އެކުވެރި އަރަބު އިމާރާތު ( ޔޫ.އޭ.އީ ) ގެ ގައުމީ އެއަރލައިން، އިއްތިހާދު އެއާރވޭސް އިން އިސްރާއީލަށް އަލުން ދަތުރުތައް ފަށައިފިއެވެ.
މެދުއިރުމަތީގައި ހިނގަމުންދިޔަ ހަނގުރާމައާއި ގުޅިގެން އިއްތިހާދު އެއަރވޭސް އިން ދަތުރުތައް މެދުކަނޑާލުމަށްފަހު އަލުން ދަތުރުތައް ފަށާފައިވަނީ އިއްޔެއެވެ. އިއްތިހާދުން ދަތުރު ކުރާނީ ތެލް އަވީވް އަށެވެ.
މިކަން އިއުލާންކޮށްފައިވަނީ، ޔޫ.އޭ.އީގައި ހުންނަ އިސްރާއީލުގެ އެމްބަސީން އެކްސްގައި ކުރި ޕޯސްޓެއްގައެވެ. އެ ޕޯސްޓްގައި ފާހަގަކޮށްފައިވާ ގޮތުން، އިއްތިހާދު އެއަރވޭސް އަކީ އިސްރާއީލުގެ ގިނަ ރައްޔިތުން ދަތުރުކުރަން ލޯބިކުރާ އެއަރލައިނެކެވެ. އަދި އިއްތިހާދުން އިސްރާއީލަށް ދަތުރުތައް އަލުން ފެށުމުން އަނެއްކާވެސް އިސްރާއީލު ރައްޔިތުންނާއި ޔޫ.އޭ.އީގެ ރައްޔިތުން ގުޅިގެންދާނެކަމަށް އިސްރާއީލުން ވަނީ ފާހަގަކޮށްފައެވެ.
އިއްތިހާދު އެއަރވޭސް އަކީ ހަނގުރާމައާ ގުޅިގެން ދަތުރުތައް މެދުކަނޑާލުމަށްފަހު އިސްރާއީލަށް އަލުން ދަތުރުތައް ފެށި ފުރަތަމަ އެއަރލައިނެވެ. އިއްތިހާދު އެއަރވޭސް އިން އިސްރާއީލަށް ދުވާލަކު 2 ފަހަރު ދަތުރުކުރާނެއެވެ.
އިސްރާއީލާއި އެމެެރިކާއިން ގުޅިގެން އީރާނާއި ދެކޮޅަށް ހަނގުރާމަ ފަށާފައިވަނީ މިއަހަރުގެ ފެބްރުއަރީ 28 ވަނަ ދުވަހުއެވެ. މި ހަމަލާތަކުގެ ސަބަބޔުން ގަލްފް ޤައުމުތަކުގެ ވައިގެ ސަރަހައްދު ހުއްޓުމަކަށް އައިނަމަވެސް މިހާރު މަޝްރަހު ހަމަޔަކަށް އެޅެން ފެށުމާއެކު ވައިގެ ދަތުރުތައް ވަނީ މަޑުމަޑުން ކުރަން ފަށާފައެވެ.
އިއްތިހާދުން އިސްރައީލަށް އުދުހުންތައް ފެށުމާ ގުޅިގެން، ގިނަ ބަޔަކު ދަނީ ޔޫ.އޭ.އީ އަށް ފާޑުކިޔުންތައް އަމާޒުކުރަމުންނެވެ.
Advertisement
This content is created and paid for by advertisers and does not involve Voice Journalists
