ޔޫރަޕިއަން ކޮމިޝަންގެ ރައީސާ އުރްސުލާ ވޮން ޑަރ ލޭޔަން، އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލަން އަދި މާ އަވަސް ކަމަށް ވިދާޅުވެއްޖެ އެވެ.

އޭނާ މިހެން ވިދާޅުވީ، ހޯމަ ދުވަހު ޖަރުމަނުގެ ބާލިންގައި ބޭއްވުނު ސީޑީޔޫ އަދި ސީއެސްޔޫ ޕާޓީގެ ބައްދަލުވުމެއްގައެވެ.

ވޮން ޑަރ ލޭޔަން ފާހަގަކުރެއްވި ގޮތުގައި، އީރާނާ ދެކޮޅަށް މި ފިޔަވަޅުތައް އަޅަންޖެހުނު މައިގަނޑު ސަބަބަކީ އެ ގައުމުގެ އާންމު ރައްޔިތުންނާ މެދު އީރާނު ސަރުކާރުން ގެންގުޅޭ ހަރުކަށި އުސޫލުތަކާއި އިންސާނީ ހައްގުތަކަށް އަރައިގަތުމެވެ. މިހެންކަމުން، މި ދަނޑިވަޅުގައި ދަތިކުރުމުގެ ފިޔަވަޅުތައް އުވާލުމަކީ އެންމެ ރަނގަޅު ގޮތް ނޫން ކަމަށް އޭނާ ވިދާޅުވިއެވެ.

މި ފިޔަވަޅުތައް އުވާލުމާ މެދު ވިސްނޭނީ އީރާނުގެ ސިޔާސަތުތަކަށް އަސާސީ ބޮޑު ބަދަލެއް އައިސްގެން ކަމަށްވެސް ވޮން ޑަރ ލޭޔަން ބާލިންގައި ވާހަކަދައްކަވަމުން ވިދާޅުވިއެވެ. އަދި އީރާނުން އަމިއްލަ ރައްޔިތުންނަށް ދެމުންދާ އަނިޔާތަކާއި ހިންގާ ހުދުމުޚުތާރު އަމަލުތައް ހުއްޓާލުމަކީ މި ބަދަލުގެ މުހިންމު ބައެއްކަން އޭނާ ފާހަގަކުރެއްވިއެވެ.

މީގެ އިތުރުން، އީރާނުގެ ސަބަބުން މެދުއިރުމަތީގެ މަސްރަހަށް އަންނަ ބަދަލުތަކާއި، ކަނޑުދަތުރުފަތުރަށް ހުރަސްއެޅުމުގެ މައްސަލަތަކާ ގުޅިގެން ޔޫރަޕްގެ އިއްތިހާދުން ވަނީ ދާދި ފަހުން އީރާނާ ދެކޮޅަށް އިތުރު ފިޔަވަޅުތަކެއްވެސް އަޅާފައެވެ. މީގެ ތެރޭގައި ހޮރްމޫޒް ކަނޑުއޮޅީގައި އުޅަނދުފަހަރަށް ހުރަސްއެޅުމާ ގުޅިގެން އެޅި ފިޔަވަޅުތައް ހިމެނެއެވެ.

މިދިޔަ ފެބްރުއަރީ މަހު އެމެރިކާ އާއި އިސްރާއީލުން ގުޅިގެން އީރާނަށް ހަމަލާދޭން ފެށުމުން، އީރާނުން ވަނީ ދިފާއުވުމުގެ ގޮތުން މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް ހަމަލާދޭން ފަށާފައެވެ. އީރާނުން ބުނާ ގޮތުގައި، މިހާރު 2 ހަފުތާގެ މުއްދަތަކަށް ހަނގުރާމަ މެދުކަނޑާލުމަށް އެއްބަސްވި ނަމަވެސް، ދާއިމީ ގޮތެއްގައި ހަނގުރާމަ ހުއްޓާލެވޭނީ ޒަމާނުށްސުރެ އަޅާފައިވާ ފިޔަވަޅުތައް ބާތިލް ކުރުމުންނެވެ.

އެމެރިކާއާ ހުޅަނގުން އީރާނާއި ދެކޮޅަށް ފިޔަވަޅުތަކެއް އެޅީ އެ ގައުމުގެ ސަރުކާރާއި ދެކޮޅަށް ތަފާތު އެކި ވާހަކަތައް އުފަންކުރުމަށް ފަހު އެވެ. އިރާންގައި ހިންގާ ކަންކަމަށް ވުރެ އެމެރިކާއާ ހުޅަނގުގެ ގައުމުތަކުގައި ޑިމޮކްރެސީއާ ބީރައްޓެހި އެތައް ކަމެއް ދަނީ ހިންގަމުންނެވެ.