ކ. ހުރާ ގެއެއްގައި ރޭ ހިނގި އަލިފާނުގެ ހާދިސާއަކީ ޗާޖަށް ޖަހާފައި އޮތް ފޯނެއްގައި ރޯވެގެން ހިނގި ހާދިސާއެއް ކަމަށް ބެލެވޭ ކަމަށް އެރަށު ކައުންސިލްގެ ރައީސް ވިދާޅުވެއްޖެއެވެ.
ކ.ހުރާގައި ގެއެއްގައި، ބޮޑު އަލިފާނުގެ ހާދިސާއެއް ހިނގައި އެގޭ ބޭނުން ނުކުރެވޭ ވަރަށް އަނދައިފައިވާ ކަމަށް ނެޝަނަލްޑިޒާސްޓާ މެނޭޖްމަންޓުން މިއަދު ވަނީ ބުނެފައެވެ. އަދި، މި އަލިފާނުގެ ސަބަބުން އެގޭގައި ދިރިއުޅުނު 15 ފަރާތަކަށް އިންސާނީ އެހީތެރިކަން ފޯރުކޮށްދިނުމުގެ މަސައްކަތް އެ އޮތޯރިޓީން ކައުންސިލާ ގުޅިގެން ކުރަމުންދާ ކަމަށްވެސް އެ އޮތޯރިޓީން ބުނެފައިވެއެވެ.
އަލިފާނުގެ ހާދިސާއާގުޅޭގޮތުން ވޮއިސް އަށް މައުލޫމާތު ދެއްވަމުން، ހުރާ ކައުންސިލުގެ ރައީސް ޢީސާ އަހުމަދު ވިދާޅުވީ، ފުރަތަމަ އަލިފާން ރޯވީ މަންމަ އަކާއި އޭނާގެ ދެ ދަރިން ނިދާފައި އޮތް ކޮޓަރީގައެވެ. އަދި އެ ކޮޓަރީގައި ރޯވި ސަބަބު އަދި ޔަގީން ނުވި ނަމަވެސް، ބޮޑަށް ބެލެވެނީ ޗާޖަށް ޖަހާފައި އޮތް ފޯނު ހޫނުވެ ދިމާވި ކަމަކުން ކަމަށް ވިދާޅުވިއެވެ.
”ބެލެވެނީ ޗާޖަށް ޖަހާފައި އޮތް ފޯނު ގޮވައިގެން ދިމާވި ކަމެއް ކަމަށް. ރޯވި އިރު އެ ކޮޓަރީގައި ތިބީ މަންމަ އާއި އޭނާގެ ދެ ދަރިން. މާތް اللهގެ އިރާދަފުޅުން ކުދިންނަށް އަނިޔާއެއް ނުވެ ސަލާމަތް ކުރެވުނު. ކުދިންގެ މަންމަގެ އަތުގެ އިނގިލިތައް ފިހުނު.“ ހުރާ ކައުންސިލުގެ ރައީސް ވިދާޅުވިއެވެ.
ކުދިންގެ މަންމައަށް ލިބުނު އަނިޔާއަށް ހުރާ ސިއްޙީ މަރުކަޒުގައި ފަރުވާ ދިނުމަށްފަހު އޭނާ މިއަދު 6:00 ހާއިރު މާލެ ފޮނުވާލާފައިވާ ކަމަށްވެސް ކައުންސިލު ރައީސް މައުލޫމާތު ދެއްވައެވެ.
”ޖިސްމާނީ އަނިޔާއެއް ނުލިބުނު ނަމަވެސް ނަފްސާނީ ގޮތުން ވަރަށް އަސަރު ކޮށްފައި ހުރީ މަންމައަށް. ވާހަކައެއްވެސް ނުދައްކާ އަދިވެސް. ހުއްޓިފަ ހުންނަނީ. އެހެންވެ މާލެއަށް ފޮނުވާލާފައި ވަނީ މިހާރު. “ ހުރާ ކައުންސިލު ރައީސް ވިދާޅުވުއެވެ.
ރޭގެ ވަގުތެއްގައި ހިނގި މި އަލިފާނުގެ ހާދިސާގައި އެ ކޮޓަރީގައި ހުރި ހުރިހާ ތަކެތި ވަނީ ބޭނުން ނުކުރެވޭ ވަރަށް އަނދާފައެވެ.
ފުލުހުން ބުނީ، މި ހާދިސާ ހިނގައިގެން އުޅޭކަމުގެ މައުލޫމާތު ލިބުނީ ރޭ ދަންވަރު 01:18 އެހައިކަންހާއިރު ކަމަށެވެ.
އަދި ފުލުހުންނާއި އާންމު ރައްޔިތުން ގުޅިގެން ކުރި މަސައްކަތުން އަލިފާންގަނޑު އެއްކޮށް ނިއްވާލެވުނު ކަމަށެވެ.
މި ހާދިސާގައި އެ ގޭގެ އިމާރާތަށާއި މުދަލަށް އެކިވަރުގެ ގެއްލުންތައް ލިބިފައިވާ ކަމަށާ، މި މައްސަލަ ފުލުހުން ތަހުގީގު ކުރަމުންދާ ކަމަށް އެ އިދާރާއިން ބުނެއެވެ.
Advertisement
This content is created and paid for by advertisers and does not involve Voice Journalists
