އީރާނާއެކު ހިނގަމުންދިޔަ ހަނގުރާމަ ނިމިއްޖެ ކަމަށް ވައިޓް ހައުސްއިން ރަސްމީކޮށް އެމެރިކާގެ ކޮންގްރެސްއަށް އަންގައިފިއެވެ.
މެދުއިރުމަތީގެ ސަރަހައްދުގައި އަދިވެސް އެމެރިކާގެ އަސްކަރީ ބާރުތައް ތިބި ނަމަވެސް، އީރާނާއެކު އޮތް ހަނގުރާމައިގެ ހާލަތު މިހާރު ނިމިފައިވާ ކަމަށް އެމެރިކާގެ ސަރުކާރުން ވަނީ ކަނޑައަޅާފައެވެ.
މި ނިންމުން އައިސްފައިވަނީ އެމެރިކާއާއި އިސްރާއީލުން ގުޅިގެން އީރާނާ ދެކޮޅަށް ހަނގުރާމަ ފެށިތާ 60 ދުވަސް ފަހުން، އިއްޔެއެވެ. އެމެރިކާގެ "ވޯ ޕަވާސް ރިޒޮލިއުޝަން" ބުނާގޮތުން، ރައީސަކު ހަނގުރާމައެއް ފައްޓަވާތާ 60 ދުވަސް ތެރޭގައި ކޮންގްރެސްގެ ހުއްދަ ހޯއްދަވަން ޖެހެއެވެ. ނަމަވެސް، ހަނގުރާމަ ނިމިފައިވާ ކަމަށް އެންގުމާއެކު، މި ހުއްދަ ހޯދުމުގެ ގާނޫނީ ލާޒިމުކަން މިހާރު ވަނީ އުނިވެފައެވެ.
އެމެރިކާގެ ރައީސް ޑޮނަލްޑް ޓްރަމްޕް ހުކުރު ދުވަހު ވިދާޅުވެފައިވަނީ، "ވޯ ޕަވާސް ރިޒޮލިއުޝަން" އަކީ ގާނޫނުއަސާސީއާ ހިލާފު އެއްޗެއް ކަމަށެވެ. ޓްރަމްޕްގެ މި ވާހަކައާއި ގުޅިގެން، އަސްކަރީ ހަރަކާތްތައް ހިންގުމުގައި ރައީސަށް ލިބިވަޑައިގަންނަވާ ބާރުތަކާ މެދު ކޮންގްރެސްގެ ތެރޭގައި ބޮޑެތި ބަހުސްތަކެއް ވަނީ އުފެދިފައެވެ.
ވައިޓް ހައުސްއިން ކޮންގްރެސްއަށް ފޮނުވި ރަސްމީ ލިޔުމުގައި ބުނެފައިވަނީ، އީރާނާއެކު ކުރެވުނު ކުރިމަތިލުންތައް މިހާރު ނިމިފައިވާ ކަމަށާއި، އެމެރިކާގެ ސިފައިން މިހާރު އެ ސަރަހައްދުގައި ތިބީ ހަމައެކަނި ދިފާއީ ބޭނުންތަކަށާއި ހަމަޖެހުން ގާއިމުކުރުމަށް ކަމަށެވެ. މި އެންގުމާއެކު، ހަނގުރާމަ ކުރިއަށް ގެންދިއުމަށް ކޮންގްރެސްގެ ރުހުން ހޯދުމަށް ކުރިން އޮތް މުހުލަތު ވަނީ ހަމަވެފައެވެ.
މި މައްސަލައިގައި ކޮންގްރެސްގެ ބައެއް މެންބަރުން ދަނީ ކަންބޮޑުވުން ފާޅުކުރަމުންނެވެ. އެ ބޭފުޅުން ގަބޫލުކުރައްވާ ގޮތުގައި، ހަނގުރާމަ "ނިމިއްޖެ" ކަމަށް ކަނޑައެޅީ ކޮންގްރެސްގެ ބާރުތައް ކަނޑުވާލުމުގެ ގޮތުންނެވެ. ނަމަވެސް ސަރުކާރުން ބުނަމުންދަނީ މިއީ އޮންނަ އުސޫލުގެ ތެރެއިން ނިންމި ނިންމުމެއް ކަމަށެވެ.
މެދުއިރުމަތީގައި ހިނގަމުންދިޔަ މި ހަނގުރާމައިގެ ސަބަބުން ދުނިޔޭގެ ތެލުގެ އަގުވެސް ވަނީ އިންތިހާއަށް އުފުލިފައެވެ. އެގޮތުން ރާއްޖެ ހިމެނޭހެން އޭޝިއާ ބައްރުގެ ގިނަ ގައުމުތަކުން ދިޔައީ ހަރަދު ކުޑަ ކުރުމުގެ ގޮތުން ގިނަ ފިޔަވަޅުތަކެއް އަޅަމުންނެވެ. ވައިޓް ހައުސްއިން ހަނގުރާމަ ނިމިއްޖެ ކަމަށް ކޮންގްރެސް އަށް އެންގި ނަމަވެސް، ގިނަ ބަޔަކު ދެކެނީ މިއީ ވަގުތީ ނިމުމެއްގެ ގޮތުގައެވެ.
Advertisement
This content is created and paid for by advertisers and does not involve Voice Journalists
