ރައީސް މުއިއްޒުގެ ސަރުކާރުގައި، ދިވެހިން ބުރަ މަސައްކަތުން ހޯދާފައިވާ ހިޔާލު ފާޅުކުރުމުގެ މިނިވަންކަމާއި މީޑިއާގެ މިނިވަންކަން 2008 ގެ ކުރީގެ ހާލަތަށް ގޮސްފައިވާ ކަމަށް އެމްޑީޕީގެ ކުރީގެ ޗެއަރޕާސަން، ފައްޔާޟު އިސްމާއިލް ވިދާޅުވެއްޖެއެވެ.
ފައްޔާޟު މިހެން ވިދާޅުވީ، ދުނިޔޭގެ ނޫސްވެރިކަމުގެ މިނިވަންކަމުގެ ދުވަހާ ގުޅިގެން އޭނާ އެކްސްގައި ކުރެއްވި ޕޯސްޓެއްގައެވެ.
ދުނިޔޭގެ ނޫސްވެރިކަމުގެ މިނިވަންކަމުގެ ދުވަހާ ގުޅިގެން ފައްޔާޟު ވިދާޅުވީ، "މީޑިއާ ކޮންޓްރޯލް" ބިލާއި، "ކޮންޓްރޯލް ކޮމިޝަން" ގެ މަސައްކަތްތަކަކީ ސަރުކާރާ ދެކޮޅު ހިޔާލުތައް ފިއްތާލުމަށާއި މިނިވަން ނޫސްވެރިން ބިރުގަންނަވައި ނުފޫޒު ފޯރުވުމަށް ރައީސުލްޖުމްހޫރިއްޔާ ބޭނުންކުރައްވާ ވަސީލަތްތަކެކެވެ. އަދި ކޮރަޕްޝަނާއި ސަރުކާރުގެ ނާގާބިލުކަމާ ދެކޮޅަށް ވާހަކަދައްކާ ނޫސްވެރިންނަށް މެދުނުކެނޑި އިންޒާރުތަކާއި ފުރައްސާރަ ކުރިމަތިވަމުންދާ ކަމަށްވެސް އޭނާ ވަނީ ފާހަގަކޮށްފައެވެ.
ފައްޔާޟުގެ ޕޯސްޓުގައި އޭނާ އިތުރަށް ވިދާޅުވީ، ދައުލަތުގެ ފަރާތުން ކުރިމަތިވާ އަނިޔާވެރިކަމުން ނޫސްވެރިން ރައްކާތެރިކުރަން ޖެހޭ ކަމަށެވެ. މިހާރު ހުށަހެޅިފައިވާ ”ކޮންޓްރޯލް ބިލް“ އުވާލައި، ނޫސްވެރިން އަމިއްލައަށް ރެގިއުލޭޓްކުރާ މިނިވަން ނޫސްވެރިކަމަކަށް ހިތްވަރުދީ، ހިޔާލު ފާޅުކުރުމަށް މިނިވަން މާހައުލެއް ގާއިމުކޮށްދޭން ޖެހޭ ކަމަށް އޭނާ ގޮވާލެއްވިއެވެ.
ގާނޫނުއަސާސީގެ 27 ވަނަ މާއްދާއަކީ ހަމައެކަނި ކަރުދާހުގައި ލިޔެފައިވާ ބަސްތަކެއްގެ ބަދަލުގައި، އަމަލީ ގޮތުން ތަންފީޒުވާ ހަގީގަތަކަށް ހަދަންޖެހޭ ކަމަށް ފައްޔާޟު ވިދާޅުވިއެވެ. އެއްވެސް ނޫސްވެރިއަކަށް ދައުލަތުން އިންތިޒާމުކޮށްގެން ދޭ އިންޒާރުތަކާ ކުރިމަތިލާން ނުޖެހޭނެ ކަމަށާއި، އަދި އެއްވެސް މީޑިއާ އައުޓްލެޓެއް ބަންދުކޮށްފާނެ ކަމުގެ ބިރުވެރިކަމުގެ ހިޔަނިއެއްގެ ދަށުގައި މަސައްކަތް ކުރަން ނުޖެހޭނެ ކަމަށް އޭނާ ފާހަގަކުރެއްވިއެވެ.
ނޫސްވެރިކަމުގެ މިނިވަންކަމަކީ ހަގީގީ ޖަވާބުދާރީވުން އޮތް ހަމައެކަނި މަގު ކަމަށާއި، މި ދާއިރާގެ ކުރީސަފުގައި މަސައްކަތްކުރާ ނޫސްވެރިންނާއެކު ދެމިތިބޭނެ ކަމަށް ވިދާޅުވެ ފައްޔާޟު ވަނީ ނޫސްވެރިންނަށް ތާއީދު އޮތްކަން ހާމަކުރައްވާފައެވެ.
Advertisement
This content is created and paid for by advertisers and does not involve Voice Journalists
