ޓްރަމްޕް އެދިވަޑައިގަންނަވާ ގޮތަށް ކަނޑުއޮޅި ހުޅުވަން ބޭނުންވި ނަމަވެސް، އެތަން ހުޅުވަން ބޭނުންވާ "ތަޅުދަނޑި" މިވަގުތު އޮތީ ގެއްލިފައި ކަމަ ޒިމްބާބްވޭގައި ހުންނަ އީރާނުގެ އެމްބަސީއިން ޓްރަމްޕްއަށް މަލާމަތްކޮށް ބުނެފިއެވެ.

މިއީ ސީދާ ޓްރަމްޕްގެ ސިޔާސަތުތަކަށާއި އޭނާ ކުރައްވާ އަމުރުތަކަށް ގޮންޖަހައި، ބައިނަލްއަޤްވާމީ މައިދާނުގައި އެމެރިކާގެ ނުފޫޒު ކުޑަކޮށްލުމަށް ދިން ބަހުގެ ހަމަލާއެކެވެ. އީރާނުން މިމޭރުމުން ވާހަކަ ދެއްކީ ހޯރްމުޒް ކަނޑުއޮޅީގެ ކޮންޓްރޯލް އެގައުމުގެ އަތްމަތީގައި އޮތްކަން ހަނދާންކޮށްދެމުންނެވެ.

ދުނިޔޭގެ ތެލުގެ ވިޔަފާރީގެ ބޮޑު ބައެއް ހިއްސާކުރާ ހޯރްމުޒް ކަނޑުއޮޅިއަކީ ސްޓްރެޓީޖިކް ގޮތުން ނުހަނު މުހިންމު ސަރަހައްދެކެވެ. ޓްރަމްޕް ވަނީ އެ ސަރަހައްދުން ދަތުރުކުރާ އުޅަނދުފަހަރަށް އެއްވެސް ހުރަހެއް ނެތި ދަތުރުކުރެވޭނެ މަގު ފަހިކޮށްދިނުމަށް ތަކުރާރުކޮށް ގޮވާލައްވާފައެވެ. ނަމަވެސް އީރާނުން ދެކޭގޮތުގައި އެމެރިކާއިން އެ ސަރަހައްދުގެ ކަންކަމާ ބެހުމަކީ ގައުމީ ސަލާމަތަށް އޮތް ނުރައްކަލެކެވެ.

މި "ޖޯކު" ނުވަތަ މަލާމާތުގެ ރައްދާ ގުޅިގެން ސޯޝަލް މީޑިއާގައި ގިނަ ބައެއްގެ ސަމާލުކަން ވަނީ ހުއްޓިފައެވެ. ބައެއް މީހުން ވިދާޅުވާ ގޮތުގައި އީރާނުން މިފަދަ އުސްލޫބެއް ބޭނުންކުރީ އެމެރިކާގެ ޑިޕްލޮމެސީއަކީ އެއްވެސް ބުރަދަނެއް ނެތް ކަމެއްކަން ދެއްކުމަށެވެ. އަދި ހޯރްމުޒް ކަނޑުއޮޅި ބަންދުކުރުމުގެ ބާރު އީރާނަށް ލިބިގެންވާކަން މި ޖުމްލައިން ދޭހަވާ ކަމަށްވެސް އެފަރާތްތަކުން ފާހަގަކުރެއެވެ.

އެމެރިކާގެ ވައިޓް ހައުސްއިން މިހާތަނަށް އީރާނުގެ މި ވާހަކަތަކަށް ރަސްމީކޮށް އެއްޗެއް ބުނެފައެއް ނުވެއެވެ. އެހެންނަމަވެސް، ޓްރަމްޕްގެ ސަރުކާރުން އަބަދުވެސް ބުނަމުންދަނީ ބައިނަލްއަޤްވާމީ ކަނޑުގެ ސަރަހައްދުތަކުގައި ދަތުރުފަތުރު ކުރުމުގެ މިނިވަންކަން ދެމެހެއްޓުމަށް ބޭނުންވާ ކޮންމެ ފިޔަވަޅެއް އެމެރިކާއިން އަޅާނެ ކަމަށެވެ. 

ކަނޑުއޮޅީގެ ތަޅުދަނޑި "ގެއްލިފައި" ވާކަމަށް ބުނެ އީރާނުން ދެއްކި ވާހަކައަކީ ކުރިއަށް އޮތް ތަނުގައިވެސް އެމެރިކާއަށް ދަތިތަކާ ކުރިމަތިލާން ޖެހޭނެ ކަމުގެ އިޝާރާތެއް ކަމަށް ބެލެވެއެވެ.