިވާއިރު، ރާއްޖޭގައި އަދި ގޭހުގެ އަގު ބޮޑުކޮށްފައެއް ނުވެއެވެ. ނަމަވެސް މި ފަހަކުން ދެ ފަހަރެއްގެ މަތިން ގޭސް ވިއްކާ މިންވަރު ވަރަށް މަދު ދުވަސްކޮޅަކަށް ލިމިޓްކުރިއެވެ. ނަމަވެސް މިހާރު އެއްވެސް ދަތިކަމެއްނެތި ރާއްޖޭގެ ހުރިހާ ހިސާބަކުންވެސް ކައްކާ ގޭސް ލިބެއެވެ.

ރާއްޖޭގައި ދެ ޕާޓީއަކުން ގޭސް ވިއްކައެވެ. އެއީ އެސްޓީއޯގެ ސަބްސިޑަރީ ކުންފުނި މޯލްޑިވް ގޭހާއި، ވިލާ ގޭހެވެ.