ޤައުމީ ބޭންކްގެ ނިންމުންތައް ހުންނަނީ "ޕެޗްވޯކް" އެއްގެ ގޮތަށްކަމަށް ވިދާޅުވެ، އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ބޭންކް އޮފް މޯލްޑިވްސްއަށް ވަރަށްބޮޑަށް ފާޑުވިދާޅުވެއްޖެއެވެ.
ފައްޔާޒް އެކްސްގައި ކުރެއްވި ޕޯސްޓެއްގައި ވަނީ ބީއެމްއެލުން ރައްޔިތުންނާ ގުޅުންހުރި ހިދުމަތްތަކަށް ކުއްލި ކުއްލިއަށް ބަދަލުގެންނަކަން ފާހަގަކުރައްވައި އެކަމުގެ ކަންބޮޑުވުން ފާޅުކުރައްވާފައެވެ. ފައްޔާޒް ކުރެއްވި ޕޯސްޓްގައި ވިދާޅުވީ، ބީއެމްއެލުން މިފަހަކުން ޑޮލަރިގެ މުއާމަލާތްތަކަށް ކުއްލިއަކަށް ގެނައި ކޮންޓްރޯލްގެ ސަބަބުން ރައްޔިތުންނަށް އެތަކެއް ތަކްލީފްތަކެއް ލިބިގެންދާނޭކަމެއް ކަމަށެވެ. ފައްޔާޒް ވިދާޅުވީ، ކުއްލިއަކަށް ޑޮލަރު ދޫކުރުން ކޮންޓްރޯލްކުރުމަށް ނިންމި ނިންމުމުގެ ސަބަބުން، މިހާރުވެސް މާލީ ދަތިތަކާ ކުރިމަތިލާންޖެހިފައިވާ އާއިލާތަކަށާއި ވިޔަފާރިތަކަށް އިތުރު ބުރައަކާއި ތަކުލީފްތަކެއް އުފުލަން ޖެހޭނޭކަމަށެވެ.
ފައްޔާޒް ވިދާޅުވީ، ކިޔަވާ ކުދިންނާއި، ކުދި އަދި މެދުފަންތީގެ ވިޔަފާރިތަކުގެ އިތުރުން އާންމު އާއިލާތަކަކީ ޒަރޫރީ ބޭނުންތަކަށްޓަކައި ބީއެމްއެލުން ދޫކުރާ ޑޮލަރަށް ބަރޯސާވަމުން އަންނަ ބައެއްކަމަށެވެ. މިފަދަ ކުއްލި ނިންމުންތަކުގެ ސަބަބުން އެފަރާތްތަކަށް މިކަމުގައި އިތުރަށް ދަތިތައް ކުރިމަތިލާންޖެހި، ކުރިމަގާ މެދު އޮތް ނުތަނަވަސްކަން އިންތިހާއަށް އިތުރުވެގެންދާނޭކަމަށް ފައްޔާޒް ފާހަގަކުރެއްވިއެވެ.
ފައްޔާޒް ވިދާޅުވީ ބޭރު ފައިސާގެ ސިޔާސަތުތަކަށް ތަކުރާރުކޮށް މިފަދަ ކުއްލި ބަދަލުތައް ގެނައުމަކީ، ގައުމުގެ ހާލަތު ވަޒަންކުރަން ނޭނގޭކަމުގެ ހެތްކެއް ކަމަށެވެ.އަދި ބަލިކަށި ލީޑަޝިޕެއްގެ ދަށުން މުއައްސަސާތައް ހިންގުމުގެ ނަތީޖާއަކީ ހާލަތު އިތުރަށް ގޯސްވެގެން ދިއުންކަން ފައްޔާޒް ފާހަގަކުރެއްވިއެވެ. ފައްޔާޒް ވިދާޅުވީ، ކުރިމަތިވާ ކަންކަމުން ވިސްނަންޖެހޭވަރަށް ނުވިސްނައި ނިންމާ މިފަދަ ނިންމުންތަކުގެ ޤައުމުގެ އިގްތިސާދަށާއި، ވަކިވަކި ފަރުދުންނަށްވެސް އެކަމުގެ ނޭދެވޭ އަސަރުތައް ކުރާނޭކަމަށެވެ.
ބައެއް ކަންކަމުގައި ބީއެމްއެލުން މިހާރު ނިންމަމުންދާ ނިންމުންތައް ފައްޔާޒް ސިފަކުރައްވާފައިވަނީ، ނާގާބިލުކަން ފޮރުވުމަށްޓަކައި ނިންމާ ވަގުތީ އަދި "ޕެޗްވޯކް" އެއްގެ ގޮތުގައެވެ.
