އެމެރިކާ އަދި އިސްރާއީލުން އިސްވެ އީރާނަށް ދިން ހަމަލާތަކާ ގުޅިގެން މެދުކަނޑާލާފައި އޮތް އީރާނުގެ އެތެރޭގެ ވައިގެ އުދުހުންތައް  އަލުން ފެށުމަށް ތައްޔާރުވެއްޖެއެވެ.

އީރާނުގެ ތަސްނީމް ނިއުސް އޭޖެންސީން ރިޕޯޓްކުރާ ގޮތުގައި، މި އުދުހުންތައް އަލުން ފަށާނީ މާދަމާއެވެ. އަދި ފުރަތަމަ ފްލައިޓް ދަތުރުކުރާނީ، ތެހްރާނުން އީރާނުގެ މަޝްހާދަށެވެ. އަދި މަޝްހާދުން އެ ފްލައިޓް ހަމަ އެދުވަހު އަނބުރާ ތެހެރާނަށް ދަތުރުކުރާނެކަމަށް އެ ނޫހުން ވަނީ ބުނެފައެވެ. މިއީ 50 ދުވަހުގެ މެދުކެނޑުމަކަށްފަހު އެތެރޭގެ ދަތުރުތައް ބާއްވާ ފުރަތަމަ ފަހަރެވެ.

މިއަހަރުގެ ފެބްރުއަރީ މަހުގެ 28 ވަނަ ދުވަހު އީރާނަށް އެމެރިކާއާއި އިސްރާއީލުން ގުޅިގެން ދިން ހަމަލާގެ ސަބަބުން މެދުއިރުމަތީގެ ގިނަ ގައުމުތަކަށް ވަނީ ހަމަލާތައް އަމާޒުވެ، ވައިގެދަތުރުފަތުރަށް ވަރަށް ބޮޑަށް އަސަރުކޮށްފައެވެ. އެގޮތުން، ދުނިޔޭގެ އެންމެ ބޮޑު ޓްރާންސިޓް ހަބް ދުބާއި އިންޓަރނޭޝަނަލް އެއާރޕޯޓްގެ ދަތުރުފަތުރަށް ވެސް ވަނީ ހަމަލާތައް އަމާޒުވެ، ފްލައިޓްތައް އުދުހުން ހުއްޓިފައެވެ. 

ވައިގެ ދަތުރުފަތުރުގެ އިތުރުން ދުނިޔޭގެ ތެލުގެ ބާޒާރަށްވެސް ވަނީ މި ހަނގުރާމައިގެ ސަބަބުން ވަރަށް ބޮޑަށް އަސަރުކޮށްފައެވެ. ހޮރްމޫޒް ކަނޑުއޮޅި ބަންދުކުރުމުން، ރާއްޖެ ހިމެނޭހެން ގިނަ ގައުމުތަކެއްގައި ތެލުގެ ހަރަދު ބޮޑުވެފައިވާއިރު، އޮސްޓްރޭލިއާ ފަދަ ބައެއް ގައުމުތަކަށް ދަނީ ތެޔޮ ލިބުމުގެ ދަތިތަކާއި ކުރިމަތިލަމުންނެވެ. 

މެދުއިރުމަތީގެ ހަނގުރާމަ 2 ހަފުތާގެ މުއްދަތަކަށް ހުއްޓާލުމަށް އީރާނާއި އެމެރިކާ އަދި އިސްރާއީލުން އެއްބަސްވެފައިވާއިރު، މި އެއްބަސްވުން ނިމުމުން އައު އެއްބަސްވުމެއް ގާއިމުކުރެވޭނެކަމާއި މެދު ގިނަ ބަޔަކު ދަނީ ސުވާލު އުފައްދަމުންނެވެ.