އިސްލާމްއާބާދުގައި އެމެރިކާގެ އޮފިޝަލުންނާ އެކު އެއްވެސް ބައްދަލުވުމެއް ބޭއްވުމަށް ރާވާފައި ނުވާނެ ކަމަށް އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބަގާއީ ވިދާޅުވެއްޖެއެވެ.
އީރާނާއި އެމެރިކާ އާ ދެމެދު އުފެދިފައިވާ ނުތަނަވަސްކަން ކުޑަކުރުމަށް މަޝްވަރާތައް ކުރުމަށް ރާވަމުންދާކަމަށް ދެކެވެމުންދާ ވާހަކަތަކާ ގުޅޭގޮތުން ބަގާއީ ވިދާޅުވީ، މިކަމުގައި އީރާނުގެ ހުށަހެޅުންތަކާއި ވިސްނުންތައް އިސްލާމްއާބާދުގެ އޮފިޝަލުން މެދުވެރިކޮށް އެމެރިކާގެ މަންދޫބުންނަށް ފޯރުކޮށްދޭނެއެވެ.
އޭނާ ވިދާޅުވިގޮތުގައި އެމެރިކާއާއެކު އެއްވެސް ކަހަލަ ކުރިއެރުމެއް ނުވަތަ މަޝްވަރާއެއް ކުރިއަށް ގެންދެވޭނީ، ގިނަ ޝަރުތުތަކެއް ފުރިހަމަވެގެންކަމަށެވެ. މީގެ ތެރެއިން އެންމެ މުހިންމު ކަމެއްގެ ގޮތުގައި އީރާނުން ހުށަހަޅަނީ ހޮރްމޫޒް ކަނޑުއޮޅި ސަރަހައްދުގައި އެމެރިކާއިން ހިންގަމުންދާ އަސްކަރީ ބްލޮކޭޑް ވަގުތުން ހުއްޓާލުމަށެވެ.
އީރާނުން ސިފަކުރާ ގޮތުގައި ހޮރްމޫޒް ކަނޑުއޮޅީގައި އެމެރިކާގެ ކަނޑުގެ ސިފައިން ހިންގަމުންދާ ހަރަކާތްތަކަކީ ކުރިއަށް އޮތް ދުވަސްތަކުގައި ބޭއްވިދާނެ ސީދާ މަޝްވަރާތަކަށް އޮތް އެންމެ ބޮޑު ހުރަހެވެ. އަދި މި ބަންދުކުރުމަކީ ހަނގުރާމައިގެ އަމަލެއްގެ ގޮތުގައާއި ކަނޑުފޭރުމުގެ އަމަލެއްގެ ގޮތުގައި އީރާނުގެ އޮފިޝަލުން ވަނީ ސިފަކުރައްވާފައެވެ.
މީގެ އިތުރުން، އެމެރިކާގެ ރައީސް ޑޮނަލްޑް ޓްރަމްޕް ބޭނުންކުރައްވާ ބިރުދެއްކުމުގެ ބަހުރުވަ ނުވަތަ އިންޒާރުތައް ބަލައިނުގަންނާނެ ކަމަށް ވެސް އީރާނުން ވަނީ ބުނެފައެވެ. އީރާނުން ގަބޫލުކުރާ ގޮތުގައި މިފަދަ އިންޒާރުތަކަކީ ސަރަހައްދީ މަސްލަހަތު ގޯސްވެ، މަޝްވަރާގެ މާހައުލު ގެއްލިގެންދާނެ ކަމެކެވެ.
ޕާކިސްތާނުން މެދުވެރިއެއްގެ ދައުރު އަދާކުރަމުންދާ މި ދަނޑިވަޅުގައި، އީރާނުގެ ފޮރިން މިނިސްޓަރު އައްބާސް އަރަގްޗީ ވަނީ އިސްލާމްއާބާދަށް ވަޑައިގެންފައެވެ. އެ މަޝްވަރާތަކުގައި އީރާނާއި އެމެރިކާއި ދެމެދު އެއްވެސް އެއްބަސްވުމެކައް އާދެވިފައެއް ނުވެއެވެ. އެގޮތުން، އީރާނުގެ ސަރުކާރުން ތަކުރާރުކޮށް ބުނަމުންދަނީ އެމެރިކާގެ މަންދޫބުންނާ ސީދާ ބައްދަލުކުރުމުގެ ބަދަލުގައި މެސެޖުތައް ބަދަލުކުރާނީ ޕާކިސްތާނުގެ އޮފިޝަލުން މެދުވެރިކޮށް ކަމަށެވެ.
މިދިޔަ ފެބްރުއަރީ މަހު އެމެރިކާއާއި އިސްރާއީލުން ގުޅިގެން އީރާނަށް ދޭން ފެށި ހަމަލާތަކުގެ ސަބަބުން މެދުއިރުމަތީގެ މަސްރަހު ވަނީ ވަރަށް ބޮޑަށް ގޯސްވެ، މެދުއިރުމަތީގައި ހަނގުރާމަ ފެށިފައެވެ. އެމެރިކާ، އިސްރާއީލް އަދި އީރާނުން 2 ހަފުތާގެ މުއްދަތަކަށް ހަނގުރާމަ ހުއްޓާލުމަށް މިހާރު އެއްބަސްވެފައި އޮތް ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ދަނީ ހަނގުރާމަ އަލުން ފަށާނެ ކަމުގެ އިންޒާރު ދެމުންނެވެ.
Advertisement
This content is created and paid for by advertisers and does not involve Voice Journalists
