އީރާނުން އަނެއްކާވެސް ހޮރްމޫޒް ކަނޑުއޮޅި ބަންދުކޮށްފިއެވެ.
މިކަމާ ގުޅޭގޮތުން އަލްޖަޒީރާއިން ބުނީ ހުރްމޫޒް ކަނޑުއޮޅި ބަންދުކޮށްފައިވާކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް އިން ބުނެފައިވާކަމަށެވެ. ކަނޑުއޮޅި ބަންދު ކުރަންޖެހުނީ އެމެރިކާއިން އީރާނުގެ ބަނދަރުތައް ބަންދުކުރުމުގެ އަމަލުތައް ހިންގަން ފެށުމުންކަމަަށެވެ.
އީރާނުން ހުރްމޫޒް ކަނޑުއޮޅި ބަންދުކުރުމާ ގުޅިގެން އެ ސަރަހައްދުން ދަތުރުކުރާ އުޅަނދުތަކަށް އަނެއްކާވެސް ދަތުރުކުރަން ބޭނުންނަމަ ޖެހޭނީ އީރާނުގެ ހުއްދަ ހޯދާށެވެ. އީރާނުން ބުނީ، "ނޭވަލް ބްލޮކޭޑް" އުވާލުމަށް އެމެރިކާއިން އިންކާރުކޮށްފައިވާ ކަމަށާއި، އީރާނުންވެސް ދޫދިނުމެއް ނެތްކަމަށެވެ.
ފެބްރުއަރީ މަހުގެ 28 ވަނަ ދުވަހު އެމެރިކާއިން އީރާނަށް ދޭން ފެށި ހަމަލާތަކާ ގުޅިގެން ހޮރްމޫޒް ކަނޑުއޮޅި ބަންދުކޮށްފައި އޮތުމަށްފަހު، އިއްޔެ އެ ސަރަހައްދު ހުޅުވާލީ އިސްރާއީލާއި ލުުބުނާނާއި ދެމެދު 10 ދުވަހުގެ ސުލްހައިގެ އެއްބަސްވުމެއް ގާއިމްވުމާ ގުޅިގެންނެވެ. މީޑިއާތަކުން ރިޕޯޓްކޮށްފައިވާ ގޮތުގައި، ހަނގުރާމަ ފެށުނު ފަހުން އެންމެ ގިނަ އަދަދަކަށް އުޅަނދުފަހަރު އެ ކަނޑުއޮޅިން ދަތުރުކުރަން ފެށީ މިއަދެވެ. ނަމަވެސް، އީރާނުގެ އާ ނިންމުމާއެކު މި ދަތުރުތަކަށް އަނެއްކާވެސް ވަނީ ހުރަސް އެޅިފައެވެ.
ހަމަލާ ބަދަލުކުރުންތަކާއި ކަނޑުގެ މަގުތައް ބަންދުކުރުމުގެ ސަބަބުން ދުނިޔޭގެ އިގްތިސާދަށް ބޮޑެތި ލޮޅުންތަކެއް އަރައި، ހަކަތައިގެ އަގުތައް ވަނީ އިންތިހާއަށް އުފުލިފައެވެ. ހަތް ހަފްތާގެ މެދުކެނޑުމަކަށްފަހު މިއަދު ހެނދުނު އުޅަނދުތައް ދަތުރުކުރަން ފެށި ނަމަވެސް، އީރާނުގެ އަސްކަރިއްޔާއިން ހޮރްމޫޒް ކަނޑުއޮޅި އަލުން ބަންދުކުރުމުން، ބައިނަލްއަގުވާމީ ވިޔަފާރިވެރިންނާއި ތެޔޮ އެކްސްޕޯޓްކުރާ ފަރާތްތަކުގެ މެދުގައި ވަނީ ނުތަނަވަސްކަން އިތުރުވެފައެވެ.
Advertisement
This content is created and paid for by advertisers and does not involve Voice Journalists
