ރާއްޖޭގައި ކުޑަކުދިން ބެލެހެއްޓުމުގެ ނިޒާމަށް އަވަސް ބަދަލުތަކެއް ގެނައުމަށް ގޮވާލައި، އަމިއްލަ ޖަމިއްޔާއެއްކަމަށްވާ، ބެނެފިޓުން އާންމު ޕެޓިޝަނެއް ހުށަހަޅައިފިއެވެ.

2023 ވަނަ އަހަރު "ޗައިލްޑްކެއާ ފޯ ޓުމޮރޯ" ކެމްޕެއިންގެ ދަށުން ފެށި މި ޕެޓިޝަނުގައި ފާހަގަކޮށްފައިވާ ގޮތުގައި، ކުޑަކުދިން ބެލެހެއްޓުމުގެ ޚިދުމަތް ލިބެން ހުރި މިންވަރު މަދުވުމާއި، އަގުބޮޑުވުމާއި، އެހީތެރިކަމުގެ ނިޒާމުތައް ނެތުމުގެ ސަބަބުން ބެލެނިވެރިންނަށް، ޚާއްސަކޮށް މައިންނަށް ބޮޑެތި ދަތިތަކާ ކުރިމަތިލާން ޖެހިފައިވެއެވެ. އެ ކެމްޕެއިނުން ހޯދި މައުލޫމާތުތައް ދައްކާ ގޮތުން މާލޭގައި ވަޒީފާ އަދާކުރާ ގިނަ މައިންނަށް ވަނީ އެކަށީގެންވާ ޗައިލްޑްކެއާ ޚިދުމަތް ހޯދުމަށް ދަތިވެ، ވަޒީފާއާއި ދަރިން ބެލެހެއްޓުމާ ދެމެދު އުނދަގޫ ނިންމުންތައް ނިންމަން ޖެހިފައެވެ.

"ޗައިލްޑްކެއާ އެއީ ލަގްޒަރީއެއް ނޫން. އެއީ އާއިލާތަކަށާއި އިގުތިސާދަށް ކޮންމެހެން ބޭނުންވާ އަސާސީ ވަސީލަތެއް" ކަމަށް އެ ކެމްޕެއިނުން ބުނެފައިވެއެވެ. "އެކަށީގެންވާ އެހީތެރިކަމެއް ނެތި، ބެލެނިވެރިންނަށް ޖެހެނީ އެ ބުރަ އެކަނި އުފުލަން" ކަމަށް ވެސް ބެނެފިޓުން ބުނެފައިވެއެވެ.

މި ޕެޓިޝަނުގައި ގޮވާލާފައިވަނީ އަތް ފޯރާ ފަށުގައި ފެންވަރު ރަނގަޅު ޗައިލްޑްކެއާ ޚިދުމަތް ފޯރުކޮށްދިނުމަށާއި، ސަރުކާރުން ސަބްސިޑީ ދީގެން ޑޭކެއާ ޚިދުމަތް ގާއިމުކުރުމަށާއި، ރިމޯޓް ވޯކް ހިމެނޭ ގޮތަށް ބެލެނިވެރިންނަށް ލުއި މަސައްކަތު އިންތިޒާމުތައް ހަމަޖެއްސުމަށާއި، މައިންނާއި ބަފައިންނަށް ވެސް ވިހެއުމުގެ ޗުއްޓީގެ ސިޔާސަތުތައް އިތުރަށް ހަރުދަނާ ކުރުމަށެވެ. ބެނެފިޓުން ބުނެފައިވާ ގޮތުގައި ޗައިލްޑްކެއާ ނިޒާމު ރަނގަޅުކުރުމުން އާއިލާތަކަށް ލިބޭ ފައިދާގެ އިތުރުން، ވަޒީފާގެ ބާޒާރުގައި ބައިވެރިވުން އިތުރުވެ، ޖިންސީ ހަމަހަމަކަން ކުރިއެރުވި، ކުޑަކުދިންނަށް ލިބޭ ނަތީޖާ ރަނގަޅުވާނެއެވެ.

މި ޕެޓިޝަނުގައި ސޮއިކުރުމުގެ ފުރުސަތު އަންނަ މެއިމަހުގެ 21 ވަނަ ދުވަހުގެ ނިޔަލަށް ހުޅުވާލައިފައިވާއިރު، އީފާސް މެދުވެރިކޮށްވެސް ޕެޓިޝަނުގައި ސޮއިކުރެވޭނޭކަމަށް ބެނެފިޓުން ބުނެއެވެ. ބެނެފިޓަކީ 2017 ވަނަ އަހަރު އުފެއްދި، އިޖުތިމާއީ ހަމަހަމަކަމާއި ޝާމިލް ތަރައްގީ ކުރިއެރުވުމަށް މަސައްކަތްކުރާ ޖަމިއްޔާއެކެވެ.