އެމެރިކާގެ ހުރަސްތަކާއެކުވެސް އީރާނުގެ ސުޕަޓޭންކަރެއް ހޯރްމުޒް ކަނޑުއޮޅި ހުރަސްކޮށްފިއެވެ.
އީރނުގެ ބައެއް މީޑިއާތަކުން ރިޕޯޓްކުރި ގޮތުގައި މި އުޅަނދަކީ، "ވެރީ ލާޖް ކްރޫޑް ކެރިއަރ" ގިންތީގެ ވަރަށް ބޮޑު ސުޕަޓޭންކަރެކެވެ. މިފަދަ އުޅަނދު ފަހަރަށް އެއްފަހަރާ ގިނަ އަދަދެއްގެ ތެޔޮ އުފުލުމުގެ ގާބިލުކަން ލިބިފައި ވެއެވެ.
މި ސުޕަޓޭންކަރާ ބެހޭގޮތުން ލިބިފައިވާ މައުލޫމާތަށް ބަލާއިރު، މިއީ ދެ މިލިއަން ފީފާގެ ތެޔޮ އުފުލުމުގެ ގާބިލުކަން ލިބިފައިވާ އުޅަނދެކެވެ. ނަމަވެސް، މި އުޅަނދު ދަތުރުކުރަމުންދަނީ ތެޔޮ ބަރުކޮށްގެން ކަމެއް ނުވަތަ ހުސްކޮށް ކަމެއް އަދި ސާފެއް ނުވެއެވެ.
އީރާނުގެ މި އުޅަނދަށް އެމެރިކާއިން ވަނީ ދަތިކުރުމުގެ ފިޔަވަޅުތައް އަޅައި، އޭގެ ދަތުރުތަކަށް ހުރަސްތައް ކުރިމަތިކޮށްފައެވެ. އެހެންނަމަވެސް، އެމެރިކާގެ މި ހުރަސްތަކަށް ބެލުމެއްނެތި އުޅަނދު ވަނީ، މުހިންމު ކަނޑުގެ ސަރަހައްދެއް ކަމަށްވާ ހޯރްމުޒް ކަނޑުއޮޅި ކާމިޔާބުކަމާއެކު ހުރަސްކޮށްފައެވެ.
މި އުޅަނދު މިހާރު ދަތުރުކުރަމުންދަނީ އީރާނުގެ އިމާމް ޚުމައިނީ ބަނދަރާ ދިމާލަށެވެ. އީރާނުގެ ނޫސްތަކުން މިކަން ކަށަވަރުކޮށްދީފައިވީ ނަމަވެސް، އުޅަނދުގައި ހުރި މުދަލާ ބެހޭ އިތުރު ތަފްސީލެއް އަދި ނޭނގެއެވެ.
Advertisement
This content is created and paid for by advertisers and does not involve Voice Journalists
