ކުރިއަށް އޮތް 2028 ވަނަ އަހަރުގެ ރިޔާސީ އިންތިހާބުގައި އެމްޑީޕީގެ ރިޔާސީ ކެންޑިޑޭޓަކަށް އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއީލް ހަމަޖައްސަވާ ރައީސުލްޖުމްހޫރިއްޔާގެ މަގާމަށް ފައްޔަ ގެނައުމަށް ތާއީދު ކުރައްވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެމަނިކުފާނު އެކަން ހާމަކުރެއްވީ "ބޮޑު ބަދަލު" ނަމުގައި މިއަދު ރައީސް ނަޝީދާއި ފައްޔާޒު ބޭއްވެވި ނޫސްވެރީންގެ ބައްދަލްވުމުގަ އެވެ. ނަޝީދު ވިދާޅުވީ ދައުލަތުގެ އެންމެ އިސްވެރިއަކަށް ފައްޔާޒް ގެންނަން ތާއީދު ކުރައްވާ ކަމަށެވެ.
"މި ބޮޑު ބަދަލުތައް ގެނައުމަށްޓަކައި އަޅުގަނޑު ތާއީދު ކުރަން ފައްޔާޒް އިސްމާއީލް އެއީ ސަރުކާރުގެ އެންމެ މަތީވެރިޔާގެ ގޮތުގައި ކުރިމަތިލުމަށް," ނަޝީދު ވިދާޅުވި އެވެ.
ފައްޔާަޒްއާ ނަޝީދު ގުޅިގެން މިއަދު ބޭއްވެވި ނޫސްވެރީންގެ ބައްދަލްވުމުގައި އެ ދެ ބޭފުޅުންގެ ވިސްނުންފުޅުގައި ގައުމަށް ގެންނަން ފެންނަ ވަރަށް ގިނަ ބަދަލުތައް ވަނީ ހިއްސާ ކުރައްވާފަ އެވެ. ނަޝީދު ވިދާޅުވީ ފުރަތަމަ ކަމަކަށް މި ބަދަލުތަކަށް އެމްޑީޕީގެ ތާއީދު ހޯދުމަށް މަަސައްކަތް ކުރައްވާނެ ކަމަށެވެ.
އަދި އެކަމަށް މަގުފަހި ކުރުމަށްޓަކައި އެމްޑީޕީގެ ޗެއާޕާސަންގެ މަގާމަށް ކުރިމަތިލެއްވުމަށް ގަސްތުކުރައްވާ ކަމުގައި ވިދާޅުވި އެވެ.
"އެކަން އަޅުގަނޑު މިކުރަނީ [އެމްޑީޕީގެ ޗެއާޕާސަން ކަމަށް ކުރިމަތިމިލަނީ] މި ބަދަލުތައް އަޅުގަނޑުމެން ހޯދުމަށް. އަޅުގަނޑު ދެކޭ ގޮތުގަައި މި ބަދަލުތައް މިހާރު ބޭނުން. އެއީކީއެއް 2028 ވަނަ އަހަރުގެ ފަހުން އަޅުގަނޑުމެން ހޯދާންވީ ބަދަލެއް ނޫން," ނަޝީދު ވިދާޅުވި އެވެ.
ރައީސް ނަޝީދު ވަނީ އެ ބަދަލުތައް ގެނައުމަށް މަސައްކަތް ކުރުމަށް ސަރުކާރަށް ދައުވަތު ދެއްވާފަ އެވެ. އަދި މަޝްވަރާއަށް ވަޑައިގަތުމަށް ދައުވަތު ދެއްވި އެވެ.
އެ ބަދަލުތައް ހޯދުމަށް ސީދާ ހަރަކާތަށް ދިއުމަށާއި ސުލްހަވެރި ސިޔާސީ ހިނގާލުންތަކާއި އެއްވުންތަކާއި ޖަލްސާތައް ބާއްވާނެ ކަމަށް ވިދާޅުވި އެވެ. އަދި އެ ބަދަލު ހޯދުމަށް ރާއްޖޭގެ ހުރިހާ ރަށްރަށަށް ދަތުރުކުރާނެ ކަމަށް ވެސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
