ވެރިކަންކުރާ ޕާޓީ، ޕީޕަލްސް ނެޝަނަލް ކޮންގްރެސް ޕާޓީގެ ސެކެޓްރީ ޖެނެރަލް ކަމިގެ މަގާމުގައި ހުންނެވި މުއާޒް ހަލީމް މަގާމުން އިސްތިއުފާދެއްވައިފިއެވެ.

މުއާޒް ހަލީމް މަގާމުން އިސްތިއުފާދެއްވީ، މިއަދުއެވެ. އެކްސްގައި ކުރެއްވި ޕޯސްޓެއްގައި އޭނާ ވިދާޅުވީ މަގާމުން އިސްތިއުފާ ދެއްވީ، ރައްޔިތުންގެ ވިންދާ އެއްގޮތަށް ޕާޓީގެ މަސައްކަތްތައް ބައްޓަންކުރައްވައި، ފުރިހަމަ ނަތީޖާ ޙާޞިލް ކުރެވޭ ޕާޓީއަކަށް ޕާޓީ ހެއްދެވުމަށް ޕާޓީގެ ރައީސް، ރައީސުލްޖުމްހޫރިއްޔާ ޑރ.މުހައްމަދު ފައްޓަވާފައިވާ ހަރުދަނާ މަސައްކަތްޕުޅުތަކަށް ފުރިހަމަ އެއްބާރުލުން ދިނުމަށް ބޭނުންވާތީކަމަށެވެ. 

މީގެ އިތުރުން މަގާމުގައި ކުރަންޖެހޭ މަސައްކަތްތައް ކުރުމަށް ފުރިހަމައަށް ވަގުތު ދެވޭނެ ބޭފުޅަކު ހުރުމަކީ މުހިންމު ކަމެއްކަމަށްވެސް އެކްސްގައި ކުރެއްވި ޕޯސްޓްގައި މުއާޒް ހަލީމް ވަނީ ފާހަގަކުރައްވާފައެވެ. ޕީއެންސީގެ ސެކެޓްރީކަމުގެ މަގާމުގެ އިތުރުން އޭނާ އަންނަނީ ޑިފެންސް މިނިސްޓްރީގެ ސްޓޭޓް މިނިސްޓަރކަމުގެ މަގާމުވެސް ފުރުއްވަމުންނެވެ. 

ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ސެކްރެޓަރީ ޖެނެރަލްގެ މަޤާމަށް މުއާޒް ހަމަޖެއްސެވީ މިދިޔަ އަހަރުގެ ޖެނުއަރީމަހު ކުރިން އެމަގާމުގައި ހުންނެވި  ޒީނާޒް ޢަދުނާން ގެ ބަދަލުގައެވެ.