ދިވެހިރާއްޖޭގެ ގާނޫނުއަސާސީ އާއި ވެރިކަމުގެ ވައްޓަފާޅި އާއި ރައްޔިތުންގެ މަޖިލީހާއި އިގުތިސާދީ އޮނިގަނޑަށް ބޮޑެތި ބަދަލުތަކެއް ގެނައުމަށް ހުށަހެޅުންތަކެއް ހުށަހަޅައިފި އެވެ.
މިއީ ކުރީގެ ރައީސް މުޙައްމަދު ނަޝީދާއި އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް އިސްވެ ހުށައަޅާ ހުށައަޅަ އެވެ. އެ ހުށައެޅުންތަކުގެ ތަފްސީލް ހާމަކުރަން "ބޮޑު ބަދަލު" ނަމުގައި ދެ ބޭފުޅުން މިއަދު ވަނީ ނޫސްވެރީންގެ ބައްދަލްވުމެއް ބާއްވާފަ އެވެ.
މި ހުށަހެޅުންތަކުގައި ވެރިކަމުގެ ނިޒާމަށް ގެންނަން ހުށަހަޅާ ބަދަލުތަކުގެ ތެރޭގައި ދައުލަތުގެ އެންމެ މަތީ ވެރިޔާ އާއި ސަރުކާރުގެ ވެރިޔާ ތަފާތު ދެ މަގާމެއްގެ ގޮތުގައި ކަނޑައެޅުން ހިމެނެ އެވެ. ދައުލަތުގެ އެންމެ މަތީ ވެރިޔާ ކަމުގައި ހަމަޖައްސާނީ ރައީސުލްޖުމްހޫރިއްޔާ ކަމަށާއި، އެ މަގާމަށް ބޭފުޅަކު އައްޔަނުކުރާނީ އިންތިހާބީ މަގާމުތަކުގައި ތިބި މީހުންގެ އައުލަބިއްޔަތު ވޯޓުން ކަމަށް ހުށަހަޅައިފައިވެ އެވެ. ސަރުކާރު ހިންގާ ވެރިޔާ ހޮވާނީ މިހާރެކޭ ވެސް އެއްގޮތަށް ރައްޔިތުންގެ ސީދާ ވޯޓުންނެވެ. އަދި ރައްޔިތުންގެ މަޖިލީހަށް ސަރުކާރުގެ ވެރިޔާ ޖަވާބުދާރީ ކުރެވޭނެ ނިޒާމެއް ގާއިމުކުރުން ވެސް ހިމެނެ އެވެ.
ގާނޫނުއަސާސީ އަށް ގެންނަން ހުށަހަޅާ ބަދަލުތަކުގެ ތެރޭގައި މިނިވަން މުއައްސަސާތައް ޒިންމާދާރުކުރުވުމަށް އޯވާސައިޓް ކޮމިޝަނެއް ގާއިމުކުރުމާއި، ސުޕްރީމް ކޯޓުގެ ފަނޑިޔާރުންނާއި އެ ކޮމިޝަނުގެ މެންބަރުން ވަކިކުރެވޭނީ ރައްޔިތުންގެ އާންމު ވޯޓުން ކަމަށް ހެދުމާއި، ކައުންސިލަރުންނާއި މަޖިލީހުގެ މެންބަރުން ހިމެނޭ ގޮތަށް ނޫނީ ބައެއް ކަހަލަ ބަދަލުތައް ނުގެނެވޭ ގޮތަށް ހެދުން ހިމެނެ އެވެ.
ރައްޔިތުންގެ މަޖިލީހަށް ގެންނަން ހުށަހަޅާ ބަދަލުތަކުގެ ތެރޭގައި މަޖިލީހުގެ އަދަދު ގާނޫނުއަސާސީގައި ކަނޑައެޅުމާއި، ގައުމީ މަސްލަހަތަށް ވަކާލާތު ކުރާނެ ގައުމީ މެންބަރުންނަށް ފުރުސަތު ދިނުމާއި، އަންހެނުންނަށް މަޖިލީހަށް އާދެވޭނެ އިތުރު ގޮތްތައް ހޯދުމާއި، މެންބަރުންގެ ރިކޯލް ވޯޓެއްގެ ނިޒާމު ގާއިމުކުރުން ހިމެނެ އެވެ.
އިގުތިސާދީ ފުދުންތެރިކަން އިތުރުކުރުމަށް ހުށަހަޅާ ބަދަލުތަކުގެ ތެރޭގައި ސަރުކާރުގެ ފައިދާވާ ކުންފުނިތައް ސޮވްރިން ވެލްތު ފަންޑެއްގެ ދަށަށް ބަދަލުކުރުމާއި، ދައުލަތުގެ ޕްރޮކިއުމަންޓަށް ހާއްސަ މިނިވަން އިދާރާއެއް ގާއިމުކުރުމާއި، ގުދުރަތީ ވަސީލަތްތައް ފަނާކޮށް ދައުލަތުން ކުރަމުންދާ ބޮޑު އިސްރާފު ހުއްޓުވުމާއި، ބަޖެޓުގެ ބޮޑު ބައެއް އުފެއްދުންތެރި ދިވެހި ވިޔަފާރިވެރިން ބިނާކުރުމަށް ހާއްސަކުރުން ހިމެނެއެވެ. މީގެ އިތުރުން ޑެފިސިޓާއި ދަރަނީގެ ނިސްބަތް ގާނޫނީ ގޮތުން ކަނޑައެޅުމާއި، ދައުލަތުން ވިޔަފާރިވެރިންނާ އެކު ހަދާ އެއްބަސްވުންތަކާ އެއްގޮތަށް އަމަލުކުރާކަން ކަށަވަރުކުރުން ވެސް ހުށަހެޅުންތަކުގައި ހިމެނެ އެވެ.
މި ހުށަހެޅުންތައް ހުށަހަޅައިފައި ވަނީ 2008 ވަނަ އަހަރުގެ ގާނޫނުއަސާސީން ގެނެސްދިން ކުރިއެރުންތައް ފާހަގަކުރައްވައި، ނަމަވެސް ރައީސުލްޖުމްހޫރިއްޔާގެ ބާރުތައް ގިނަވެ ދިވެހިރާއްޖެ ދަރަނީގެ ދަންތުރައަކަށް ވެއްޓި ރައްޔިތުންގެ އަސާސީ ހައްގުތައް ހަނިވާން ފެށުމާ ގުޅިގެން، ބޮޑު ބަދަލެއް ގެނައުން މުހިންމު ކަމަށް ބަޔާންކޮށް ކަމަށް އެ ބޭފުޅުން ވިދާޅުވި އެވެ.
Advertisement
This content is created and paid for by advertisers and does not involve Voice Journalists
