ސުންނީ އަދި ޝީޢީ މަޒުހަބީ ތަޢައްޞުބްގެ ތެރެއަށް ރާއްޖޭގެ މުޖުތަމަޢު ވެއްޓިގެން ދިޔުމުގެ އެއްވެސް ފުރުޞަތެއް ދެވިގެން ނުވާނެ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

މީޑިއާ ތަކަށް ފޮނުއްވި މެސެޖެއްގައި ވަޒީރު ވިދާޅުވީ، ދިވެހި ރައްޔިތުންނަކީ ސުންނަތް ޖަމާޢަތުގެ ޞައްޙަ މަތިވެރި ޢަޤީދާގެ މަތީގައި، ކީރިތި ޤުރުއާނާއި ކައު އިތުރު ރަސޫލާގެ ސުންނަތާއި ސަލަފުއްޞާލިޙުންގެ މަންހަޖުގައި އެތައް ޤަރުނެއް ވަންދެން ސާބިތުކަމާއެކު ދެމިތިބި ބައެއް ކަމަށެވެ. އަދި ދިވެހިންނަކީ އަބަދުވެސް އިސްލާމްދީނުގެ ވަސަޠީ އުޞޫލުތަކުގައި ހިފަހައްޓައިގެން ތިބި ބައެއްކަން ފާހަގަކުރެއްވިއެވެ.

"އިންޝާ الله، ސުންނަތް ޖަމާޢަތުގެ މަތިވެރި ޢަޤީދާގައި ރާއްޖެ ދެމިއޮންނާނެ. މި އަސާސް ދެމެހެއްޓުމަށް ރާއްޖޭގެ އެންމެހާ ރައްޔިތުންނާއި ޢިލްމުވެރިންގެ އަރިހުން އަޅުގަނޑު އެދެން،" ޑރ. ޝަހީމް ވިދާޅުވިއެވެ.

މީގެ އިތުރުން، ރާއްޖޭގެ ދީނީ އެއްބައިވަންތަކަމަށް އެއްވެސް ފަދަ ލޮޅުމެއް އަރާފާނެ ކަމަކަށް ޖާގަ ނުދެއްވުމަށް ވަޒީރު ވަނީ އިލްތިމާސްކުރައްވާފައެވެ. އަދި އެކި ފިރުޤާތަކުގެ ޢަޤީދާތަކާ ގުޅޭ ޢިލްމީ ޙަޤީޤަތްތައް އޮޅޭނެ ފަދަ ގޮތްގޮތަށް މަޢުލޫމާތު ނުފެތުރުމަށްވެސް އެމަނިކުފާނު ނަސޭޙަތްތެރިވެލެއްވިއެވެ.

ޑރ. ޝަހީމް އިތުރަށް ވިދާޅުވީ، ދީނީ ފިކުރީ ގޮތުން އިސްލާމީ މުޖުތަމަޢު ބައިބައިކޮށްލުމަށް އިސްލާމްދީނުގެ ދުޝްމަނުން ކުރަމުންދާ މަސައްކަތްތަކާ މެދު މުޅި މުޖުތަމަޢު ސަމާލުވާން ޖެހޭ ކަމަށެވެ.

އަދި ފިރުޤާތަކުގެ ޢަޤީދާތަކާ ގުޅޭ ނާޒުކު މައުޟޫޢުތަކުގައި، އެކަމުގެ ފުރިހަމަ ޢިލްމު ލިބިގެންވާ ޢިލްމުވެރިން ނޫނީ ވާހަކަ ނުދެއްކުމަށް ވަޒީރު ވަނީ އެދިވަޑައިގެންފައެވެ.

ޝަހީމް މިފަދައިން ވިދާޅިވެފައިވާއިރު، އީރާން ހަނގުރާމައާއި ގުޅިގެން ސުންނީ ޝިޢައީ މަޒުހަބުގެ ބަހުސް މިފަހުން ވަނީ ވަރަށް ގަދަޔަށް ކުރެވެމުންނެވެ.