ރައްޔިތުން މަޖިލީހުގެ ނައިބުރައީސްކަމުގެ މަގާމުން ދިއްގަރު ދާއިރާގެ މެމްބަރު އަހުމަދު ނާޒިމް ވަކިކުރަން އުޅޭ ވާހަކަ، ޕީއެންސީގެ ޕީޖީ ލީޑަރު އިބްރާހިމް ފަލާހް ދޮގުކުރައްވައިފިއެވެ.
މަޖިލީހުގެ ނައިބުރައީސް ކަމުގެ މަގާމުން ނާޒިމް ވަކިކުރުމުގެ އަޑުތަކެއް އަރާފައިމިވަނީ، މަޖިލީހުގެ އެންމެ ބޮޑު ދެ ކޮމިޓީން އޭނާ ވަކިކޮށްފައިވަނިކޮށެވެ. މިއާއެކު މަޖިލީހުގެ ނައިބުގެ މަގާމުން ނާޒިމް ވަކިކުރުމުގެ މަސައްކަތް ޕީއެންސީގެ ތެރެއިން ފަށާފައިވާކަމަށް ވަނީ އަޑުތައް ފެތުރިފައެވެ.
މިކަމާ ގުޅިގެން ވޮއިސްއިން ފަލާހްއަށް ގުޅާލުމުން ފޯނު ނުނަންގަވާތީ ވަނީ އޭނާގެ ބަހެއް ލިބޭގޮތް ނުވެފައެވެ. ނަމަވެސް ބައެއް މީޑިއާތަކަށް މައުލޫމާތު ހިއްސާކުރަމުން ފަލާހް ވަނީ، އެވާހަކަތައް ދޮގުކުރައްވާފައެވެ. އެގޮތުން ނާޒިމް ވަކިކުރުމަށް ޕާޓީގެ ތެރެއިން މަސައްކަތް ފަށާފައިވާކަމަށް ދެކެވޭ ވާހަކަތަކަކީ ކަނޑައެޅިގެން ދޮގު ވާހަކަތަކެއްކަމަށް ވިދާޅުވެފައި ވެއެވެ.
މަޖިލީހުގެ ނައިބުރައީސްކަމުގެ މަގާމުން ނާޒިމް ވަކިކުރުމުގެ މަސައްކަތް ކުރާކަމަށް ދެކެވޭ ވާހަކަ ޕީއެންސީގެ ޕީޖީ ލީޑަރު ދޮގުކުރެއްވިއިރު، މަޖިލީހުގެ މާލިއްޔަތު ކޮމިޓީ އާއި 241 ކޮމިޓީ ނުވަތަ ސަލާމަތީ ހިދުމަތްތަކާ ބެހޭ ކޮމިޓީން ވަނީ ނާޒިމް ވަކިކުރައްވާފައެވެ. އެ ދެކޮމިޓީން ވަކިކުރި ސަބަބެއްކަމަށް ބައެއް މީޑިއާތަކުގައި ނާޒިމް ވިދާޅުވެފައިވަނީ، ކޮމިޓީއަށް އެކަށީގެންވާ ގޮތެއްގައި ވަގުތު ނުދެވޭތީއެވެ. އެގޮތުން ރަސްމީ ކަންކަމާއި، އަދި އަމިއްލަ ބައެއް ކަންކަމުގައި ރާއްޖެއިން ބޭރުގައި ގިނައިން އުޅެންޖެހޭކަން ނާޒިމް ވަނީ ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
