ނޫސް މަޖައްލާތައް ރަޖިސްޓްރީކުރުމަށް އުސޫލެއްގެ ތެރެއިން ފީއެއް ނެގުމަށް ނިންމާފައިވާކަމަށް މީޑިއާތަކުގެ ބަލަދުވެރިފަރާތް، މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން (އެމްއެމްބީސީ) ބުނެފިއެވެ.
ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން އެމްއެމްބީސީގެ ޑިރެކްޓަރ ބްރޯޑްކާސްޓް ރެގިއުލޭޝަން އިބްރާހިމް އަޝްރަފް ވިދާޅުވީ، ނޫސްތަކާއި މަޖައްލާތައް ރަޖިސްޓްރީކުރުމަށް ފީއެއްނެގުމަށް ނިންމާފައިވާކަމަށެވެ. މީގެކުރިންނަމަ، ނޫސް މަޖައްލާ ރަޖިސްޓްރީކުރުމަށް ފީ ދައްކާކަށެއް ނުޖެހެއެވެ.
އަޝްރަފް ވިދާޅުވީ، ކޮމިޝަނުން ބޭނުންވަނީ މީޑިއާތައް މިހާރަށްވުރެ ހަރުދަނާގޮތެއްގައި ކުރިއަށްގެންދާ ތަންތަންކަމުގައި ހަދަންކަމަށެވެ. އެގޮތުން ނޫސްތައް ރަޖިސްޓްރީކުރާއިރު 5،000 ރުފިޔާގެ ފީއެއް ނެގުމަށް ނިންމާފައިވާކަން ފާހަގަކުރަމުން އޭނާ ވިދާޅުވީ، ނޫހެއް ރަޖިސްޓްރީކޮށްދޭނީ ދެން ފަސްއަހަރުގެ މުއްދަތަށްކަމަށެވެ. އަދި މަޖައްލާއެއްނަމަ 3،750 ރުފިޔާއަށް ކަމަށެވެ.
އޭގެ އިތުރުން ކޮންމެ ރަޖިސްޓްރޭޝަނަކަށް 100 ރުފިޔާގެ ޕްރޮސެސިން ފީއެއް ނަގަމުންދާނަން
އެމްއެމްބީސީގެ ޑިރެކްޓަރ ބްރޯޑްކާސްޓް ރެގިއުލޭޝަން އިބްރާހިމް އަޝްރަފް
މީޑިއާ ކޮމިޝަނުން ވަނީ ނޫސް މަޖައްލާތައް ކޮމިޝަނުގެ ދަފްތަރުގައި ރަޖިސްޓްރީކުރުމަށް ހުޅުވާލާފައެވެ. އެގޮތުން ދަފްތަރުވުމަށް ދީފައިވަނީ، ހަ މަސްދުވަހުގެ މުއްދަތެކެވެ.
ނޫސްތަކުން ރަޖިސްޓްރީކުރާއިރު 5،000 ރުފިޔާގެ ފީއެއް ނެގުމަށް ކޮމިޝަނުން ބުނުމުން ބައެއް ނޫސްވެރިން ވަނީ އެކަމާ ގުޅޭގޮތުން ކަންބޮޑުވުން ފާޅުކޮށްފައެވެ.
Advertisement
This content is created and paid for by advertisers and does not involve Voice Journalists
