ދުނިޔޭގެ ބާޒާރުގައި ސާފުނުކުރާ ތެލުގެ އަގު 2022 ވަނަ އަހަރަށްފަހު އެންމެ މަތީ މިންވަރަކަށް ބުދަ ދުވަހު އުފުލިއްޖެއެވެ.

ބުދަ ދުވަހުގެ މެންދުރުގެ ވަގުތެއްގައި ބްރެންޓް ކްރޫޑްގެ އަގު ވަނީ 7.3 އިންސައްތަ މައްޗަށް ގޮސް، ފީފާއެއް 119.34 ޑޮލަރަށް އަރާފައެވެ. އަދި ދުވަހުގެ އެންމެ މަތީ އަގުގެ ގޮތުގައި 119.76 ޑޮލަރު ރެކޯޑު ކުރެވިފައިވެއެވެ. މިއާއެކު މި ހަފުތާގެ ތެރޭގައި ތެލުގެ އަގު ވަނީ 10 އިންސައްތައަށްވުރެ ބޮޑަށް އުފުލިފައެވެ.

ތެލުގެ އަގު މިހާ ބޮޑަށް އުފުލެން މެދުވެރިވި މައިގަނޑު ސަބަބަކީ އީރާނުގެ ތެޔޮ އެކްސްޕޯޓް ކުރުން ހުއްޓުވުމަށް އެމެރިކާގެ ރައީސް ޑޮނަލްޑް ޓްރަމްޕް ގެންގުޅޭ ހަރުކަށި ސިޔާސަތުތަކެވެ. މީގެ ރައްދުގައި އީރާނުން ވަނީ ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހޮރްމުޒް ކަނޑުއޮޅި، އެހެން ގައުމުތަކުގެ ތެޔޮ ޓޭންކަރުތަކަށް ބަންދުކޮށްފައެވެ.

ތެލުގެ އަގު އުފުލުމާ ގުޅިގެން އެމެރިކާގެ ހިއްސާގެ ބާޒާރަށްވެސް ވަނީ އޭގެ އަސަރުކޮށްފައެވެ. އެސް އެންޑް ޕީ 500 އިންޑެކްސް 0.2 އިންސައްތަ ދަށަށް ދިޔައިރު، ޑޯ ޖޯންސް އިންޑަސްޓްރިއަލް އެވްރެޖް ވަނީ 335 ޕޮއިންޓް ނުވަތަ 0.7 އިންސައްތަ ދަށަށް ގޮސްފައެވެ. އަދި ނަސްޑާކް ކޮމްޕޮސިޓް ވަނީ 0.3 އިންސައްތަ ދަށަށް ގޮސްފައެވެ.

މާކެޓްތަކުން މިހާރު އެންމެ ބޮޑަށް އިންތިޒާރު ކުރަމުންދަނީ ފެޑަރަލް ރިޒާވްގެ އިންޓްރެސްޓް ރޭޓާ ގުޅޭ ނިންމުމަށެވެ. ތެލުގެ އަގު އުފުލުމަކީ އިންފްލޭޝަން އިތުރުވާނެ ކަމެއް ކަމަށްވިޔަސް، ގިނަ އިންވެސްޓަރުން ލަފާކުރަނީ އިންޓްރެސްޓް ރޭޓަށް ބަދަލެއް ނާންނާނެ ކަމަށެވެ. މިއީ ފެޑްގެ ޗެއާމަން ޖެރޯމް ޕަވަލްގެ ފަހު ބައްދަލުވުމަށް ވުން އެކަށީގެންވާއިރު، އިންޓްރެސްޓް ރޭޓް އަވަހަށް ދަށްނުކުރާތީ ރައީސް ޓްރަމްޕްގެ ފާޑުކިޔުންތައް ޕަވަލްއަށް ވަނީ އަމާޒުވެފައެވެ.

މިދަނޑިވަޅުގައި ބައެއް ބޮޑެތި ކުންފުނިތަކުގެ މާލީ ރިޕޯޓްތައް އާންމުކުރުމާއެކު ހިއްސާގެ ބާޒާރަށް ވަނީ ލޮޅުންތަކެއް އަރާފައެވެ. ވިސާގެ ހިއްސާ 9 އިންސައްތަ އުފުލުނުއިރު، ސްޓާބަކްސްގެ ހިއްސާވެސް ވަނީ 9.1 އިންސައްތަ މައްޗަށް ގޮސްފައެވެ. ނަމަވެސް ޖީއީ ހެލްތްކެއާގެ ހިއްސާ 11.9 އިންސައްތަ ދަށަށް ދިޔައިރު، ރޮބިންހުޑް މާކެޓްސްގެ ހިއްސާ ވަނީ 14.1 އިންސައްތަ ދަށަށް ގޮސްފައެވެ.

ބުކިން ހޯލްޑިންގްސް އިން ހާމަކުރި ގޮތުގައި އީރާނުގެ ހަނގުރާމައިގެ ސަބަބުން ދަތުރުފަތުރުގެ ދާއިރާއަށް ވަނީ ނޭދޭވޭ އަސަރުތަކެއް ކޮށްފައެވެ. މީގެ އިތުރުން އިންވެސްޓަރުން މިހާރު ބަލަމުންދަނީ އަލްފަބެޓް، އެމެޒޯން، މެޓާ އަދި މައިކްރޯސޮފްޓް ފަދަ ޓެކްނޮލޮޖީ ކުންފުނިތަކުގެ ރިޕޯޓްތަކަށެވެ. މިއީ އާޓިފިޝަލް އިންޓެލިޖެންސް (އޭއައި) އަށް ކުރާ ބޮޑެތި ހޭދަތަކުން ފައިދާވަމުންދޭތޯ ބެލުމަށެވެ. މި ދާއިރާގެ ބޮޑު ކުންފުންޏެއް ކަމަށްވާ އެންވީޑިއާގެ ހިއްސާގެ އަގު ބުދަ ދުވަހު ވަނީ 1.7 އިންސައްތަ ދަށަށް ގޮސްފައެވެ.