ރައީސް އިބްރާހިމް މުހައްމަދު ސާލިހްގެ ވެރިކަމުގައި 2021 ވަނަ އަހަރު ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާގައި އެމަނިކުފާނަށް ލިބުނު ލަކުނުތައް އަލުން ދައްކާލައިފިއެވެ.

ރައީސް ނަޝީދު ވަނީ އެމަނިކުފާނަށް ދިން ހަމަލާގައި ލިބުނު ލަކުނުތައް ފެންނަ ފޮޓޯ އެއް މިއަދު އެ ހަމަލާއަށް 5 އަހަރުވުމާއި ގުޅިގެން އެކްސްގައި ހިއްސާކުރައްވާފައެވެ.

2021 ވަނަ އަހަރުގެ މެއި މަހުގެ 6 ވަނަ ދުވަހު އެމަނިކުފާނަށް ހަމަލާދީފައިވަނީ، އެމަނިކުފާނު ކާރަށް އަރަން އުޅެނިކޮށް އަތަމާ ޕެލެސް ކުރިމަތީގައި ހުރި ކަންމައްޗެއްގައި ހުރި އިމާރާތް ކައިރިން ބޮމެއް ގޮއްވާލައިގެންނެވެ. މި ގޮއްވާލުމުގެ ސަބަބުން ރައީސް ނަޝީދު ވަނީ އެ ރޭ އިމަޖެންސީކޮށް އޭޑީކޭ ހޮސްޕިޓަލަށް ގެންގޮސްފައެވެ. އަދި ފުލުހުން ވަނީ އެ ރޭ އެ ސަރަހައްދު އެއްކޮށް ބަންދުކޮށްފައެވެ.

މީގެ އިތުރުން، ރައީސް ނަޝީދު ވަނީ އިތުރު ފަރުވާއަށް ޖަރުމަނުވިލާތަށް ގޮސްފައެވެ.

އެމަނިކުފާނު އަވަހާރަކޮށްލުމަށް ދިން މި ހަމަލާގައި ޑޮކްޓަރުން ވަނީ 5 އަހަރުތެރޭގައި އެމަނިކުފާނު އެއްކޮށް ރަނގަޅުވާނެ ކަމަށް ވިދާޅުވެ، ހަމައެކަނި ވިސްނަން ޖެހޭނެ ކަމަކީ އެމަނިކުފާނުގެ ކަނާއަތުގެ 3 އިނގިލިއެއް ހަރަކާތްކުރުމާއި މެދުގައި ކަމަށް ވިދާޅުވެފައެވެ.