ގާނޫނު އަސާސީން ރައްޔިތުންނަށް ލިބިދީފައިވާ ޙައްގުތަކުގެ ބޭނުން ކޮށްގެން އެހެންމީހުންގެ ހައްގުތަކަށް އަރައިގަންނަ ނަމަ އެ ހައްގުތައް ހަނިކުރަންޖެހޭނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިއަދުގެ ނޫސްވެރިންގެ ބައްދަލުވުމުގައި ރައީސް ވިދާޅުވީ، މުޒާހަރާކޮށް ޚިޔާލުފާޅުކުރުމަކީ ޤާނޫނުއަސާސީން ރައްޔިތުންނަށް ލިބިދީފައިވާ ޙައްގެއް ކަމަށެވެ. ނަމަވެސް އެ ޙައްގުތައް ދީފައިވަނީ ވަކި ހުދޫދެއްގެ ތެރެއިންކަންވެސް ފާހަގަކުރެއްވިއެވެ. އެގޮތުން މުޒާހަރާ ކުރުމާއި ޚިޔާލުފާޅުކުރުން ފަދަ ކަންކަން ކުރެވޭނެ ގޮތްތަކާއި، ކުރާނެ ތަންތަންވެސް ގާނޫނާއި ގަވާއިދުގައި ބަޔާންކޮށްފައިވާ ކަމަށް ވިދާޅުވިއެވެ.
ރައީސް ވިދާޅުވީ ނިމިދިޔަ ސަރުކާރުގައި އެއްވެއުޅުމަށް ކަނޑައަޅާފައިވާ ތަންތަނުގެ އިތުރަށް ފަސް ތަނެއް މި ސަރުކާރުން ކަނޑައަޅާފައިވާ ކަމަށެވެ. ނަމަވެސް މުޒާހަރާކުރަން އެތަންތަނަށް އެއްވުމުގެ ބަދަލުގައި އެއްވަމުންދަނީ މަގުތައް މައްޗަށާއި އާއްމުންނަށް އުނދަގޫވާފަދަ ތަންތަނަށްކަން އެމަނިކުފާނު ފާހަގަކުރެއްވިއެވެ.
ދެން މީހުންނަށް އުނދަގޫވާގޮތަށް މަގުމަތީގައި، ދެން މަގުމަތީގައި ހިނގާފައިވެސް ދަނީ މިސާލަކަށް، އެކަމަކު އޭގެ އިތުރަށް ހަޑިހުތުރު ބަސްތައް ބޭނުންކުރުން، ދީނާ ޚިލާފް ކަމެއް، ހަޑިހުތުރު ޢަމަލުތައް ކުރުން، ދީނާ ޚިލާފް ކަމެއް.
ރައީސް މުޢިއްޒު
ރައީސް ވިދާޅުވީ، މަގުތަކުގައި ހަޑިހުތުރު ގޮތްތަކަށް އުޅުމަކީ ރައްޔިތުންވެސް ހިތްހަމަޖެހޭނެ ކަމެއް ނޫންކަމަށެވެ. އަދި ހައްގުތަކުގެ ބޭނުންކޮށްގެން އެހެން ރައްޔިތުންގެ ހައްގުތަކަށް އަރައިގަނެވިގެން ނުވާނެ ކަމަށްވެސް ވިދާޅުވިއެވެ.
އަޅުގަނޑުމެން ކޮންމެ މީހެއްގެވެސް އެބައޮތް ޙައްގުތަކެއް. އެކަމަކު އެ ހައްގުތައް އެހެން މީހުންގެ ހައްގުތަކަށް އަރައިގަންނަ ހިސާބުން ޖެހޭނީ ލިމިޓް ކުރަން.
ރައީސް މުޢިއްޒު
ދާދިފަހުން ރަސްދޫގައި ބޭއްވި ޖަލްސާގައި ވާހަކަދައްކަވަމުންވެސް ރައީސް ވަނީ އިދިކޮޅު ފަރާތްތަކުގެ މުޒާހަރާތަކުގައި ދީނީ އަދި އަހުލާޤީ މިންގަނޑުން ބޭރު އަމަލުތައް ހިންގާތަން ފެންނަމުންދާކަމަށް ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
