މާދަމާ އޮންނަ އިންތިހާބުގައި ވާދަކުރާ ޕީއެންސީގެ ކެންޑިޑޭޓުންނަަށް ވޯޓް ދެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އިލްތިމާސް ކުރައްވައިފި އެވެ.
ރައީސް މިކަމަށް އިލްތިމާސް ކުރެއްވީ ޕީއެންސީގެ ކެމްޕެއިން ނިންމާލުމުގެ ގޮތުން މިއަދު ބޭއްވި ހިނގާލުމަށް ފަހު ރަސްފަންނުގައި އޮތް ޖަލްސާގައި ވާހަކަފުޅު ދައްކަވަމުންނެވެ. އެތައް ސަތޭކަ ބަޔަކު ބައިވެރިވި ހިނގާލުމަށް ފަހު އޮތް ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ މާދަމާ ނިންމަން އޮތީ ސިޔާސީ ނިންމުމެއް ނޫން ކަމަށެވެ. މާދަމާގެ ވޯޓްގައި ގައުމީ މަސްލަހަތުގައި އިސްކުރުމަށް ވެސް އިލްތިމާސް ކުރެއްވި އެވެ.
ރައީސް ވިދާޅުވީ ޕީއެންސީގެ ކެންޑިޑޭޓުން ނިކުމެ ތިިބީ ގައުމީ ވިސްނުމުގައި ކަމަށެވެ. އެހެން ކަމުން ހުރިހާ ރައްޔިތުން ގައުމީ ވިސްނުމުގައި ވޯޓް ދިނުމަށް އިލްތިމާސް ކުރެއްވި އެވެ.
"ތިބޭފުޅުން އަޅުގަނޑުމެންނަށް އިތުބާރުކޮށް ދެއްވާ ވޯޓް ވެގެންދާނީ ތިބޭފުޅުން ފަޚުރުވެރިވާ ވޯޓަކަށް. އޭގެ ނަތީޖާ އަޅުގަނޑުމެން ނެރެދޭނެ ވޯޓަކަށް. ރައްޔިތުންގެ ތެރެއިން އެއްވެސް މީހަކު މާޔޫސްވާނެ ވޯޓަކަށް ވެގެންނުދާނެ ވޯޓަކަށް," ރައީސް ވިދާޅުވި އެވެ.
ރައީސް ވިދާޅުވީ ޕީއެންސީގެ ކެންޑިޑޭޓުން ނިކުމެ ތިބީ ސަރުކާރުގެ ތަރައްގީގެ ސިޔާސަތު ދަމަހައްޓަން ކަމަށެވެ. އަދި އެ ކެންޑިޑޭޓުން ވާނީ ހުރިހާ ގޮތަކުން ރަށްރަށުގެ ތަރައްގީއަށް މަސައްކަތް ކުރާނެ ބަޔަކަށް ކަމުގައި ވިދާޅުވި އެވެ.
"ވަރަށް އިހްލާސްތެރިކަމާއެކު ގައުމީ ވިސްނުމުގައި އަޅުގަނޑު މި ގޮވާލަނީ އަޅުގަނޑުމެންގެ ދޫނިތަކަށް ވޯޓް ދޭށޭ," ރައީސްގެ ފަހުގެ އިލްތިމާސްގެ ގޮތުގައި ވިދާޅުވި އެވެ.
Advertisement
This content is created and paid for by advertisers and does not involve Voice Journalists
