ރާއްޖޭގެ ސިއްޙީ ސިޔާސަތުތައް ބައްޓަންކުރުމުގައި ސައިންސާއި ދިރާސާގެ މައްޗަށް ބިނާވެފައިވާ ސަގާފަތެއް ގާއިމުކުރުމުގެ މުހިންމުކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފާހަގަކުރައްވައިފިއެވެ.
ދުނިޔޭގެ ސިއްޙަތު ދުވަހާ ގުޅިގެން ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި ވިދާޅުވީ، ދުނިޔޭގެ ސިއްޙަތު ރައްކާތެރިކުރުމުގައި ސައިންޓިފިކް އެއްބާރުލުން އިތުރުކުރުމަކީ ކޮންމެހެން ބޭނުންތެރި ކަމެއް ކަމަށެވެ.
އަދި "ވަން ހެލްތު" އިނީޝިއޭޓިވް ކުރިއަށް ގެންދިއުމުގައި ސައިންސަށް ބިނާވެފައިވާ އުސޫލުތައް އިސްކޮށް، މެޑިކަލް ރިސާޗް ނުވަތަ ސިއްޙީ ދިރާސާތަކަށް ކުރާ އިންވެސްޓްމަންޓްތައް އިތުރުކުރަންޖެހޭ ކަމަށް އެމަނިކުފާނު ވިދާޅުވިއެވެ.
ރާއްޖޭގެ ހާލަތަށް އަލިއަޅުއްވާލައްވަމުން ރައީސް މުޢިއްޒު ވިދާޅުވީ، ރާއްޖޭގައި ސިއްޙީ އިސްތިރާތީޖީތައް އެކުލަވާލަނީ ސައިންޓިފިކް މައުލޫމާތުގެ މައްޗަށް ބިނާކޮށް ކަމަށެވެ.
މީގެ އިތުރުން، ޑިޖިޓަލް ހެލްތު ފުޅާކުރުމާއި، ސިއްޙީ މައުލޫމާތު ބަދަލުކުރެވޭނެ ނިޒާމުތައް ގުޅާލުމާއި، ދުޅަހެޔޮ ދިރިއުޅުމަކަށް ބާރުއެޅުމުގެ އިތުރުން ބަލިތައް ކުރިއާލާ ދެނެގަތުމަށް ކުރާ މަސައްކަތްތައް ހަރުދަނާކުރަމުންދާ ކަމަށް އެމަނިކުފާނު ފާހަގަކުރެއްވިއެވެ.
ދުނިޔޭގެ ސިއްޙަތު ދުވަހުގެ ތަހުނިޔާ ފޮނުއްވަމުން ރައީސް ވަނީ މުޖުތަމައުގެ ސަލާމަތާއި ދުޅަހެޔޮކަމަށްޓަކައި ވަރުބަލިކަމެއް ނެތި މަސައްކަތް ކުރައްވާ ހުރިހާ ފަރާތްތަކަށް ޝުކުރު އަދާކުރައްވާފައެވެ. އަދި "ސިއްޙަތަށްޓަކައި އެކުގައި، އަދި ސައިންސާއެކު ސާބިތުވެ ތިބުމަށް" ހުރިހާ ފަރާތްތަކަކަށް ރައީސުލްޖުމްހޫރިއްޔާ ވަނީ ގޮވާލައްވާފައެވެ.
Advertisement
This content is created and paid for by advertisers and does not involve Voice Journalists
