ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްދުވަހެއްގައި ބޭއްވުމާ ގުޅޭގޮތުން އިއްޔެ ނެގުނު ފެންނަ ނުފެންނަ ވޯޓުގައި ރައްޔިތުން ”ނޫނެކޭ“ ބުނީ އިސްލާހީ ބަދަލުތަކަށް ނޫން ކަމަށް ކުރީގެ އިކޮނަމިކް މިނިސްޓަރު އަދި އެސްޓީއޯގެ ކުރީގެ މެނޭޖިންގ ޑިރެކްޓަރު އަޙުމަދު މުޙައްމަދު ވިދާޅުވެއްޖެއެވެ.

އިއްޔެ ބޭއްވުނު ފެންނަ ނުފެންނަ ވޯޓުގައި ބޮޑު ތަފާތަކާއެކު ކުރި ހޯދީ ދެ އިންތިޚާބު އެއްދުވަހެއްގައި ބޭއްވުމާ ދެކޮޅަށް ނިންމި ނިންމުމެވެ.

އެކަމާ ގުޅިގެން އަހުމަދު އެކްސްގައި ކުރެއްވި ޕޯސްޓެއްގައި ވިދާޅުވީ، ބޮޑު އަޣުލަބިއްޔަތަކުން ރައްޔިތުން "ނޫނެކޭ" ބުނެ ނިންމި ނިންމުމަކީ، އިސްލާޙީ ބަދަލުތަކާ ދެކޮޅަށް ދިން ވޯޓެއް ނޫން ކަމަށެވެ. އެހެނެއް ކަމަކު އެއީ ހިންގުން ހަރުދަނާކޮށް، ޖަވާބުދާރީކުރުވުން އިތުރުކުރެވޭނެ ފަދަ ބަދަލުތަކަށް އެދި ރައްޔިތުން ގޮވާލި ގޮވާލުމެކެވެ.

އަދި ދައުލަތުގެ ބާރުތައް ވަކިވެފައި އޮތުމުގެ މުހިންމުކަމާއި، ސަރުކާރު ޖަވާބުދާރީކުރުވުމުގައި މަޖިލީހުގެ ދައުރު ހަރުދަނާކުރުމަށް ރައްޔިތުން އެދޭކަން މި ނިންމުމުން ހާމަވާ ކަމަށް އޭނާ ވިދާޅުވިއެވެ.

"ފުރިހަމަ ޑިމޮކްރަސީއެއްގެ އެންމެ މުހިންމު ސިފައަކީ، އިންތިޚާބުތަކުގެ މެދުގައި ހޭދަވާ މުއްދަތުގައި ވެސް ޒިންމާދާރުކަމާއެކު ކަންކަން ހިނގަމުންދިއުމާއި ޖަވާބުދާރީކުރުވުމުގެ ނިޒާމު ވަރުގަދަކޮށް އޮތުން،" އަޙުމަދު މުޙައްމަދު ލިޔުއްވާފައިވެއެވެ.

މިއާއެކު އޭނާ ވަނީ ޤައުމީ ފެންވަރުގެ މި ނިންމުމުގައި ބައިވެރިވެ، ބަސްބުނި ހުރިހާ ރައްޔިތުންނަށް ޝުކުރު އަދާކުރައްވާފައެވެ.

އިންތިޚާބުތައް އެއްދުވަހެއްގައި ބޭއްވުމުން ޚަރަދު ކުޑަވާނެ ކަމަށް ދެކެވޭ ވާހަކަތަކަށް ރައްދު ދެއްވަމުން މީގެ ކުރިން އޭނާ ވިދާޅުވީ، ދެ އިންތިޚާބު އެއްކުރިޔަސް މުވައްޒަފުންނާއި އިދާރީ އިންތިޒާމުތައް މަދު ނުވާނެ ކަމަށެވެ. ދިރާސާތަކުން ދައްކާ ގޮތުގައި މިކަމުން ސަލާމަތް ކުރެވެނީ ޖުމްލަ ޚަރަދުގެ ހަތަރުބައިކުޅަ އެއްބައި ކަމަށްވާ ގާތްގަނޑަކަށް 40 މިލިއަން ރުފިޔާއެވެ. މިއީ ފަސް އަހަރަށް ބަހާލުމުން އަހަރަކަށް 8 މިލިއަން ރުފިޔާ ކަމަށާއި، ކޮންމެ ދިވެހި ރައްޔިތެއްގެ ބޮލަކަށް ޖެހެނީ އެންމެ ފަސްލާރި ކަމަށް އޭނާ ހިސާބުތަކުން ދެއްކެވިއެވެ.

އަޙުމަދު މުޙައްމަދު އިތުރަށް ވިދާޅުވީ، އެކަން ކުރުމުން އިޤްތިޞާދީ ގޮތުން ބޮޑު ޚަރަދެއް ސަލާމަތްކުރެވޭނެ ކަމަށް ބުނާ ވާހަކައަކީ "ބުހުތާނު ދޮގެއް" ކަމަށެވެ. އޭނާ ތުހުމަތު ކުރެއްވި ގޮތުގައި މި ބަދަލުން މަންފާ ކުރަނީ ރައްޔިތުންނަކަށް ނޫނެވެ؛ އޭގެ ބަދަލުގައި ފައިދާ ވަނީ ސިޔާސީ މީހުންނަށެވެ. އެއީ ވޯޓު ގަތުމަށާއި އެހެނިހެން ކަންކަމަށް ރައްޔިތުންގެ ގާތަށް ދެފަހަރު ދިއުމުގެ ބަދަލުގައި އެއްފަހަރު ދާންޖެހޭތީ ކަމަށް އޭނާ ވިދާޅުވިއެވެ.

ރާއްޖޭގެ ގިނަ ސިޔާސީ ޕާޓީތަކުން މިކަމަށް ތާއީދުކުރީ އެމީހުންގެ އަމިއްލަ ފައިދާއަށްޓަކައި ކަމަށާއި، ރައްޔިތުންނަށް މަންފާވާނެ ކަމަށް ބުނެ ދައްކާ ވާހަކަތަކަކީ ހަޤީޤަތް ފޮރުވުމަށް ދައްކާ ވާހަކަތަކެއް ކަމަށް އޭނާ ފާހަގަކުރެއްވިއެވެ.