2026 ވަނަ އަހަރު އެމެރިކާ، މެކްސިކޯ އަދި ކެނެޑާގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕްގައި އީރާނުގެ ބަދަލުގައި އިޓަލީ ބައިވެރިކުރުމަށް އެމެރިކާގެ ރައީސް ޑޮނަލްޑް ޓްރަމްޕްގެ ހާއްސަ މަންދޫބު ޕައޮލޯ ޒަމްޕޮލީ، ފީފާގެ ރައީސް ޖިއާނީ އިންފަންޓީނޯއަށް ހުށަހަޅުއްވައިފިއެވެ.
މި ހުށަހެޅުމަކީ އީރާނާއި އެމެރިކާއާ ދެމެދު އޮތް ސިޔާސީ ނުތަނަވަސްކަމާއި ސަލާމަތީ ކަންކަމަށް ރިއާޔަތްކޮށް ހުށަހެޅި ހުށަހެޅުމެއް ކަމަށް ރިޕޯޓްތައް ބުނެއެވެ.
މި ހުށަހެޅުމުގެ މައިގަނޑު މަގްސަދަކީ އެމެރިކާގެ ރައީސް ޓްރަމްޕާއި އިޓަލީގެ ބޮޑުވަޒީރު ޖިއޯޖިއާ މެލޯނީއާ ދެމެދު އޮތް ގުޅުން ރަނގަޅުކުރުން ކަމަށް ބެލެވެއެވެ. އީރާނުގެ ހަނގުރާމައާ ގުޅިގެން ޕޯޕް ލިއޯ އަށް ޓްރަމްޕް ކުރެއްވި ފާޑުކިޔުންތަކުގެ ސަބަބުން، އިޓަލީގެ ބޮޑުވަޒީރާއި ޓްރަމްޕާ ދެމެދު އޮތް ގުޅުމަށް ވަނީ އަސަރުކޮށްފައެވެ. ޒަމްޕޮލީ ވިދާޅުވި ގޮތުގައި އިޓަލީއަކީ ހަތަރު ފަހަރު ވޯލްޑް ކަޕް ކާމިޔާބުކޮށްފައިވާ ގައުމަކަށް ވުމުން، އެ ގައުމަށް މި މުބާރާތުން ފުރުސަތު ދިނުމަކީ ހައްގު ކަމެކެވެ.
އީރާނަކީ އޭޝިއާ ސަރަހައްދުގެ ކޮލިފައިން ކާމިޔާބުކޮށް، އަމިއްލަ ހައްގުގައި ވޯލްޑް ކަޕްގެ ޖާގައެއް ކަށަވަރުކޮށްފައިވާ ގައުމެކެވެ. ނަމަވެސް، އިޓަލީއަށް މިފަހަރުގެ ވޯލްޑް ކަޕުން ޖާގަ ގެއްލުނީ ޔޫރަޕްގެ ޕްލޭއޮފް ފައިނަލްގައި ބޮސްނިއާ އަތުން ޕެނަލްޓީ ޖަހައިގެން ބަލިވުމާ ގުޅިގެންނެވެ. މިއީ ޖެހިޖެހިގެން އިޓަލީ ވޯލްޑް ކަޕަށް ކޮލިފައިނުވި ތިންވަނަ ފަހަރެވެ.
މި ހުށަހެޅުމާ ގުޅިގެން ފީފާއިން ބުނެފައިވަނީ އީރާނަކީ ކޮލިފައިވެފައިވާ ގައުމެއް ކަމަށާއި، އެ ގައުމުގެ ބަދަލުގައި އެހެން ގައުމަކަށް ފުރުސަތު ދިނުމުގެ އެއްވެސް ޕްލޭނެއް މިހާތަނަށް ނެތް ކަމަށެވެ. އިންފަންޓީނޯ ވިދާޅުވީ އީރާނުގެ ޓީމު މުބާރާތުގައި ބައިވެރިވާނެ ކަމަށާއި، އެއީ އެ ގައުމުގެ ރައްޔިތުން ތަމްސީލުކުރާ ޓީމު ކަމަށެވެ. އީރާނުގެ ފުޓްބޯޅަ ފެޑަރޭޝަނުން ވެސް ވަނީ މުބާރާތުގައި ބައިވެރިވުމަށް ފުރިހަމައަށް ތައްޔާރުވަމުންދާ ކަމަށް ބުނެފައެވެ.
މި މައްސަލައާ ގުޅިގެން ބައިނަލްއަގުވާމީ ފުޓްބޯޅަ ދުނިޔޭގައި ބޮޑު ބަހުސެއް ވަނީ އުފެދިފައެވެ. ގިނަ ބަޔަކު ގަބޫލުކުރާ ގޮތުގައި ކުޅިވަރުގެ ތެރެއަށް ސިޔާސީ ނުފޫޒު ވަދެ، ދަނޑުމަތީގައި ހޯދާ ކާމިޔާބީގެ ބަދަލުގައި ސިޔާސީ ސަބަބުތަކަށްޓަކައި މުބާރާތުގެ ޖާގަތައް ބަދަލުކުރުމަކީ ފުޓްބޯޅައިގެ ރޫހާ ހިލާފު ކަމެކެވެ. ނަމަވެސް، ފީފާގެ ގަވާއިދު ބުނާގޮތުން އެއްވެސް ގައުމަކުން މުބާރާތުން ވަކިވެއްޖެ ނަމަ، އެ ގައުމުގެ ބަދަލުގައި ބައިވެރިވާނެ ގައުމެއް ކަނޑައެޅުމުގެ ފުރިހަމަ އިހުތިޔާރު ފީފާއަށް ލިބިގެންވެއެވެ.
Advertisement
This content is created and paid for by advertisers and does not involve Voice Journalists