ފައްޔާޒް ވިދާޅުވީ، ބޭނުންވަނީ ކަންކަން ދިމާވުމުން އެއަށް ރައްދު ދިނުމުގެ ބަދަލުގައި، ފުންކޮށް ވިސްނައި، ހަރުދަނާ ދާއިމީ ބަދަލުތަކެއް ގެނައުންކަމަށެވެ ސަރުކާރުން ބޭނުންވާގޮތަށް ބީއެމްއެލުން ކަންކަން ނިންމުމުގެ ބަދަލުގައި އިގްތިސާދު އިނދަޖެހުމުން ސަލާމަތްކުރުމަށް އަވަސް ފިޔަވަޅުތަކެއް އަޅަންޖެހޭކަމަށް ފައްޔާޒް ވިދާޅުވިއެވެ. މީގެ އިތުރުން ރައްޔިތުންގެ ބުރަ މަސައްކަތުން ހޯދައި ބޭންކަށް ޖަމާކުރަމުންދާ ފައިސާގެ ރައްކާތެރިކަން ކަށަވަރުކުރުމަށްޓަކައި ހަރުދަނާ ފިޔަވަޅުތަކެއް އަޅަންޖެހޭކަންވެސް ފައްޔާޒްގެ ޕޯސްޓްގައި ވަނީ ފާހަގަކުރައްވާފައެވެ.
ބީއެމްއެލުން ވަނީ މީހުންގެ ޑެބިޓްކާޑުތައް ހިފައިގެން ރާއްޖެއިން ބޭރަށްގޮސް ކުރާ ކާޑުގެ މުއާމަލާތްތައް ހުއްޓުވުމަށް ވިޔަވަޅުތަކެއް އެޅުމަށް ނިންމިކަން މިދިޔަ ހޮނިހިރުދުވަހު ހާމަކޮށްފައެވެ. މީގެ އިތުރުން އޮންލައިން ސައިޓްތަކުން ވިޔަފާރިކުރަމަށް އެ ބޭންކުގެ ކާޑުތަކަށް މީގެކުރިން ދީފައިވާ ބައެއް ދޫތަށް ވަނީ ހިފަހައްޓާފައެވެ. މީގެ މައިގަނޑު ސަބަބެއްކަމަށް ބީއެމްއެލުން ބުނީ، ނަހަމަގޮތުގައި އެ ހިދުމަތްތައް ބޭނުންކުރާ މީހުންގެ އަމަލުތައް ހުއްޓުވުމެވެ.
މީހުންގެ ޑެބިޓްކާޑުތައް ހިފައިގެން ރާއްޖެއިން ބޭރަށް ގޮސް ކުރާ މުއާމަލާތްތައް ހުއުްޓުވަން ނިންމީ ބައެއް ފަރާތްތަކުން ވިޔަފާރީގެ އެކި ބޭނުންތަކުގައި މީހުންގެ ކާޑުތައް ގެންގޮސްގެން ނަހަމަގޮތުގައި ޑޮލަރު ނެގުންފަދަ ކަންކަން ކުރާތީއެވެ.
ބޭންކަށް ޑޮލަރު ލިބޭ މިންވަރަށްވުރެ ގިނައިން ޑޮލަރު ބޭރުކުރަންޖެހޭތީވެ ބީއެމްއެލުން ވަނީ ބޭރުފައިސާގެ މުއާމަލާތްތައް ރައްޔިތުންނަށް ވީހާވެސް ހަމަހަމަ ގޮތެއްގައި ފޯރުކޮށްދިނުމަށް ހަރުދަނާ ފިޔަވަޅުތަކެއް އެޅުމަށް ނިންމައި ތަންފީޒުކުރަން ފަށާފައެވެ. ބޭންކްތަކަށް ޑޮލަރު ލިބުން ދަތިވުމާ ގުޅިގެން ރާއްޖޭގެ އެހެން ބޭންކުތަކުންވެސް ވަނީ ފިޔަވަޅުތައް އަޅާފައެވެ. މިގޮތުން ދިވެހި ރުފިޔާގެ އެކައުންޓަށް ކުރިން ދޫކުރަމުން އައި ވިސާ ޑެބިޓް ކާޑުތައް ދޫކުރުން ހުއްޓާލުމާއި ބޭރުފައިސާ އާ ގުޅުންހުރި އެނޫންވެސް މުއާމަލާތްތައް ވަނީ ވަރަށްބޮޑަށް ހިފަހައްޓާފައެވެ.
Advertisement
This content is created and paid for by advertisers and does not involve Voice Journalists
