‏ފާއިތުވި މާޒީގައި ހިނގައިދިޔަ ކަންކަމުގެ ބަދަލު ހޯދަން އުޅެގެން އެމްޑީޕީއަށް ކުރިއެރުމެއް ނުލިބޭނެ ކަމަށް އެ ޕާޓީގެ ކުރީގެ ޗެއާޕާސަން ފައްޔާޒު އިސްމާޢީލް ވިދާޅުވެއްޖެއެވެ. 

ފައްޔާޒު މިހިން ވިދާޅުވީ މިއަދު އެކްސްގައި ކުރެއްވި ޕޯސްޓެއްގައެވެ. 

އެގޮތުން އޭނާ ވިދާޅުވީ، މަޒީގައި ހިނގައިދިޔަ ކަންކަމުގެ ސަބަބުން ހިތަށް ވީތަދުގެ ރިހުން އަދިވެސް އެބަހުރި ކަމަށެވެ.

ނަމަވެސް، މިހާރު ބޭނުންވަނީ ކުރިޔައްދެވޭނެ ގޮތެއް ކަމަށާ، ކުރިއަށްގޮސް ގައުމު އަނބުރާ ހޯދަން ކަމަށް އޭނާ ވިދާޅުވިއެވެ. އަދި އެކަން ކުރެވެން އޮތީ ބޮޑު ބަދަލު ގެނެސްގެން ކަންވެސް ފާހަގަކުރެއްވިއެވެ. 

”ހިތަށްވީ ތަދުގެ ބަދަލު ހޯދަން އުޅެގެން އެމްޑީޕީއަށް ލިބޭނެ ކުރިއެރުމެއް ނެތް .އެހެނަސް އެވީތަދުގެ ރިހުން އެބަހުރި، ހަނދާން އެބަހުރި. ބޭނުމީ ކުރިޔައްދެވޭނެ ގޮތެއް. ގައުމު އަނބުރާ ހޯދުން. އެކަން ކުރެވެން އަންނަނީ.“ ފައްޔާޒު ވިދާޅުވިއެވެ. 

ކުރިއަށް އޮތް އެމްޑީޕީގެ ޗެއާޕާސަން އިންތިޚާބުހައި ފައްޔާޒު ކުރީގެ ރައީސް މުޙައްމަދު ނަޝީދަށް ތާއީދު ކުރައްވައި އެމަނިކުފާނުގެ ފަހަތްޕުޅުގައި އެންމެ އަރިސްކޮށް މަސައްކަތް ކުރައްވާތީ ޕާޓީގެ ބައެެއް މެންބަރުން އަންނަނީ އެކަމަށް ވަރަށް ބޮޑަށް ފާޑުކިޔަމުންނެވެ. 

ޚާއްސަކޮށް ނިމިދިޔަ އެމްޑީޕީ ވެރިކަމުގެ ފަހުކޮޅުގައި އެ ޕާޓީގެ ސަރުކާރަަށް ފާޑު ވިދާޅުވެ، ޕާޓީން ކެނޑިގެން އައު ޕާޓީއެއް އުފެއްދުމުގައި އެންމެ އިސްކޮށް ހަރަކާތްތެރިވެވަޑައިގެންނެވި އެއް ބޭފުޅަކީ ރައީސް ނަޝީދަށްވާއިރު، އެ އިންތިޚާބު އެމްޑީޕީއަށް ނާކާމިޔާބުވި އެއް ސަބަބަކީވެސް އެއީ ކަމަށް މެންބަރުން ބުނެއެވެ.