މިއަހަރުގެ ޖޫން މަހު ފަށާ ފީފާ ވޯލްޑް ކަޕްގައި، އިދިކޮޅު ކުޅުންތެރިއަކާ ކުރިމަތިލާއިރު އަނގަމަތީގައި އަތްއަޅައިގެން ހުންނަ ކުޅުންތެރިންނަށް ރަތް ކާޑު ދައްކައި ދަނޑުން ފޮނުވާލެވޭ ގޮތަށް ގަވާއިދަށް ބަދަލު ގެނައުމަށް ފީފާއިން ނިންމައިފިއެވެ.

މި ނިންމުން ނިންމާފައިވަނީ ވެންކޫވަރުގައި ބޭއްވުނު އިންޓަނޭޝަނަލް ފުޓްބޯޅަ އެސޯސިއޭޝަން ބޯޑްގެ ބައްދަލުވުމެއްގައެވެ.

މި އާ ގަވާއިދު ތައާރަފްކުރަން ނިންމީ ނަސްލީ ތަފާތުކުރުންތަކާ ދެކޮޅަށް ކުރާ މަސައްކަތުގެ ބައެއްގެ ގޮތުގައެވެ. ފީފާގެ ރައީސް ޖިއާނީ އިންފަންޓީނޯ ވިދާޅުވި ގޮތުގައި، ކުޅުންތެރިއަކު ކަމެއް ފޮރުވަން ނޫޅޭނަމަ ވާހަކަ ދައްކާއިރު އަނގަމަތީގައި އަތްއަޅަން ނުޖެހޭނެ ކަމަށާއި، މިގޮތަށް އަތްއަޅައިގެން ދައްކާ ވާހަކައަކުން ނަސްލީ ތަފާތުކުރުމުގެ މައްސަލައެއް ނުކުމެއްޖެނަމަ އެ ކުޅުންތެރިއަކަށް ވަގުތުން ރަތް ކާޑު ދައްކަން ޖެހޭނެއެވެ.

މި ބަދަލު ގެންނަން ނިންމާފައިވަނީ މިދިޔަ ފެބްރުއަރީ މަހު ބެންފީކާގެ ޖިއަންލޫކާ ޕްރެސްޓިއާނީ އާއި ރިއަލް މެޑްރިޑްގެ ވިނީސިއަސް ޖޫނިއާ އާ ދެމެދު ހިނގި ހާދިސާއަކާ ގުޅިގެންނެވެ. ޗެމްޕިއަންސް ލީގުގެ އެ މެޗުގައި ޕްރެސްޓިއާނީ އޭނާގެ ޖާޒީން އަނގަމަތި ނިވާކޮށްގެން ހުރެ ވިނީސިއަސްއާ ދިމާލަށް ނަސްލީ ގޮތުން އިހާނެތި ބަސްތަކެއް ބުނި ކަމަށް ތުހުމަތު ކުރެވުނެވެ.

އެ ހާދިސާއާ ގުޅިގެން ޔޫއެފާ އިން ވަނީ ޕްރެސްޓިއާނީ ހަ މެޗަށް ސަސްޕެންޑް ކޮށްފައެވެ. ނަމަވެސް އޭނާގެ މައްޗަށް ނަސްލީ ތަފާތުކުރުމުގެ ކުށް ސާބިތުވެފައި ނުވާ ކަމަށާއި، ސަސްޕެންޑް ކުރީ ޖިންސީ ފުރައްސާރަ އެކުލެވޭ ބަސްތަކެއް ބޭނުންކުރުމާ ގުޅިގެން ކަމަށް ރިޕޯޓްތައް ބުނެއެވެ.

މި އާ ގަވާއިދުގެ ދަށުން، އިދިކޮޅު ކުޅުންތެރިއަކާ ޒުވާބުކުރާ ވަގުތު އަނގަމަތި ނިވާކުރުމަކީ ރެފްރީގެ އިޚުތިޔާރުގައި ރަތް ކާޑު ދެއްކިދާނެ ކަމެކެވެ. މީގެ އިތުރުން، ރެފްރީގެ ނިންމުމަކާ ހިތްހަމަނުޖެހިގެން އިހުތިޖާޖު ކުރުމުގެ ގޮތުން ދަނޑުން ފައިބައިގެންދާ ކުޅުންތެރިންނަށް ވެސް މިއަހަރުގެ ވޯލްޑް ކަޕްގައި ރަތް ކާޑު ދައްކާނެއެވެ.