އިނގިރޭސި ޕްރިމިއާ ލީގްގައި ރޭ މެންޗެސްޓަރ ޔުނައިޓެޑާއި ލީޑްސް ޔުނައިޓެޑް ބައްދަލުކުރިމެޗް ލީޑްސް ކާމިޔާބުކޮށް އޯލްޑް ޓްރެފަޑްގައި ތާރީހީ ކާމިޔާބެއް ހޯދައިފިއެވެ.

މިމެޗް ލީޑްސް ކާމިޔާބުކުރީ 1-2 ގެ ނަތީޖާއަކުންނެވެ. ފޯރިގަދަ ކުޅުމެއް ފެނިގެންދިޔަ މިމެޗްގައި އެންމެ ފުރަތަމަ ލަނޑެއްޖަހައި ކުރި ހޯދީވެސް ލީޑްސް ޔުނައިޓެޑެވެ. އެއީ މެޗްގެ 16 ވަނަ މިނެޓް ތެރޭގައި އޮކަފޯ ކާމިޔާބުކޮށްދިން ލަނޑުންނެވެ. ފުރަތަމަ ހާފް ނިމުމުގެ ކުރިން އޮކަފޯ ވަނީ 29 ވަނަ މިނެޓް ތެރޭގައި އިތުރު ލަނޑެއް ކާމިޔާބުކޮށް ދެ ލަނޑުގެ ލީޑެއް ނަގައިދީފައެވެ.

މެޗްގައި މެންޗެސްތަރ ޔުނައިޓެޑުން ޖެހި ހަމައެކަނި ލަނޑު އެޓީމަށް ކާމިޔާބުކޮށްދިނީ، 69 ވަނަ މިނެޓް ތެރޭގައި ކަސެމީރޯ އެވެ. އޭގެ ކުރިން 56 ވަނަ މިނެޓް ތެރޭގައި މެންޗެސްޓަރ ޔުނައިޓެޑްގެ މާޓިނޭޒް ކުރި ފައުލަކާ ގުޅިގެން ވީއާރު ބެލުމަށްފަހު ރެފްރީ ވަނީ އޭނާއަށް ރަތް ކާޑު ދައްކައި ދަނޑުން ފޮނުވާލާފައެވެ. މެންޗެސްޓަރ ޔުނައިޓެޑްގެ އެއްކުޅުންތެރިއަކު މަދުކޮށް ކުޅެންޖެހުމުގެ ސަބަބުން ލީޑްސް ޔުނައިޓެޑުން ވަނީ އޭގެ ފައިދާ އެންމެ ފުރިހަމަ ގޮތުގައި ނަގާފައެވެ.

ރޭގެ މެޗް ލީޑްސް ކާމިޔާބުކޮށްފައިވައިރު، މިއީ 1981 ވަނަ އަހަރަށް ފަހު ލީގް މެޗެއްގައި އޯލްޑް ޓްރެފޯޑްގައި ލީޑްސް ހޯދި ފުރަތަމަ މޮޅެވެ. އަނެއްކޮޅުން މިމެޗަކީ މައިކަލް ކެރިކް ކޯޗްކަމާ ހަވާލުވުަމަށްފަހު މެންޗެސްޓާ ޔުނައިޓެޑް އަމިއްލަ ދަނޑުގައި ބަލިވި ފުރަތަމަ ފަހަރެވެ.

މިމެޗުން ލީޑްސް މޮޅުވުމުން ކުރިއަށްއޮތް އޮތް ސީޒަނުގައި ޕްރިމިއާ ލީގްގައި ކުޅުމަށް އެޓީމް ކުރަމުންދާ މަސައްކަތްތަކަށް ވަނީ އިތުރު ކުރިއެރުމެއް ލިބިފައެވެ. ލީޑްސް މިވަގުތު އޮތީ ޕޮއިންޓް ތާވަލްގެ 15 ވަނާގައެވެ. ލީޑްސް އާއެކު ޕްރިމިއާ ލީގަށް ސްޕާސް އަދި ވެސްޓްހޭމްވެސް ވާދަކުރާކަން ފާހަގަކޮށްލެވެއެވެ.