ސަރުކާރުން ރަނގަޅު ކުރަންޖެހޭ ކަންކަން، ރައްޔިތުންގެ ވިންދާ އެއްގޮތަށް ރަނގަޅުކުރުމަށް ކުރަންޖެހޭ މަސައްކަތްތައް ކުރިއަށް ގެންދާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ އެކްސްގައި ދެންމެ ކުރެއްވި ޕޯސްޓެއްގަ އެވެ. މިފަދަ މޭރުމަކުން އެމަނިކުފާނު ޕޯސްޓެއް ކުރެއްވީ މިއަދު އޮތް ތިން އިންތިހާބުގައި ވެސް ސަރުކާރުން އުންމީދުކުރި ފަދަ ނަތީޖާއެއް ނުލިބި ވަނިކޮށެވެ.
އެ ޕޯސްޓްގައި ރައީސް ވިދާޅުވީ މިއަދު ބޭއްވުނު ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓުގެ ނަތީޖާ އިޙްތިރާމާއެކު ބަލައިގަންނަ ކަމަށެވެ. އަދި މިއިންތިހާބު ކާމިޔާބު ކުރެެއްވި ހުރިހާ ފަރާތްތަކަށް ތަހްނިޔާ ވިދާޅުވި އެވެ.
ރައީސުލްޖުމްހޫރިއްޔާގެ ޕޯސްޓްގައި އެމަނިކުފާނު ވަނީ ސަރުކާރުން ރަނގަޅު ކުރަންޖެހޭ ކަންކަން، ރައްޔިތުންގެ ވިންދާ އެއްގޮތަށް ރަނގަޅުކުރުމަށް ކުރަންޖެހޭ މަސައްކަތްތައް މާތްالله ގެ ވާގިފުޅާއެކު ކުރިއަށްގެންދާނެ ކަމުގެ ޔަގީންކަން ދިވެހި ރައްޔިތުންނަށް ވެސް ދެއްވާފަ އެވެ.
މިއަދު އޮތް އިންތިހާބުގައި ފެންނަ ނުފެންނަ ވޯޓްގެ ނަތީޖާ އައީ ސަރުކާރުގެ ވިސްނުމާއި ދެކޮޅަށެވެ. ސިޓީތަކުން ވެސް ވަނީ ނާކާމިޔާބީއާ ކުރިމަތިލާން ޖެހިފަ އެވެ. ކައުންސިލް ގޮނޑިތައް ބެހެމުން ދަނީ ދެ ޕާޓީއަށް ވަރަށް ހަމަހަމަ ކޮށެވެ.
Advertisement
This content is created and paid for by advertisers and does not involve Voice Journalists
