އިރާނާ ދެކޮޅަށް އެމެރިކާ އާއި އިސްރާއީލުން ކުރަމުންދާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގަށް އަންނަމުންދާ ބަދަލުތަކާއެކު، އޮސްޓްރޭލިއާގެ ރައްޔިތުންނަށް ދިމާވެފައިވާ ދަތިތަކަށް ލުޔެއް ހޯދައިދިނުމަށްޓަކައި އެ ގައުމުގެ ސަރުކާރުން ތެލުން ނަގާ ޓެކްސް ކުޑަކުރުމަށް ނިންމައިފިއެވެ.

އޮސްޓްރޭލިއާގެ ބޮޑުވަޒީރު އެންތަނީ އަލްބަނީޒީ ވިދާޅުވީ، ޕެޓްރޯލާއި ޑީސަލުން ނަގާ އެކްސައިޒް ޑިއުޓީ ދެބައިކުޅަ އެއްބަޔަށް ކުޑަކުރުމަށް ސަރުކާރުން ނިންމާފައިވާ ކަމަށެވެ. މި ބަދަލާއެކު ތެޔޮ ލިޓަރަކުން 26.3 ސެންޓް (0.18 ޑޮލަރު) ހެޔޮވާނެއެވެ. 

"އަޅުގަނޑުމެން މިއަދު ތެޔޮ އަގުހެޔޮ މިކުރަނީ އޮސްޓްރޭލިއާގެ ރައްޔިތުން ތިބީ ވަރަށް ބޮޑު ތާށިކަމެއްގެ ތެރޭގައިކަން އަޅުގަނޑުމެންނަށް ގަބޫލުކުރެވޭތީ،" ބޮޑުވަޒީރު ވިދާޅުވިއެވެ.

މި ނިންމުމަށް އަންނަ ބުދަ ދުވަހުން ފެށިގެން އަމަލުކުރަން ފަށާނެ ކަމަށާއި، މި ލުއިތައް މަދުވެގެން ތިން މަސް ދުވަހުގެ މުއްދަތަށް ދެމިއޮންނާނެ ކަމަށް ސަރުކާރުން ހާމަކުރެއެވެ.

އޮސްޓްރޭލިއާގެ ޓްރެޜަރަރ ޖިމް ޗާމާސް ވިދާޅުވީ، މި ޓެކްސް ކުޑަކުރުމުގެ ސަބަބުން 65 ލިޓަރުގެ ތެޔޮ ޓޭންކަކުން ގާތްގަނޑަކަށް 19 އޮސްޓްރޭލިއަން ޑޮލަރު (13 ޑޮލަރު) އުނިވާނެ ކަމަށެވެ. މިއީ ދިރިއުޅުމުގެ ހަރަދުތަކަށް ލިބިގެންދާނެ ބޮޑު ލުޔެއްކަން ފާހަގަކުރައްވަމުން އޭނާ ވިދާޅުވީ، މިއީ ވަގުތަށް ބޭނުންތެރި، އަދި ޒިންމާދާރު ނިންމުމެއް ކަމަށެވެ.

މީގެ އިތުރުން، ބަރު އުޅަނދުފަހަރު ދުއްވާ ފަރާތްތަކަށް ލުއިދިނުމަށްޓަކައި 'ހެވީ ވެހިކަލް ރޯޑް ޔޫސަރ ޗާޖު' ވެސް މި މުއްދަތަށް ސުމަކަށް ދަށްކުރުމަށް ވަނީ ނިންމާފައެވެ. މި ހުރިހާ ފިޔަވަޅުތަކަށް ސަރުކާރުން 2.55 ބިލިއަން ޑޮލަރު ހޭދަވާނެ ކަމަށް ލަފާކުރެވެއެވެ.

ބޮޑުވަޒީރު އަލްބަނީޒީ އިތުރަށް ވިދާޅުވީ، އިރާނު ހަނގުރާމައިގެ މަގްސަދުތަކާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕްގެ ފަރާތުން ސާފު ޖަވާބުތަކެއް ބޭނުންވާ ކަމަށެވެ.

"އަޅުގަނޑު ބޭނުންވަނީ މަސްރަހު ފިނިވާން. މަސްރަހު ފިނިވުމަކީ ދުނިޔޭގެ އިގްތިސާދަށް އެންމެ ފައިދާހުރި ގޮތް،" އޭނާ ވިދާޅުވިއެވެ.

މި ނިންމުންތައް ނިންމާފައިވަނީ އޮސްޓްރޭލިއާގެ ސްޓޭޓްތަކާއި ޓެރިޓަރީތަކުގެ ލީޑަރުންނާއެކު ބޭއްވި ނޭޝަނަލް ކެބިނެޓް ބައްދަލުވުމަކަށްފަހުގައެވެ. މި ބައްދަލުވުމުގައި ތެލުގެ ސަޕްލައި ކަށަވަރުކުރުމަށް ހަތަރު މަރުހަލާއެއްގެ އެކްޝަން ޕްލޭނަކަށް ވަނީ އެއްބަސްވެފައެވެ. އޮސްޓްރޭލިއާ މިހާރު އޮތީ މި ޕްލޭންގެ ދެވަނަ މަރުހަލާގައެވެ. ތެލުގެ ދަތިކަން އިންތިހާއަށް ބޮޑުވެއްޖެނަމަ، ހަތަރުވަނަ މަރުހަލާގައި ތެޔޮ ކޮންޓްރޯލްކޮށްގެން ދޫކުރުން ނުވަތަ 'ރޭޝަނިންގް' އަށް ދާންޖެހިދާނެ ކަމުގެ އިޝާރާތެއް ވެސް ސަރުކާރުން ވަނީ ދީފައެވެ.