ކްލައިމެޓް ވަލްނެރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ މަގާމުގެ ދައުރު ފުރިހަމަކުރައްވައި، ކުރީގެ ރައީސް، މުހައްމަދު ނަޝީދު އެނބުރި ދިވެހިރާއްޖެ ވަޑައިގެންފި އެވެ.
ސީވީއެފްއަކީ، 2009 ވަނަ އަހަރު ނަޝީދުގެ ވެރިކަމުގައި ރާއްޖެއާއި އެހެން ބައެއް ގައުމުތަކުން އުފެއްދި ފޯރަމެކެވެ.
މި ފޯރަމްގެ މައިގަނޑު މަގުސަދަކީ މޫސުމީ ބަދަލުތަކުގެ ސަބަބުން ކުރާ ނޭދެވޭ އަސަރުތަކާ ގުޅޭގޮތުން ގައުމުތައް އަހުލުވެރިކޮށް ތިމާވެއްޓާއި ރަހުމަތްތެރި ސިޔާސަތުތައް ތަންފީޒުކޮށް މެމްބަރު ގައުމުތަކުން ބޭނުންކުރާ ހަކަތައަކީ 100 ޕަސެންޓް އިޔާދަކުރަނިވި ހަކަތައަށް ބަދަލުކުރުމެވެ.
އެ ފޯރަމްގެ ސެކްރެޓަރީ ޖެނެރަލްކަން ކުރުމަށް ނަޝީދު އެއްބަސްވެވަޑައިގެންފައިވާކަން ނަޝީދު ހާމަކުރެއްވީ، ސިޔާސީ މަސައްކަތާ ދުރަށްޖެހިވަޑައިގެންނެވިކަން އިއުލާނުކުރައްވައި، ޑިސެމްބަރު 12، 2023 ގައި ނެރުއްވި ބަޔާނެއްގައެވެ.
ނަޝީދު ސިޔާސީ މަސައްކަތްތަކާއި ދުރުވެވަޑައިގެންނެވީ އެމްޑީޕީގެ އެތެރޭގައި އުފެދުނު ނުތަނަވަސްކަމާއި ގުޅިގެން ޕާޓީންނާއި، މަޖިލިސް ރައީސް ކަމުގެ މަގާމުންވެސް އިސްތިއުފާ ދެއްވައި، ނަޝީދުގެ ފެކްޝަނުން އޭރު އުފެއްދި ޑިމޮކްރެޓްސް އާވެސް ގުޅިގެން ދުވަސްކޮޅަކު އުޅުއްވުމަށްފަހުގައެވެ.
ނަމަވެސް މިހާރު އެމްޑީޕީގެ އެތެރޭގެ ކޯޅުން ކުޑަ ވެފައިވާއިރު، ނަޝީދު ވަނީ އަލުން އެ ޕާޓީއަށްވެސް ސޮއި ކޮށްފައެވެ. އަދި މިފަހުން ޕާޓީ ހިންގުން ހަވާލުކުރި ބޭފުޅުންގެ ތެރޭގައިވެސް އެމަނިކުފާނު ހިމެނިވަޑައިގަންނަވައެވެ.
Advertisement
This content is created and paid for by advertisers and does not involve Voice Journalists
