ދިވެހިރާއްޖޭގެ ޤައުމީ ޔުނިވަރސިޓީގެ ސެންޓަރ ފޯ ފައުންޑޭޝަން ސްޓަޑީޒްގެ ސައިންސް ޑިޕާޓްމަންޓުން، މޯލްޑިވްސް ފުޑް އެންޑް ޑްރަގް އޮތޯރިޓީއާ ގުޅިގެން، ބަޔޮލޮޖީ ދަރިވަރުންނަށް އެންޓިބަޔޮޓިކް ރެސިސްޓެންސާ ގުޅޭ މަޢުލޫމާތު ސެޝަނެއް ބާއްވައިފިއެވެ.
އެ ޔުނިވަރސިޓީން ބުނީ މި ސެޝަން ނަންގަވައިދެއްވީ މޯލްޑިވްސް ފުޑް އެންޑް ޑްރަގް އޮތޯރިޓީގެ ޑިރެކްޓަރ އޮފް ފާމަސޫޓިކަލްސް، އާއިޝަތު ޖަލީލާއެވެ. އެ ސެޝަންގައި އެންޓިބަޔޮޓިކް ބޭނުންކުރުމާއި، އެންޓިމައިކްރޯ ރެޒިސްޓެންސްގެ ނުރައްކާ އިތުރުވަމުންދާ މައްސަލައިގެ މައްޗަށް އަލިއަޅުއްވައިލައްވައި، ދުނިޔެއާއި ރާއްޖޭގެ ފެންވަރުގައި މިއީ ޢާންމު ޞިއްޙަތަށް ކުރިމަތިވެފައިވާ ބޮޑު ގޮންޖެހުމެއްކަން ފާހަގަކުރެއްވިއެވެ.
އެ ޔުނިވަރސިޓީން ބުނީ މި ސެޝަންގެ މަޤްޞަދަކީ އެންޓިބަޔޮޓިކް ޒިންމާދާރު ގޮތުގައި ބޭނުންކުރުމާ ގުޅޭ ގޮތުން ދަރިވަރުންގެ ހޭލުންތެރިކަން އިތުރުކުރުން ކަމަށެވެ. ބޭނުން ނޫން ގޮތުގައި އަދި މާ ގިނައިން އެންޓިބަޔޮޓިކް ބޭނުންކުރުމުގެ ސަބަބުން ބެކްޓީރިއާ ފަދަ ޖަރާސީމުތައް ބޭހަށް ނުގުޑާ ގޮތް ވުމުގެ މައްސަލައިގެ ސީރިއަސްކަމާއި، ޞިއްޙީ ނިޒާމަށް ކުރާ އަސަރާއި، މި މައްސަލައިގައި ފަރުދީ ގޮތުން އަދާކުރެވޭނެ ދައުރާ ގުޅޭ މުހިންމު މަޢުލޫމާތު މި ބައްދަލުވުމުގައި ދަރިވަރުންނަށް ދިނެވެ.
މިފަދަ ސެޝަންތަކަކީ ދަރިވަރުންނަށް ތަޢުލީމީ އަދި ފަންނީ ކުރިއެރުމަށް އެހީތެރިވެދޭ، ޢަމަލީ ދާއިރާއާ ގުޅުންހުރި މަޢުލޫމާތު ފޯރުކޮށްދިނުމަށް އެ ސެންޓަރުން ކުރަމުން ގެންދާ މަސައްކަތުގެ ބައެއް ކަމަށް އެ ޔުނިވަރސިޓީން ބުންޏެވެ.
Advertisement
This content is created and paid for by advertisers and does not involve Voice Journalists
