ކައްކާ ގޭހުގެ އައު ޝިޕްމަންޓެއް ރާއްޖެއަށް ގެނެސް ވިއްކަން ފަށާފައިވާ ކަމަށް ސްޓޭޓް ޓްރޭޑިންގ އޯގަނައިޒޭޝަން، އެސްޓީއޯއިން މިއަދު ބުނެފިއެވެ.

މިދިޔަ ހަފުތާތަކުގެ ތެރޭގައި ގޭހުގެ ޑިމާންޑް އިތުރުވުމާ ގުޅިގެން، މޯލްޑިވް ގޭހުން ވަނީ ގޭސް ވިއްކުން ލިމިޓްކޮށް 10 ކިލޯގެ ގޭސް ފުޅީގެ ބަދަލުގައި ޑިސްކައުންޓް ރޭޓުތަކެއްގައި 5 ކިލޯގެ ގޭސް ވިއްކާފައެވެ.

ނަމަވެސް އެސްޓީއޯއިން މީޑިއާތަކަށް ފޮނުވި މެސެޖެއްގައި ބުނީ، ގޭހުގެ އައު ޝިޕްމަންޓް އިއްޔެ ލިބިފައިވާ ކަމަށާ މި ޝިޕްމަންޓާއެކު މޯލްޑިވް ގޭސް މެދުވެރިކޮށް މިހާރު 10 ކިލޯގެ ގޭސް ފުޅި އާންމުންނަށް ލިބޭނެ ކަމަށެވެ.

އަދި އެސްޓީއޯ އިން ދަނީ ރައްޔިތުންނަށް ބޭނުންވާނެ އެއްވެސް އަސާސީ ޚިދުމަތެއް ހުއްޓުމަކަށް ނައިސް ލިބޭނެ އިންތިޒާމްތައް ހަމަޖައްސަމުން ކަމަށާ، އެކަމަށް ހާއްސަ އިސްކަމެއްދީގެން ކަންކަން ވަރަށް ގާތުން ބަލަމުން ކަމަށްވެސް ބުނެފައިވެއެވެ.

ގޭހުގެ އައު ޝިޕްމަންޓް ގެނެސް މާކެޓަށް ނެރެފައިވާއިރު، މާލެ ސަރަހައްދުގައި ގޭސް ރައްކާކުރެވޭ މިންވަރު އިތުރުކުރުމުގެ މަސައްކަތް އެސްޓީއޯއިން މިހާރު ވަނީ ފަށާފައެވެ.

އެގޮތުން 1،500 ޓަނުގެ އާ ސްޓޯރޭޖެއް ގާއިމްކުރުމުގެ މަސައްކަތް ކުރަން ފަށާފައިވައިރު، މިއީ ގޭހުގެ ދަތިކަން ކުރިމަތިވިޔަ ނުދިނުމަށް ކުރެވޭ މުހިންމު މަސައްކަތެއްކަން ސަރުކާރުން ބުނެއެވެ.