ބައި ބިލިއަން ޑޮލަރުގެ ސުކޫކްގެ އަގު އެއްފަހަރާ އަދާކުރުމާއެކު ކުރީ ސަރުކާރުން ރަހުނުކުރި ދައުލަތުގެ މުހިންމު ތަންތަން މިނިވަން ވެގެން ގޮސްފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވި އެވެ.

ފިނޭންސް މިނިސްޓްރީން އިއްޔެ ވަނީ، ސޮވެރިން ޑިވެލޮޕްމެންޓު ފަންޑާއި، ރިޒާވްގައި ރައްކާކޮށްފައި ހުރި ފައިސާ ބޭނުންކޮށްގެން ރާއްޖެއިްނ އަދާކުރަންޖެހޭ 500 މިލިއަން ޑޮލަރުގެ ސުކޫން ދައްކައި ހަލާސްކޮށް ނިންމިކަން ހާމަކޮށްފައެވެ.

މިއަދު އޮތް ރެލީގައި ވާހަކަފުޅު ދައްކަަވަމުން ރައީސް ވިދާޅުވީ ކުރީ ސަރުކާރުން ލޯނު ނެގީ ދައުލަތުގެ މުހިންމު ތަންތަން ރަހުނުކުރުމަށް ފަހު ކަމަށެވެ. އޭގެ ތެރޭގައި ދަރުމަވަންތަ ހޮސްޕިޓަލާއި އައިޖީއެމްއެޗާއި ފިނޭންސް ބިލްޑިން ހިމެނޭ ކަމުގައި ވިދާޅުވި އެވެ.

ރައީސް ވިދާޅުވީ މިދިޔަ ސަރުކާރުން ބޮޑެތި އަދަދުތަކުން ލޯނު ނެގީ މާލީގޮތުން އެއްވެސް ފައިދާއެއް ނެތް ކަންކަމުގައި ކަމަށެވެ. އަދި ވިދާޅުވީ ބޮޑު ދަރަނި މި ސަރުކާރުން އިއްޔެ ދެއްކީ އެންމެ ފައިސާ ފޮއްޗެއް ވެސް ޗާޕުނުކޮށް ގައުމުގެ އިގްތިސާދު ހަމަ ޖައްސަމުން ކަމަށެވެ.

"ނެގި ސުކޫކު, އަޅުގަނޑުމެންގެ ޤައުމު ދަރުވާނުލާ, އަޅުގަނޑުމެންގެ ރައްޔިތުންނަށް ލިބޭ އެއްވެސް އެއްޗެއް އިނާޔަތެއް އުނިކޮށް, އެއްވެސް ފައިސާ ފޮއްޗެއް ޗާޕުނުކޮށް ރެކޯޑް އަދަދެއްގެ ޤައުމީ ރިޒާވް ހާސިލުކުރުމަށް ފަހު އިއްޔެ އިރާދަކުރެއްވިއްޔާ އަޅުގަނޑުމެން ދައްކާ ޚަލާސް ކޮށްފިން," ރައީސް ވިދާޅުވި އެވެ.