އިންޑޮނޭޝިއާގެ އުތުރު މޮލުކާ ކަނޑުގެ ސަރަހައްދަށް، ޚާއްޞަކޮށް ޓަރނޭޓް ސިޓީގެ އައްސޭރިފަށާ ކައިރިއަށް ރިކްޓަރ މިންގަނޑުން 7.4 ގެ ބާރުގަދަ ބިންހެލުމެއް އަތުވެއްޖެއެވެ.

މި ހާދިސާގައި މިހާތަނަށް އެކަކު މަރުވެފައިވާކަން ކަށަވަރުވެފައިވާއިރު، ބިންހެލުމާ ގުޅިގެން ނެރުނު ސުނާމީގެ އިންޒާރު މިހާރު ވަނީ އުވާލާފައެވެ.

އަދި ބިންހެލުމުގެ ސީދާ ނުރައްކާ ރާއްޖެއަށް ނުކުރާނެ ކަމަށް މެޓް އޮފީހުން ވަނީ ބުނެފައެވެ. 

ޔޫއެސް ޖިއޮލޮޖިކަލް ސަރވޭއިން ބުނި ގޮތުގައި، މިއަދު ނއައި މި ބިންހެލުން އެންމެ ފުރަތަމަ ރެކޯޑުކުރެވުނީ 7.8 ގެ ބާރުމިނުގައެވެ. ނަމަވެސް ފަހުން އެއީ 7.4 މެގްނިޓިއުޑްގެ ބިންހެލުމެއް ކަމަށް ވަނީ ކަނޑައަޅާފައެވެ. މި ބިންހެލުން އައިސްފައިވަނީ ބިމުގެ 35 ކިލޯމީޓަރު (22 މޭލު) އަޑިންނެވެ. ބިންހެލުމުގެ މަރުކަޒު ހުރީ އުތުރު މަލުކޫ ޕްރޮވިންސްގެ ޓަރނޭޓް ސިޓީއާ ގާތްގަނޑަކަށް 120 ކިލޯމީޓަރު (75 މޭލު) ދުރުގައެވެ.

މި ބިންހެލުމާ ގުޅިގެން ޓަރނޭޓް އަދި ޓިޑޯރ ފަދަ ސިޓީތަކުގެ ކަމާބެހޭ ފަރާތްތަކުން ވަނީ ރައްޔިތުން ރައްކާތެރި ސަރަހައްދުތަކަށް ބަދަލުވުމަށް ތައްޔާރުވުމަށް އިރުޝާދު ދީފައެވެ. އިންޑޮނޭޝިއާގެ މީޑިއާތަކުން ދައްކާފައިވާ މަންޒަރުތަކުން ފެންނަ ގޮތުގައި ބައެއް އިމާރާތްތަކަށް ވަނީ ބޮޑެތި ގެއްލުންތަކެއް ލިބިފައެވެ.

އުތުރު ސުލަވެސީ ޕްރޮވިންސްގެ މަނާޑޯ ސިޓީގައި އިމާރާތެއް ވެއްޓުމުގެ ސަބަބުން އެކަކު މަރުވެފައިވާ ކަމަށް އެ ސަރަހައްދުގެ ސާޗް އެންޑް ރެސްކިއު އޮފިޝަލަކު ވަނީ އޭއެފްޕީ ނިއުސް އެޖެންސީއަށް ކަށަވަރުކޮށްދީފައެވެ. "މަނާޑޯ ސަރަހައްދަށް ބިންހެލުމުގެ އަސަރު ވަރަށް ބޮޑަށް ކުރި. އިމާރާތެއްގެ ދަށުވެގެން އެކަކު މަރުވެފައިވާއިރު، އިތުރު މީހެއްގެ ފަޔަށް ވަނީ އަނިޔާވެފައި،" އޮފިޝަލް ޖޯޖް ލިއޯ މާސީ ރަންޑަންގް ވިދާޅުވިއެވެ.

ބިންހެލުމާ ގުޅިގެން ހަވާއީގައި ހުންނަ ޕެސިފިކް ސުނާމީ ވޯނިންގ ސެންޓަރު  އިން އެންމެ ފުރަތަމަ އިންޒާރު ދިނީ ބިންހެލުން އައި ސަރަހައްދުން ފެށިގެން 1،000 ކިލޯމީޓަރުގެ ރޭޑިއަސްއެއްގައި ހިމެނޭ އިންޑޮނޭޝިއާ، ފިލިޕީންސް އަދި މެލޭޝިއާގެ އައްސޭރިފަށަށް ނުރައްކާތެރި ސުނާމީއެއް އެރުމުގެ ފުރުސަތު އޮތް ކަމަށެވެ.

އިންޑޮނޭޝިއާގެ ޖިއޮލޮޖިކަލް އެޖެންސީއިން ބުނި ގޮތުގައި، ބިންހެލުން އައިތާ ބައިގަޑިއިރެއްހާއިރު ތެރޭގައި އުތުރު މިނަހާސާ ސަރަހައްދަށް 75 ސެންޓިމީޓަރުގެ ރާޅު އަދި ބިޓުންގް ސަރަހައްދަށް 20 ސެންޓިމީޓަރުގެ ރާޅު ވަނީ އަރާފައެވެ. މީގެ އިތުރުން އުތުރު މަލުކޫ ޕްރޮވިންސަށް 30 ސެންޓިމީޓަރުގެ ރާޅު އަރާފައިވާ ކަމަށް ރެކޯޑުކުރެވިފައިވެއެވެ.

ނަމަވެސް، ބިންހެލުން އައިތާ ދެ ގަޑިއިރު ފަހުން ޕެސިފިކް ސުނާމީ ވޯނިންގ ސެންޓަރުން ވަނީ ސުނާމީގެ ނުރައްކާ މިހާރު ފާއިތުވެފައިވާ ކަމަށް ބުނެ އިންޒާރު އުވާލާފައެވެ.

އިންޑޮނޭޝިއާއަކީ ދުނިޔޭގެ "ޕެސިފިކް ރިންގް އޮފް ފަޔަރ" ގައި އޮންނަ ގައުމަކަށް ވުމުން، އެ ގައުމަކީ އާންމުކޮށް ބިންހެލުންތަކާއި އަލިފާން ފަރުބަދަ ގޮވުމުގެ ހާދިސާތައް ހިނގާ ސަރަހައްދެކެވެ.