އެމްޓީސީސީގެ ޑެޕިއުޓީ މެނޭޖިންގ ޑިރެކްޓަރުގެ މަގާމަށް އަހުމަދު މުބީން އައްޔަނުކޮށްފިއެވެ.
މުބީން މި މަގާމަށް އައްޔަނުކޮށްފައިވަނީ މިއަދު އެވެ. އަދި އެމްޓީސީސީން މިކަން އިއުލާންކޮށްފައިވަނީ، އެ ކުންފުނީގެ ރަސްމީ އެކްސް އެކައުންޓްގައި ކުރި ޕޯސްޓަކުންނެވެ.
މުބީން އަކީ ކުރިން ރީޖަނަލް އެއާޕޯޓްސްގެ މެނޭޖިންގ ޑިރެކްޓަރުގެ މަގާމުގައި ހުންނެވި ބޭފުޅެކެވެ. ނަމަވެސް މިދިޔަ އަހަރު އޭނާ ވަނީ އެ މަގާމުން އިސްތިއުފާ ދެއްވާފައެވެ.
އެމްޓީސީސީގެ ޑީއެމްޑީގެ މަގާމު ކުރިން އަދާކުރައްވަމުން ގެންދިއައީ، އަހުމަދު ޝަރީފް އަބްދުލް ރަހްމާން ޔޫސުފް އެވެ. އޭނާ އެ މަގާމަށް އައްޔަނުކޮށްފައިވަނީ، މިދިޔަ އަހަރުގެ ޖަނަވަރީ މަހުގެ 26 ވަނަ ދުވަހުއެވެ.
އެ މަގާމުން އޭނާ އިސްތިއުފާ ދެއްވީ މިދިޔަ މަހުގެ 28 ވަނަ ދުވަހުއެވެ. އަދި އިސްތިއުފާ ދެއްވި ސަބަބެއް ހާމަކޮށްފައެއް ނުވެއެވެ.
މިދިޔަ މަހު ސަރުކާރުން ހިންގާ ކުންފުނިތަކުގެ ލީޑަރޝިޕަށް ބޮޑެތި ބަދަލުތަކެއް ގެނެސްފާވާއިރު، ވަޒީރުންގެ މަޖިލީހުން 10 ވަޒީރަކު ވެސް އިސްތިއުފާ ދީފާވެއެވެ.
Advertisement
This content is created and paid for by advertisers and does not involve Voice Journalists
