އިންޑިއާގެ ވެސްޓް ބެންގާލް ސްޓޭޓް އިންތިޚާބުގައި ބޮޑުވަޒީރު ނަރެންދުރަ މޯދީގެ ބީޖޭޕީ އަތުން ބޮޑު ބައްޔަކާ ކުރިމަތިލެއްވުމަށް ފަހުވެސް، ޗީފް މިނިސްޓަރު މަމަތާ ބެނަރޖީ އިސްތިއުފާ ދެއްވަން ދެކޮޅު ހައްދަވައިފިއެވެ.

ވެސްޓް ބެންގާލްގައި 2011 ވަނަ އަހަރުން ފެށިގެން ވެރިކަން ކުރަމުން އައި މަމްތާގެ ޓްރީނަމޫލް ކޮންގްރެސް (ޓީއެމްސީ) ބަލިކޮށް، 294 ގޮނޑީގެ ތެރެއިން ތިންބައިކުޅަ ދެބައަށް ވުރެ ގިނަ ގޮނޑި ބީޖޭޕީ ވަނީ ކާމިޔާބުކޮށްފައެވެ. ޓީއެމްސީ އަށް ކުރިން ލިބިފައި އޮތް 215 ގޮނޑި 80 ގޮނޑިއަށް ވެއްޓުނުއިރު، މަމްތާގެ އަމިއްލަ ގޮނޑިވެސް ވަނީ ގެއްލިފައެވެ. ބެނަރޖީ ބަލިކުރެއްވީ ބީޖޭޕީގެ ސުވެންދު އަދިކާރީއެވެ.

ވެސްޓް ބެންގާލްގައި ބީޖޭޕީ މީގެ ކުރިން ދުވަހަކުވެސް ވެރިކަން ކޮށްފައި ނުވާއިރު، މި ކާމިޔާބީ އަކީ ސިޔާސީ ގޮތުން އެޕާޓީއަށް ލިބުނު ވަރަށް ބޮޑު ކާމިޔާބީއެއް ކަމަށެވެ. މި ކާމިޔާބީއާ އެކު އިރުމަތީ އިންޑިއާގެ ގާތްގަނޑަކަށް ހުރިހާ ސްޓޭޓެއް ބީޖޭޕީގެ ބާރުގެ ދަށަށް ވަނީ އައިސްފައެވެ.

"އަޅުގަނޑު އިސްތިއުފާ ނުދޭނަން، އަޅުގަނޑު ބައްޔެއް ނުވޭ... ރަސްމީ ގޮތުން އިލެކްޝަން ކޮމިޝަން މެދުވެރިކޮށް އެމީހުންނަށް (ބީޖޭޕީ އަށް) އަޅުގަނޑުމެން ބަލިކުރެވިދާނެ، އެކަމަކު މޯރަލީ މި އިންތިޚާބު ކާމިޔާބުކުރީ އަޅުގަނޑުމެން" ނޫސް ބްރީފިންގެއްގައި މަމްތާ ވިދާޅުވިއެވެ.

މަމްތާ ވިދާޅުވީ ގާތްގަނޑަކަށް 100 ގޮނޑި ޓީއެމްސީ އަތުން "ގަދަކަމުން ފޭރިގެންފައިވާ" ކަމަށާއި، އިލެކްޝަން ކޮމިޝަން "ވަކި ފަރާތަކަށް ޖެހިފައިވާ" ކަމަށެވެ. ނަމަވެސް މި ތުހުމަތުތަކަށް ހެކި ހުށަހަޅުއްވައިފައެއް ނުވެއެވެ.

ވެސްޓް ބެންގާލްގެ ޗީފް އިލެކްޓޯރަލް އޮފިސަރު މަނޯޖް ކުމާރު އަގަރްވާލް ވަނީ މި ތުހުމަތުތަކަކީ "އެއްވެސް އަސާސެއް ނެތް" ވާހަކަތަކެއް ކަމަށް ވިދާޅުވެފައެވެ.

އިންޑިއާގެ ޤާނޫނު އަސާސީ ބުނާ ގޮތުން ސްޓޭޓްގެ ގަވަރުނަރަށް މަމްތާ އިސްތިއުފާ އަށް އެދެވިދާނެއެވެ. ނުވަތަ ދައުރު ހަމަވަންދެން މަޑުކުރެއްވިދާނެއެވެ. ބެނަރޖީގެ ދައުރު ބުރާސްފަތި ދުވަހު ހަމަވާނެއެވެ.

އިންތިޚާބުގެ ނަތީޖާ ހިފައިގެން ކޯޓަށް ދާނެ ކަމަށް މަމްތާ ވިދާޅެއް ނުވެއެވެ. މޯދީ އާއި ހޯމް މިނިސްޓަރު އަމިތް ޝާހް އާއި ބީޖޭޕީގެ ސީނިއާ ލީޑަރުން ވެސްޓް ބެންގާލްގައި ހަފުތާތަކެއް ވަންދެން ކެމްޕެއިން ކުރެއްވީ ބަންގުލަދޭޝް މީހުން ޣައިރުޤާނޫނީގޮތުން އެ ސަރަހައްދަށް ހިޖުރަ ކުރާ މައްސަލައާއި މަމްތާގެ ވެރިކަމުގައި އިޤުތިޞާދު ދަށްވި ވާހަކައިގެ މައްޗަށް ބިނާކޮށެވެ.