އެމްޑީޕީން ބޭއްވި މުޒާހަރާގައި މާލެ ސިޓީގެ މޭޔަރު، އާދަމް އާޒިމް އަށް އަމާޒުކޮށް ރޭ ދިން ހަމަލާ ކުރީގެ ރައީސް އިބްރާހިމް މުހައްމަދު ސޯލިހް ހަރުކަށި އިބާރާތުން ކުށްވެރިކުރައްވައިފިއެވެ.

ރޭ ކުރިއަށްދިޔަ މުޒާހާރާގެ ތެރެއިން މުޒާހަރާގެ ބައިވެރިންނާއެކު ކުރިއަށްދަނިކޮށް، ކުރިމަތިން އައި މީހަކު ވަނީ އާޒިމްގެ މޭމަތީ އަތްއަޅައި ކޮށްޕާލާފައެވެ. އެވަގުތު އާޒިމްއާއެކު ތިބި މީހުން ވަނީ, އޭނާ ހުއްޓުވާފައެވެ. މިކަމާ ގުޅިގެން ރައީސް ސޯލިހް އެކްސްގައި ކުރެއްވި ޕޯސްޓްގައި ވަނީ މި ހަމަލާ އަވަސް ގޮތެއްގައި ތަޙުޤީޤު ކޮށް، މޭޔަރަށް ބޭނުންވާ ފުރިހަމަ ރައްކާތެރިކަން ފޯރުކޮށްދިނުމަށް ފުލުހުންނަށާއި ކަމާބެހޭ ފަރާތްތަކަށް ގޮވާލާފައެވެ.

ރައީސް ސޯލިހް ވިދާޅުވީ، އެއްވެ އުޅުމާއި، ޚިޔާލުފާޅުކުރުމާއި ސިޔާސީ ހަރަކާތްތައް ހިންގުމަކީ ޤާނޫނުަސާސީން އެންމެނަށް ކަށަވަރުކޮށްދީފައިވާ ހައްޤުތަކެއްކަމަށް ވިދާޅުވެފައެވެ.

އަދި ސުލްހަވެރި ސިޔާސީ ހަރަކާތްތައް ހިންގުމަށް އަމާން މާހައުލެއް ގާއިމުކޮށްދިނުމަކީ ކަމާބެހޭ އިދާރާ ތަކުގެ މަސްއޫލިޔަތެއްކަންވެސް ރައީސް ސޯލިހް ވަނީ ފާހަގަކުރައްވާފައެވެ. 

މިކަމާ ގުޅޭގޮތުން މީޑިއާ އާ ވާހަކަދައްކަވަމުން އާޒިމް ވިދާޅުވީ، އޭނާއަށް ހަމަލާދިނީ ގްރޫއްޕަކުން ކަމަށާއި، މޭމަތީގައި ޖެހުމުން ކޮންމެވެސް ވަރަކަށް ރިހުން ހުރިކަމަށެވެ. އާޒިމް ވިދާޅުވީ މިއީ ސަރުކާރުން ރާވައިގެން ދިން ހަމަލާއެއްކަމަށެވެ. 

މޭޔަރަށް ދިން ހަމަލާ ބައެއް ފަރާތްތަކުން ކުށްވެރިކޮށްފައިވާއިރު، މިއީ ކިހިނެތްވެގެން ދިން ހަމަލާއެއްކަމެއް އަދި ސާފެއް ނުވެއެވެ. އަދި މިކަމާ ގުޅިގެން މިހާތަނަށް ފުލުހުން ވަކި އެއްޗެއް ބުނެފައެއް ނުވެއެވެ.