ދުނިޔޭގެ ބާޒާރުގައި ސުމާރެއްނެތި އުފުލެމުންދިޔަ ތެލުގެ އަގުތައް ވަރަށް ބޮޑަށް ދަށަށް ގޮސް، ބައިނަލްއަގުވާމީ ހިއްސާގެ ބާޒާރުތަކަށް ބޮޑު ކުރިއެރުމެއް ލިބިއްޖެއެވެ.

މި ބަދަލު އައިސްފައިވަނީ އެމެރިކާ އާއި އީރާނާ ދެމެދު ދެ ހަފުތާގެ މުއްދަތަކަށް ހަމަލާ ބަދަލުކުރުން ހުއްޓާލުމަށާއި، ތެޔޮ އުފުލުމުގައި އެންމެ މުހިންމު ރާސްތާ ކަމަށްވާ ހޯމުޒް ކަނޑުއޮޅި އަލުން ހުޅުވާލުމަށް އެއްބަސްވުމާ ގުޅިގެންނެވެ.

މި އެއްބަސްވުމާއެކު، ބައިނަލްއަގުވާމީ ބާޒާރުގައި ބްރެންޓް ކުރޫޑްގެ އަގު 15.9 އިންސައްތަ ދަށަށް ގޮސް، ފީފާއެއްގެ އަގު މިހާރު ހުރީ 92.30 ޑޮލަރުގައެވެ. އަދި އެމެރިކާގެ ބާޒާރުގައި ތެލުގެ އަގު 16.5 އިންސައްތަ ދަށަށް ގޮސް، ފީފާއެއްގެ އަގު ވަނީ 93.80 ޑޮލަރަށް ތިރިވެފައެވެ.

ނަމަވެސް، މި އަގުތަކަކީ މިދިޔަ ފެބްރުއަރީ މަހުގެ 28 ވަނަ ދުވަހު ހަނގުރާމަ ފެށުމުގެ ކުރިން ތެޔޮ ފީފާއެއް ހުރި 70 ޑޮލަރާ އަޅާބަލާއިރު އަދިވެސް މަތީ އަދަދުތަކެކެވެ.

މި މައްސަލައިގައި އެމެރިކާގެ ރައީސް ޑޮނަލްޑް ޓްރަމްޕް ސޯޝަލް މީޑިއާގައި ކުރެއްވި ޕޯސްޓެއްގައި ބުނީ، އީރާނުން ހޯމުޒް ކަނޑުއޮޅި ފުރިހަމައަށް އަދި ރައްކާތެރިކަމާއެކު ވަގުތުން ހުޅުވާލަން އެއްބަސްވާނަމަ، ދެ ހަފުތާގެ މުއްދަތަށް އީރާނަށް ބޮން އެޅުމާއި ހަމަލާދިނުން ހުއްޓާލުމަށް އެއްބަސްވާނެ ކަމަށެވެ.

މީގެ ރައްދުގައި އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، އީރާނަށް ދޭ ހަމަލާތައް ހުއްޓާލައިފި ނަމަ، ހޯމުޒް ކަނޑުއޮޅިން ރައްކާތެރިކަމާއެކު ދަތުރުކުރެވޭނެ އިންތިޒާމު ހަމަޖައްސައިދޭނެ ކަމަށެވެ.

މި އުފާވެރި ޚަބަރާއެކު، އޭޝިއާ ޕެސިފިކް ސަރަހައްދުގެ ހިއްސާގެ ބާޒާރުތަކަށް ބުދަ ދުވަހުގެ ހެނދުނު ވަނީ ބޮޑު ކުރިއެރުމެއް ލިބިފައެވެ. އެގޮތުން ޖަޕާނުގެ ނިކޭ 225 އިންޑެކްސް 4.5 އިންސައްތަ މައްޗަށް ދިޔައިރު، ދެކުނު ކޮރެއާގެ ކޮސްޕީ ވަނީ 5.5 އިންސައްތަ އުފުލިފައެވެ. މީގެ އިތުރުން ހޮންކޮންގްގެ ހޭންގް ސެންގް 2.8 އިންސައްތަ އަދި އޮސްޓްރޭލިއާގެ އޭއެސްއެކްސް 200 ވަނީ 2.5 އިންސައްތަ މައްޗަށް ޖެހިލާފައެވެ.

އެމްއެސްޓީ މާކީގެ އެނަލިސްޓް ސައުލް ކަވޮނިކް ވިދާޅުވީ، މި ސުލްހައިގެ ސަބަބުން ކަނޑުއޮޅި ސަރަހައްދުގައި ތާށިވެފައި ހުރި ތެޔޮ ޓޭންކަރުތަކަށް ދަތުރުކުރުމުގެ ފުރުސަތު ލިބި، ކުރިއަށް އޮތް ހަފުތާތަކުގައި ބާޒާރަށް ލުޔެއް ލިބޭނެ ކަމަށެވެ.

ނަމަވެސް، ހަނގުރާމައިގެ ސަބަބުން ހަކަތަ އުފައްދާ ވަސީލަތްތަކަށް ލިބިފައިވާ ގެއްލުންތަކުގެ ސަބަބުން، ތެޔޮ އުފެއްދުން މުޅިން އާންމު ހާލަތަކަށް ގެނައުމަށް މަސްތަކެއް ނަގާފާނެ ކަމަށް އޭނާ ފާހަގަކުރެއްވިއެވެ.

ހަނގުރާމައިގެ ދުވަސްވަރުވެސް އިންޑިއާ، މެލޭޝިއާ އަދި ފިލިޕީންސް ފަދަ ގައުމުތަކުން ވަނީ މަޝްވަރާކޮށްގެން އެ ގައުމުތަކުގެ އުޅަނދުތަކަށް ރައްކާތެރިކަމާއެކު ދަތުރުކުރެވޭނެ މަގު ފަހިކޮށްފައެވެ. އަދި ޗައިނާއިންވެސް ވަނީ އެ ގައުމުގެ ބައެއް އުޅަނދުތައް މި މުއްދަތުގައި ކަނޑުއޮޅި ހުރަސްކޮށްފައިވާކަން ކަށަވަރުކޮށްދީފައެވެ.