ގަލްފް ޤައުމުތަކުގެ މެދުގައި މިހާރު ހިނގަމުންދާ ހަމަލާބަދަލުކުރުންތަކާ ގުޅިގެން މިިދިޔަ މަހު ރެކޯޑް މިންވަރަކަށް ފްލައިޓް ކެންސަލްވެފައިވާ ކަމަށް ޓޫރިޒަމް މިނިސްޓަރު ތޯރިގް އިބްރާހިމް ވިދާޅުވެއްޖެ އެވެ.
ތޯރިގް މިހެން ވިދާޅުވީ މެދުއިރުމައްޗާއި ގަލްފުގެ ހަމަނުޖެހުންތަކާ ގުޅިގެން ރާއްޖެއަށް ކުރިމަތިވާ ގޮންޖެހުންތަކުން އަރައިގަތުމަށް ކުރައްވާ މަސައްކަތްތަކުގެ އަދާހަމަ މަޢުލޫމާތު ދެއްވުމަށް މިއަދު ހަވީރު ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމުގައެވެ.
އެމެރިކާއާ އިޒްރޭލް އިސްވެ އީރާނަށް ހަމަލާދީ އީރާންގެ ވެރީން ޝަހީދުކޮށްލުމާއި ގުޅިގެން ފެށުނު ހަނގުރާމަ ދިގުލައި މުޅި ދުނިޔެ އޮތީ ބޮޑު ނުތަނަވަސް ކަމެއްގެ ތެރޭގަ އެވެ. ހަނގުރާމައިގެ އަސަރު ރާއްޖެފަދަ ގައުމުތަކަށް ވަރަށް ބޮޑަށް ދަނީ ކުރަމުންނެވެ. ރާއްޖެ އަންނަ ފަތުރުވެރީންގެ 30 އިންސައްތަ މެދުއިރުމައްޗާއި ގުޅިފައިވާއިރު ވަރަށް ގިނަ ފްލައިޓްތައް ކޮންމެ ދުވަހަކު ދަނީ ކެންސަލްވަމުންނެވެ.
މިނިސްޓަރު ތޯރިގް ވިދާޅުވި ގޮތުގައި މިދިޔަ މަހު އެވްރެޖްކޮށް ދުވާލަކު 20 ފްލައިޓް ކެންސަލްވި އެވެ. އަދި މުޅި މަހު 525 ފްލައިޓް ވަނީ ކެންސަލްވެފަ އެވެ. އެކަމުގެ ސަބަބުން ރާއްޖެ އަންނަން ބޭނުންވި އެތައް ހާސް ފަތުރުވެރީންނަށް ރާއްޖެ ނާދެވި ޓޫރިޒަމަށް ވަނީ ވަރަށް ބޮޑަށް އަސަރުކޮށްފަ އެވެ.
ތޯރިގް ވިދާޅުވި ގޮތުގައި މިހާތަނަށް ކުރެވުނު މަސައްކަތުން ކެންސަލްވާ ފްލައިޓްތަކުގެ އަދަދު މިހާރު ވަނީ ކުޑަތަންކޮޅެއް މަދުކުރެވިފަ އެވެ. މިހާރު އެވްރެޖްްކޮށް ކެންސަލްވަމުން ދަނީ ދުވާލަކު 16 ފްލައިޓް ކަމުގައި ވިދާޅުވި އެވެ. ނަމަވެސް މިއީ ވެސް ވަރަށް މަތީ ނިސްބަތެއްކަން ފާހަގަ ކުރައްވާ މިނިސްޓަރު މިއަދު ވެސް ވިދާޅުވީ ޓޫރިޒަމަށް ލިބޭ ހީނަރުކަން ފޫބައްދަން ގިނަ މަސައްކަތްތަކެއް ކުރަމުން އަންނަ ކަމަށެވެ.
Advertisement
This content is created and paid for by advertisers and does not involve Voice Journalists
