ކުރީގެ ރައީސް މުޙައްމަދު ނަޝީދާއި އެމްޑީޕީގެ ކުރީގެ ޗެއާޕާސަން ފައްޔާޒު އިސްމާޢީލްގެ ޚާއްސަ ނޫސްވެރިންގެ ބައްދަލުވުމެއް މިއަދު ބާއްވަން ނިންމައިފިއެވެ.
”ބޮޑު ބަދަލު“ ނަމުގައި ބާއްވާ މި ނޫސްވެރިންގެ ބައްދަލުވުން އޮންނާނީ ހަވީރު 4:00 ގައެވެ. މި ބައްދަލުވުން ”ވޮއިސް“ އިން ވަގުތުން ގެނެސްދޭނެއެވެ.
ނަޝީދާއި ފައްޔާޒު ގުޅިގެން ނޫސްވެރިންގެ ބައްދަލުވުމެއް ބާއްވާއިރު، ނަޝީދު އެނބުރި އެމްޑީޕީއާ ގުޅިވަޑައިގެންނެވިފަހުން ފައްޔާޒުއާއި ގާތް ގުޅުމެއް ބާއްވަވަމުންދާކަން ފާހަގަކޮށްލަންޖެހެއެވެ.
އެގޮތުން މިފަހުން ބޭއްވި އިންތިޚާބު ތަކުގެ ކެންޕެއިން ދަތުރުތަކުގައިވެސް ނަޝީދު އާއި ފައްޔާޒު އުޅުއްވީ އެކުގައެވެ. އަދި އިންތިޚާބު ތަކުގެ ކާމިޔާބީ ފާހަގަކުރަން އެމްޑީޕީން ބޭއްވި ބޮޑު ޖަލްސާގައި ވާހަކަދެއްކެވުމަށްވެސް ނަޝީދަށް ފުރުސަތު ދެއްވަން އެދިލައްވައި އެކަމަށް ބާރުއެޅުއްވި އެކަކީ ފައްޔާޒުއެވެ.
ޖަލްސާގައި ނަޝީދުއަށް ވާހަކަދައްކަވަން ފުރުސަތު ލިބިވަޑައިނުގެންނެވުމުން ނަޝީދުގެ އިތުރުން ފައްޔާޒުވެސް ވަނީ ޖަލްސާ ބޯއިކޮޓް ކުރައްވާފައެވެ.
މީގެ އިތުރުން، ކްލައިމެޓް ވަލްނެރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ މަގާމުގެ ދައުރުގައި ސިޔާސީ ކަންކަމާއި ދުރުހުންނެވުމަށްފަހު، ދައުރު ހަމަ ކުރައްވައި ނަޝީދު މިހާރު ރާއްޖެއަށް ވަޑައިގެންފައިވާއިރު، މި ބައްދަލުވުމަކީ ދެ ބޭފުޅުން އެމްޑީޕީއާ މެދު ދެކޭ ތަޞައްވުރާއި، ޕާޓީގެ ހަރަކާތްތަކާއި ގުޅޭގޮތުން މައުލޫމާތު ހިއްސާ ކުރައްވާނެ ބައްދަލުވުމެއް ކަމަށް ބެލެވެއެވެ.
Advertisement
This content is created and paid for by advertisers and does not involve Voice Journalists
