ހުޅުމާލޭގައި 50 އެނދުގެ ސައިކައިއެޓްރީ (ނަފްސާނީ ބަލިތަކަށް ޚާއްޞަ) ހޮސްޕިޓަލެއް އިމާރާތްކޮށް ތަރައްޤީކޮށްދޭނެ ފަރާތެއް ހޯދުމަށް ބީލަމަށް ހުޅުވާލައިފިއެވެ.

މިނިސްޓްރީ އޮފް ހައުސިންގ، ލޭންޑް އެންޑް އާބަން ޑިވެލޮޕްމަންޓްގެ އެދިލެއްވުމުގެ މަތިން މިނިސްޓްރީ އޮފް ފިނޭންސް އެންޑް ޕަބްލިކް އެންޓަރޕްރައިޒަސް އިން ކުރި އިއުލާނެއްގައި ބުނީ، މި މަޝްރޫޢަކީ އިންޓަރނޭޝަނަލް ކޮމްޕެޓިޓިވް ބިޑިންގ - އައިސީބީ އުސޫލުން ކުރިއަށްގެންދާ ޕްރޮޖެކްޓެއް ކަމަށެވެ. މި މަސައްކަތް ކުރިއަށްދާނީ ދައުލަތުގެ މާލިއްޔަތު ގަވާއިދާ އެއްގޮތްވާ ގޮތުގެ މަތިންނެވެ.

މި ބީލަމުގައި ބައިވެރިވެވޭނީ އިމާރާތްކުރުމުގެ ދާއިރާގެ ގަވާއިދުގެ ދަށުން GC01 ގެ ގްރޭޑް 1، 2، 3، 4، 5، 6 ނުވަތަ 7 ގައި ރަޖިސްޓްރީވެފައިވާ ކޮންޓްރެކްޓަރުންނަށެވެ. އަދި އިކޮނޮމިކް މިނިސްޓްރީގެ "ފޮރިން ޑައިރެކްޓް އިންވެސްޓްމަންޓް ޕޮލިސީ" އަދި ހައުސިންގ މިނިސްޓްރީގެ "ކޮންސްޓްރަކްޝަން އިންޑަސްޓްރީ ކޮންޓްރެކްޓާސް ރެގިއުލޭޝަން" އަށް ފެތޭ ފަރާތްތަކަށް ވާންޖެހެއެވެ.

ފިނޭންސް މިނިސްޓްރީން ބުނެފައިވާ ގޮތުގައި، މި ބީލަމުގައި ބައިވެރިވާން އެދޭ ފަރާތްތަކުން މިއަދުން ފެށިގެން 20 އޮކްޓޫބަރު 2026 ގެ ނިޔަލަށް، ރަސްމީ ކޮންމެ ދުވަހެއްގެ ހެނދުނު 8:00 އިން މެންދުރުފަހު 2:00 އާ ދެމެދު ރަޖިސްޓްރީވާން ޖެހޭނެއެވެ. ރަޖިސްޓްރޭޝަން ފީއެއްގެ ގޮތުގައި އަނބުރާ ނުލިބޭ 1،500 ރުފިޔާ ނުވަތަ 100 އެމެރިކާ ޑޮލަރު "ބަނޑޭރި ޕޭ" މެދުވެރިކޮށް ދައްކަންޖެހޭނެއެވެ. އަދި ފައިސާ ދެއްކި ރަސީދާއި ބީލަންވެރިޔާގެ ތަފްސީލުތައް ފިނޭންސްގެ އީމެއިލަށް ފޮނުވަން ޖެހެއެވެ.

މި މަޝްރޫޢުގެ ބީލަން ފޮތާއި އެހެނިހެން ލިޔެކިޔުންތައް 24 ސެޕްޓެމްބަރު 2026 އިން ފެށިގެން ފިނޭންސް މިނިސްޓްރީގެ ވެބްސައިޓުން (www.finance.gov.mv) ހިލޭ ޑައުންލޯޑް ކުރެވެން ހުންނާނެއެވެ. ބީލަމާ ގުޅޭގޮތުން ބާއްވާ ޕްރީ-ބިޑް ބައްދަލުވުން އޮންލައިންކޮށް އޮންނާނީ 7 އޮކްޓޫބަރު 2026 ވާ ބުދަ ދުވަހުގެ ހެނދުނު 10:00 ގައެވެ. އަދި އެއްވެސް ސުވާލެއް ނުވަތަ ސާފުކުރަން ބޭނުންވާ ކަމެއް އޮތްނަމަ 8 އޮކްޓޫބަރު 2026 ވާ ބުރާސްފަތި ދުވަހުގެ މެންދުރުފަހު 13:00 ގެ ކުރިން ހުށަހަޅަން ޖެހެއެވެ.

ބީލަން ހުށަހަޅަންޖެހެނީ "ބީލަން ޕޯޓަލް" (https://beelan.finance.gov.mv/) މެދުވެރިކޮށެވެ. ބީލަން ހުށަހެޅުމުގެ އެންމެ ފަހު ތާރީޚަކީ 25 އޮކްޓޫބަރު 2026 ވާ އާދީއްތަ ދުވަހުގެ މެންދުރުފަހު 13:00 އެވެ. އަދި ބީލަން ހުޅުވުން އޮންނާނީ 26 އޮކްޓޫބަރު 2026 ގެ ހެނދުނު 11:00 ގައެވެ. މި ބީލަމަށް ބިޑް ސެކިއުރިޓީގެ ގޮތުގައި 864,000 (އަށްލައްކަ ފަސްދޮޅަސް ހަތަރުހާސް) ރުފިޔާ ހުށަހަޅަންޖެހޭނެ ކަމަށްވެސް އިއުލާނުގައި ބަޔާންކޮށްފައިވެއެވެ.

މި ބީލަމުގައި ބައިވެރިވާ ހުރިހާ ފަރާތްތަކުންވެސް، ބީލަން ހުށަހެޅުމުގެ ސުންގަޑީގެ މަދުވެގެން ރަސްމީ 3 ދުވަސް ކުރިން "ބީލަން ޕޯޓަލް" ގައި ރަޖިސްޓްރޭޝަން ފުރިހަމަކުރަން ޖެހޭނެއެވެ. މި މަޝްރޫޢާ ގުޅޭ އިތުރު މަޢުލޫމާތު ފިނޭންސް މިނިސްޓްރީގެ ނޭޝަނަލް ޓެންޑަރ ޑިޕާޓްމަންޓުގެ ފޯނު ނަންބަރުތަކުންނާއި [email protected] އަށް އީމެއިލް ކޮށްގެން ލިބޭނެއެވެ.