އިނގިރޭސި ޕްރިމިއާ ލީގުގައި އިއްޔެ ކުޅުނު ފޯރިގަދަ މެޗުގައި ޔުނައިޓެޑުން ލިވަޕޫލް 2-3 އިން ބަލިކޮށް، އަންނަ ސީޒަނުގެ ޔޫއެފާ ޗެމްޕިއަންސް ލީގުން މެންޗެސްޓަރ ޔުނައިޓެޑް ޖާގައެއް ކަށަވަރުކޮށްފިއެވެ.

އޯލްޑް ޓްރެފޯޑްގައި ކުޅުނު މި މެޗުން ލިބުނު މޮޅާއެކު، ދެ އަހަރުގެ މެދުކެނޑުމަކަށްފަހު ޔޫރަޕްގެ އެންމެ ޝަރަފުވެރި މުބާރާތަށް ޔުނައިޓެޑް މިވަނީ އަލުން އެނބުރި އައިސްފައެވެ.

މެޗުގެ ކުރީކޮޅު ޔުނައިޓެޑުން ވަނީ ދެ ލަނޑުގެ ލީޑެއް ނަގާފައެވެ. ފުރަތަމަ ލަނޑު މެޗުގެ 6 ވަނަ މިނެޓުގައި މެތިއަސް ކޫންހާ ކާމިޔާބުކޮށްދިންއިރު، އޭގެ ކުޑަވަގުތުކޮޅެއް ފަހުން ބެންޖަމިން ސެސްކޯ ވަނީ ޔުނައިޓެޑްގެ ދެވަނަ ލަނޑު ޖަހައިދީފައެވެ. ނަމަވެސް، ދެވަނަ ހާފު ފެށިގެން ލިވަޕޫލްގެ ޑޮމިނިކް ސޮބޯސްލާއީ އަދި ކޯޑީ ގަކްޕޯ ޖެހި ލަނޑުތަކުން ނަތީޖާ ހަމަހަމަ ކުރިއެވެ.

ޔުނައިޓެޑަށް މެޗުން މޮޅުވި ލަނޑު ކާމިޔާބުކޮށްދިނީ ޒުވާން މިޑްފީލްޑަރު ކޮބީ މައިނޫއެވެ. މި މޮޅާއެކު ޔުނައިޓެޑް މިހާރު އޮތީ ތާވަލުގެ ތިންވަނައިގައި، ހަތަރުވަނައިގައި އޮތް ލިވަޕޫލަށްވުރެ ހަ ޕޮއިންޓް ކުރީގައެވެ. ލީގުގައި ބާކީ ތިން މެޗު އޮއްވައި ޔުނައިޓެޑުން މިވަނީ ގަދަ ފަހެއްގެ ޖާގައެއް ކަށަވަރުކޮށްފައެވެ.

މި ކާމިޔާބީއަކީ މިދިޔަ ޖެނުއަރީ މަހު ވަގުތީ ކޯޗެއްގެ ގޮތުގައި ޓީމާ ހަވާލުވި މައިކަލް ކެރިކްގެ އިރުޝާދުގެ ދަށުން ހޯދި މުހިންމު ކުރިއެރުމެކެވެ. ކެރިކް ހަވާލުވި ފަހުން ކުޅުނު މެޗުތަކުގެ ތެރެއިން 10 މެޗުން ޔުނައިޓެޑް ވަނީ މޮޅުވެފައެވެ. މީގެ އިތުރުން، މިއީ 2015 ވަނަ އަހަރުގެ ސީޒަނަށްފަހު ލީގުގައި ލިވަޕޫލް އަތުން ޔުނައިޓެޑް ހޯމް އަދި އަވޭ މެޗުން މޮޅުވި ފުރަތަމަ ފަހަރުވެސް މެއެވެ.

އަންނަ ސީޒަނުގެ ޗެމްޕިއަންސް ލީގުން އިނގިރޭސި ލީގުގެ މަދުވެގެން ފަސް ޓީމަކަށް ޖާގަ ލިބޭނެއެވެ. ޔުނައިޓެޑްގެ އިތުރުން އާސެނަލް އަދި މެންޗެސްޓަރ ސިޓީން ވެސް ވަނީ މުބާރާތުގެ ޖާގަތައް ކަށަވަރުކޮށްފައެވެ.