ހޮނިހިރު ދުވަހު ބޭއްވި ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި އއ. އުކުޅަހުން ޕީއެންސީއަށް ތިބުނު ތާރީޚީ ކާމިޔާބީ ހަވަޔާއެކު ކުލަގަދަކޮށް ފާހަގަކޮށްފިއެވެ.

ރާއްޖޭގައި ސިޔާސީ ޕާޓީތައް އުފެދުނު ފަހުން އެމްޑީޕީއަށް ބޮޑު ތާއީދެއް އޮންނަ އުކުޅަހުގައި މީގެ ކުރިން އަބަދުވެސް ކައުންސިލް މެޖޯރިޓީ ނަގަނީ އެމްޑީޕީންނެވެ. ނަމަވެސް މިފަހަރުގެ އިންތިޚާބުތަކުގައި އުކުޅަހުންވަނީ އެމްޑީޕީއަށް ބޮޑުތަނުން ނޫނެކޭ ބުނެ އެންމެ ގޮނޑިއެއް ފިޔަވައި ހުރިހާ ގޮނޑިއެއް ވެރިކަންކުރާ ޕީއެންސީއަށް ދީފައެވެ. 

އެކަން ފާހަގަކުރަން ރޭ އުކުޅަހުގައި ބޭއްވި ކުލަގަދަ ހަފްލާގައި، ކޭކުފަޅައި، ހަވާ އަރުވައި އުކުޅަހުގެ ޕީއެންސީ މެންބަރުންނަށް ބޮޑު ޖާފަތެއްވެސް ދީފައިވެއެވެ. އެ ރަސްމިއްޔާތުގައި އުކުޅަހަށް ނިސްބަތްވެވަޑައިގަންނަވާ ކުޅިވަރާބެހޭ ވަޒީރު އަބްދުالله ރާފިޢު ވެސް ބައިވެރިވެވަޑައިގެންނެވިއެވެ. 

މި އިންތިހާބުގެ ނަތީޖާތަކަށް ބަލާއިރު، އެމްޑީޕީގެ ޓިކެޓުގައި ހަތަރު ވަނަ ދައުރަކަށް ކައުންސިލް ރައީސް ކަމަށް ވާދަކުރެއްވި މިހާރުގެ ވެސް ރައީސް ޝައުކަތަށް ލިބިވަޑައިގަތީ 307 ވޯޓެވެ. ޕީއެންސީގެ ކެންޑިޑޭޓު އަލީ ވަހީދު މި ގޮނޑި ކާމިޔާބު ކުރެއްވީ 380 ވޯޓާއެކުގައެވެ.

މިއާއެކު 390 ވޯޓާއެކު ކައުންސިލް މެންބަރު ކަމުގެ ގޮނޑި ޕީއެންސީގެ މުހައްމަދު ޝަފްރާޒް ކާމިޔާބުކުރެއްވިއިރު، އޭނާއާ ވާދަކުރެއްވި އެމްޑީޕީގެ މުހައްމަދު ހުސްނީއަށް ލިބިވަޑައިގަތީ 282 ވޯޓެވެ.

މީގެ އިތުރުން، އެމްޑީޕީ ފާތުމަތު ރަނިއްޔާއާ ވާދަކޮށް 347 ވޯޓާއެކު ކައުންސިލްގެ އަންހެނުންނަށް ހާއްސަ ގޮނޑި ކާމިޔާބު ކުރެއްވީ ޕީއެންސީގެ އައިމިނަތު ޒޫނާއެވެ.

އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި ވެސް ޕީއެންސީން ވަނީ ބޮޑު ކާމިޔާބީއެއް ހޯދާފައެވެ. އެގޮތުން އެ ކޮމިޓީގެ ރައީސަކަށް އިންތިހާބުވީ ޕީއެންސީގެ ސަޖިއްޔާ ސާޖިދު ސައީދެވެ. އަދި މި ކޮމިޓީގެ މެންބަރު ކަމަށް އިންތިހާބުވީ ޕީއެންސީގެ ބަސީރާ އަހުމަދާއި އެމްޑީޕީގެ ޝަޖުނާ މުހައްމަދެވެ.