މިހާރު ކުރިއަށްދާ 20 އަހަރުން ދަށުގެ ސާފް ޗެމްޕިއަންޝިޕް ފުޓްބޯޅަ މުބާރާތުގެ ގްރޫޕް ސްޓޭޖްގައި ދިވެހިރާއްޖެ އާއި ބޫޓާން ބައްދަލުކުރިމެޗް އެއްވެސް ޓީމަކަށް ލަނޑެއް ނުޖެހި ނިމިއްޖެއެވެ.

ގަލޮޅު ދަނޑުގައި ކުޅުނު މިމެޗްގައި ބޫޓާން ތީމް ފެނުނީ ބޮޑަށް ފަހަތަށް އިސްކަންދީގެން ކުޅުނު ތަނެވެ. މެޗްގެ ފުރަތަމަ ހާފްގައި ބޫޓާނުން ޑިފެންސިވް ގޭމެއް ކުޅުނު ނަމަވެސް ރާއްޖެއިން ވަނީ ބޫޓާނުގެ ގޯލަށް ނުރައްކާކޮށްފައެވެ. މީގެ ތެރެއިން އެންމެ ފާހަގަކޮށްލެވެނީ، އީލާން ފޮނުވާލި ހަމަލާއެވެ. އީލާން ފޮނުވާލި އެ ބޯޅަ އަމާޒުވީ ގޯލްގެ އަރިމަތީ ދަނޑިއަށެވެ.

މިމެޗްގައި ރާއްޖޭގެ ޓީމުން ގިނައިރު ބޯޅަ ހިފަހައްޓައިގެން ކުޅުނުއިރު، ބޫޓާންގެ ކުޅުންތެރިން ވަނީ ފުރަތަމަ ހާފްގައި ގިނަ ފައުލްތަކެއް ކޮށްފައެވެ. މެޗްގައި ބޫޓާންގެ ޓީމުންވެސް ވަނީ ލަނޑުޖަހާނެ ރަނަގޅު ފުރުސަތުތައް ހޯދާފައެވެ.

މިމެޗް އެއްވަރުވުމުން އޭގެ ފައިދާ އެންމެ ރަނަގޅަށް ނެގީ ނޭޕާލްއެވެ. ނޭޕާލަށް ސެމީގެ ޖާގައެއް ކަށަވަރުވިއިރު، މުބާރާތުެގ ކުރިއަށް ދިއުމުގެ އަމިއްލަ ބާރު ރާއްޖެއަށް ވަނީ ގެއްލިފައެވެ. މުބާރާތުގެ ފުރަތަމަ މެޗްގައި އަވައްޓެރި ސްރީލަންކާ އާ ދެކޮޅަށް ކުޅުނުމެޗުން ރާއްޖެ ވަނީ 3-2 ބަލިވެފައެވެ.